Read Елизаветинская Библия, 1751 Левит 18 Bible Online

Левит 18 - Елизаветинская Библия, 1751 bible

Левит 18

¹И рече Господь к моисею, глаголя:

²глаголи сыном израилевым и речеши к ним: аз Господь Бог ваш:

³по делом земли египетския, в нейже обитасте, да не сотворите, и по начинанием земли ханаанския, в нюже аз веду вы тамо, не сотворите, и по законом их не ходите:

⁴судбы моя сотворите, и повеления моя сохраните и ходите в них: аз Господь Бог ваш:

⁵и сохраните вся повеления моя и вся судбы моя, и сотворите я: сотворивый та человек жив будет в них: аз Господь Бог ваш.

⁶Человек человек ко всякому ближнему плоти своея да не приступит открыти срамоты: аз Господь.

⁷Срамоты отца твоего и срамоты матере твоея да не открыеши: мати бо твоя есть, да не открыеши срамоты ея.

⁸Срамоты жены отца твоего да не открыеши: срамота отца твоего есть.

⁹Срамоты сестры твоея яже от отца твоего или от матере твоея, в дому рожденныя или вне рожденныя, да не открыеши срамоты их.

¹⁰Срамоты дщере сына твоего или дщере дщере твоея, да не открыеши срамоты их, яко твоя срамота есть.

¹¹Срамоты дщере жены отца твоего да не открыеши, единоотча сестра ти есть, да не открыеши срамоты ея.

¹²Срамоты сестры отца твоего да не открыеши, своя бо отцу твоему есть.

¹³Срамоты сестры матере твоея да не открыеши, своя бо матери твоей есть.

¹⁴Срамоты брата отца твоего да не открыеши и к жене его да не внидеши, сродник бо ти есть.

¹⁵Срамоты невестки твоея да не открыеши, жена бо сына твоего есть, да не открыеши срамоты ея.

¹⁶Срамоты жены брата твоего да не открыеши, срамота брата твоего есть.

¹⁷Срамоты жены и дщере ея, да не открыеши, дщере сына ея, и дщери дщере ея да не поймеши открыти срамоты их, ближнии бо ти суть, нечестие есть.

¹⁸Сестру жены твоея да не поймеши в наложницу, открыти срамоту ея пред нею, еще живе сущей ей.

¹⁹И к жене во отлучении нечистоты ея да не внидеши открыти срамоты ея.

²⁰И к жене ближняго твоего да не даси ложа семене твоего, осквернитися с нею.

²¹И от семене твоего да не даси служити молоху, да не оскверниши имене святаго:

²²И с мужеским полом да не ляжеши женским ложем, мерзость бо есть.

²³И всякому четвероногому да не даси ложа своего в семенение, осквернитися с ним: и жена да не станет ко всякому четвероногому снитися, гнусно бо есть.

²⁴Не оскверняйтеся во всех сих: во всех бо сих осквернишася языцы, ихже аз отжену пред лицем вашим:

²⁵и осквернися земля, и воздах неправду им ея ради: и возненавиде земля седящих на ней.

²⁶И сохраните вся законы моя и вся повеления моя, и не сотворите от всех гнусностей сих, туземец и прибывший пришлец в вас:

²⁷вся бо сия гнусности сотвориша человецы земнии, бывшии прежде вас, и осквернися земля.

²⁸И да не вознегодует на вас земля, внегда осквернити вам ю, имже образом вознегодова на языки иже прежде вас:

²⁹яко всяк, иже аще сотворит от всех гнусностей сих, потребятся душы творящыя сие от людий своих.

³⁰И сохраните повеления моя, яко да не сотворите от всех закон гнусных, иже беша прежде вас: и да не осквернитеся в них, яко аз Господь Бог ваш.