Read Елизаветинская Библия, 1751 Левит 16 Bible Online

Левит 16 - Елизаветинская Библия, 1751 bible

Левит 16

¹И глагола Господь к моисею, по умертвии двух сынов аароних, егда принесоста огнь чуждий пред Господа и скончастася.

²И рече Господь к моисею: глаголи аарону, брату твоему, да не входит по вся часы в святое внутрь завесы, пред лице очистилища, еже есть над кивотом свидения, и да не умрет: во облаце бо явлюся над очистилищем:

³сице внидет аарон в святое: с телцем от говяд греха ради, и со овном на всесожжение,

⁴и в ризу льняну освящену да облечется, и надраги льняны да будут на теле его, и поясом льняным да опояшется, и клобук льнян да возложит, ризы святы суть: и да омыет водою все тело свое, и да облечется в ня:

⁵и от сонма сынов израилевых да возмет два козла от коз греха ради, и овна единаго во всесожжение,

⁶и да приведет аарон телца, иже греха ради своего, и да помолится о себе и о доме своем,

⁷и да возмет два козла, и поставит я пред Господем у дверий скинии свидения:

⁸и да возложит аарон на оба козла жребия: жребий един Господу и жребий другий отпущению.

⁹И да приведет аарон козла, на немже паде жребий Господу, и да принесет греха ради:

¹⁰и козла, на немже паде жребий отпущения, да поставит его жива пред Господем, яко помолитися над ним и яко отпустити его во отпущение, и да отпустит его в пустыню: и возмет козел на ся беззакония их в землю непроходиму.

¹¹И да приведет аарон телца, иже греха ради своего, и да помолится о себе и о доме своем: и да заколет телца, иже греха ради своего.

¹²И да возмет кадилник полн углия огненна от олтаря, иже пред Господем, и да наполнит руце фимиама сложения чиста, и да принесет внутрь завесы:

¹³и да возложит фимиам на огнь пред Господем, и покрыет дым фимиамный очистилище еже на свидениих, и не умрет.

¹⁴И да возмет от крове телца, и да воскропит перстом на очистилище на востоки: пред лицем очистилище да воскропит седмижды от крове перстом своим.

¹⁵И да заколет козла иже греха ради, иже за люди, пред Господем: и да внесет от крове его внутрь завесы, и да сотворит крови его, якоже сотвори крови телчи, и да воскропит кровию его на очистилище прямо очистилищу,

¹⁶и очистит святое от нечистот сынов израилевых и от неправд их, о всех гресех их: и тако сотворит скинии свидения сотворенней в них посреде нечистоты их.

¹⁷И всяк человек да не будет в скинии свидения, егда входит молитися во святое, дондеже изыдет: и да помолится о себе и о доме своем и о всем сонме сынов израилевых.

¹⁸И изыдет ко олтарю, иже есть пред Господем, и помолится на нем, и да возмет от крове телца и от крове козла, и возложит на роги олтаря окрест:

¹⁹и да воскропит перстом своим нань седмижды от крове, и очистит его и освятит его от нечистот сынов израилевых.

²⁰И совершит очищая святое и скинию свидения и олтарь, и от жерцех очистит, и приведет козла живаго:

²¹и да возложит аарон обе руце свои на главу козла живаго, и да исповесть на нем вся беззакония сынов израилевых и вся неправды их и вся грехи их: и возложит я на главу козла живаго, и отпустит рукою человека уготованнаго в пустыню:

²²и возмет козел на ся неправды их в землю непроходиму: и да отпустит козла в пустыню.

²³И да внидет аарон в скинию свидения, и да совлечет ризы льняны, в няже оболчен бяше, входящу ему во святое, и положит я тамо:

²⁴и омыет тело свое водою на месте святе и да облечется в ризы своя, и изшед да сотворит всесожжение свое и всеплодие людское, и да помолится о себе и о доме своем, и о людех якоже и о жерцех:

²⁵и тук иже грехов ради да вознесет на олтарь.

²⁶И отпустивый козла отпущенаго во отпущение да исперет ризы своя и да омыет плоть свою водою, и по сих да внидет в полк.

²⁷И телца иже греха ради, и козла иже греха ради, ихже кровь внесеся на очищение во святое, да изнесут я вне полка и да сожгут я на огни, и кожы их и мяса их и мотыла их:

²⁸сожигаяй же я да исперет ризы своя и да омыет тело свое водою, и по сем да внидет в полк.

²⁹И будет сие вам законное вечное: в месяц седмый, в десятый день месяца, покорите душы вашя, и всякаго дела да не сотворите, ни туземец, ни пришлец прилежай в вас:

³⁰в той бо день помолится о вас, еже очистити вас от всех грехов ваших пред Господем, и чисти будете:

³¹суббота суббот покой да будет сия вам, и покорите душы вашя, законно вечно.

³²Помолится жрец, егоже аще помажут и егоже аще совершат руце его, еже жрети ему по отце своем, и да облечется в ризу льняну свою, ризу святу,

³³и да очистит святое святаго и скинию свидения, и олтарь да очистит, и о жерцех и о всем сонме да помолится.

³⁴И будет сие вам законное вечное, еже молитися о сынех израилевых о всех гресех их, единою в лето да сотворится, якоже заповеда Господь моисею.