Read Елизаветинская Библия, 1751 Левит 13 Bible Online

Левит 13 - Елизаветинская Библия, 1751 bible

Левит 13

¹И рече Господь к моисею и аарону, глаголя:

²человеку емуже аще будет на кожи плоти его струп знамения или блеск, и будет на кожи плоти его язва прокажения, да приведется ко аарону жерцу или ко единому от сынов его жерцов:

³и узрит жрец язву на кожи плоти его, и влас в язве изменится в бело, и взор язвы умален от кожи плоти его, язва проказы есть: и узрит жрец, и осквернит его.

⁴Аще же и блеск бел будет на кожи плотней его, и не менший будет взор его от кожи, и влас его не изменися во влас бел, и той есть темен, и отлучит жрец язву на седмь дний:

⁵и узрит жрец язву в день седмый, и се, язва пребывает пред ним, и не изменися язва на кожи, и отлучит его жрец на другия седмь дний:

⁶и узрит его жрец в седмый день вторицею, и се, язва потемне, и не изменися язва на кожи, и очистит его жрец: знамение бо есть: и измыв ризы своя, чист будет.

⁷Аще же изменяющееся изменится знамение на кожи, повнегда видети его жерцу еже очистити его, и явится второе жерцу: и узрит его жрец, и се, изменися знамение в кожи,

⁸и да осквернит его жрец: проказа бо есть.

⁹И язва прокажения аще будет на человеце, и приидет к жерцу:

¹⁰и узрит жрец, и се, струп бел на кожи, и сей изменил влас бел, и от здравыя плоти живыя в струпе:

¹¹проказа ветха есть на кожи плоти его, и осквернит его жрец и отлучит его, яко нечист есть.

¹²Аще же процветая процветет проказа на кожи, и покрыет прокажение всю кожу язвою, от главы да ногу его, по всему взору жерцову:

¹³и узрит жрец, и се, покрыло прокажение всю кожу плоти его, да очистит жрец язву: яко вся изменися в бело, чист есть.

¹⁴И в оньже день аще явится на нем плоть жива, осквернится:

¹⁵и узрит жрец плоть здраву, и осквернит его плоть здрава, яко нечиста есть, прокажение есть.

¹⁶Аще же составится плоть здрава, и изменится в бело, и приидет к жерцу:

¹⁷и узрит жрец, и се, изменися язва в бело, и очистит жрец язву, чист есть.

¹⁸И тело аще будет на кожи его болячка гнойна, и исцелеет,

¹⁹и будет на месте болячки струп бел, или блеск белеющься или рдящься, и явится жерцу:

²⁰и узрит жрец, и се, взор нижае кожи, и влас его изменися в бело, и осквернит его жрец, яко блеск прокажения есть, на болячке процвете.

²¹Аще же увидит жрец, и се, несть в нем влас бел, и не нижае есть от кожи плотския, и сей есть темен, и отлучит его жрец на седмь дний.

²²Аще ли разсыпанием разсыплется по кожи, и осквернит его жрец, блеск прокажения есть, на болячке процвете.

²³Аще ли на месте своем пребывает блеск и не разсыпается, струп болячки есть, и очистит его жрец.

²⁴И плоть аще будет на кожи его жжение огнено, и будет на кожи его исцелевшее от жжения блещащееся бело или червлено или пробелующееся:

²⁵и узрит его жрец, и се, пременися влас бел в блещащийся, и взор ему нижае от кожи, прокажение есть, во жжении процвете, и осквернит его жрец, язва прокажения есть.

²⁶Аще же увидит его жрец, и се, несть на блещащемся влас бел, и не нижае есть от кожи, само же темно, и отлучит его жрец на седмь дний:

²⁷и узрит его жрец в день седмый, и аще разсыпанием разсыплется по кожи, и осквернит его жрец: язва прокажения есть, бо гной процвете.

²⁸Аще же на месте пребудет блещание и не разсыплется по кожи, сие же темно есть, струп сожжения есть, да очистит его жрец: образ бо сожжения есть.

²⁹Мужу же или жене, аще будет на них язва прокажения на главе или на браде,

³⁰и узрит жрец язву, и се, обличие ея глубочае кожи, в нейже влас желтуяся тонок, и осквернит его жрец: вред есть, прокажение главы или прокажение брады есть.

³¹И аще увидит жрец язву вреда, и се, не будет обличие нижае кожи, и влас желтуяся не будет в нем, да отлучит жрец язву вреда на седмь дний:

³²и узрит жрец язву в день седмый, и се, не разсыпася вред, и влас желтуяся несть в нем, и обличие вреда несть нижае кожи:

³³и острижет кожу, вред же да не острижется, и отлучит жрец вред на седмь дний второе:

³⁴и узрит жрец вред в день седмый, и се, не разсыпася вред по кожи по острижении его, и обличие вреда несть нижае кожи, и очистит его жрец, и измыв ризы, чист будет.

³⁵Аще же разсыпанием разсыплется вред по кожи по очищении его:

³⁶и узрит его жрец, и се, не разсыпася вред по кожи, да не присетит жрец о власе желтеющемся, яко нечист есть.

³⁷Аще же пред ним будет на месте вред, и влас черн явится в нем, исцеле вред, чист есть, и очистит его жрец.

³⁸Мужу же или жене, аще будут на кожи плоти его блещания блещащая белеющаяся:

³⁹и увидит жрец, и се, на кожи плоти его блещания и блещащая белеющаяся, лишай есть, процвете на кожи плоти его, чист есть.

⁴⁰Аще же кому облезе глава, плешив есть, чист есть:

⁴¹аще же спреди облезе глава, взлыс есть, чист есть:

⁴²аще же будет на плеши его или на взлысине его блеск бел или червленуяся, прокажение процветающее на плеши его или на взлысине его:

⁴³и увидит его жрец, и се, обличие блеска бело или червлено на плеши его или на взлысине его, яко обличие прокажения на кожи плоти его:

⁴⁴человек прокажен есть, осквернением осквернит его жрец, на главе его блеск его.

⁴⁵И прокажен, на немже есть язва, ризы его да будут раздраны, и глава его не покровена, и около уст своих да обвиется, и нечист прозовется:

⁴⁶вся дни, в няже будет на нем язва, нечист сый, нечист будет: отлучен да седит, вне полка да будет ему пребывание.

⁴⁷И риза аще будет на ней язва прокажения, на ризе сукняне, или на изгребийней,

⁴⁸или на прядене, или на кроках, или на льнех, или на волне, или на кожи, или на всякой кожи деланей,

⁴⁹и явится язва зелена или червленуяся на кожи, или на ризе, или на пряденех, или на кроках, или на всяком деле кожанем, язва прокажения есть, и покажет жерцу:

⁵⁰и увидит жрец язву, и отлучит жрец язву на седмь дний.

⁵¹И да увидит жрец язву в день седмый: аще же разсыпася язва по ризе, или по прядене, или по кроках, или по кожи, по всему елика творятся кожы в делании, прокажение исто есть язва, нечист есть:

⁵²да сожжет ризу, или прядения, или кроки, или на волне, или на льне, или на всяком сосуде кожане, на немже аще будет язва: понеже прокажение исто есть, на огни да сожжется.

⁵³Аще ли узрит жрец, и не разсыплется язва по ризе, или по прядене, или по кроках, или по всякому сосуду кожану:

⁵⁴и повелит жрец, и измыет, на немже будет язва, и да отлучит жрец язву на другия седмь дний:

⁵⁵и увидит жрец по измытии его язву, и аще не изменила язва лица своего, и язва не разсыпася, нечисто есть, на огни да сожжется: утвердися бо на ризе, или на прядене, или на кроках.

⁵⁶И аще увидит жрец, и будет темна язва по испрании ея, да отторгнет е от ризы, или от прядена, или от крок, или от кожи.

⁵⁷И аще явится еще на ризе или на прядене, или на кроках, или на всяком сосуде кожане, прокажение процветающее есть, на огни да сожжется, на немже есть язва.

⁵⁸И риза, или прядено, или кроки, или всяк сосуд кожан, еже исперется, и отступит от него язва, и измыется второе, и чисто будет.

⁵⁹Сей закон язве прокажения ризы сукняны, или изгребийны, или прядены, или куделныя, или всякаго сосуда кожана, во еже очистити е, или осквернити е.