Read Елизаветинская Библия, 1751 Левит 19 Bible Online

Левит 19 - Елизаветинская Библия, 1751 bible

Левит 19

¹И рече Господь к моисею, глаголя:

²глаголи всему сонму сынов израилевых, и речеши к ним: святи будите, якоже аз свят (есмь) Господь Бог ваш.

³Вийждо отца своего и матере своея да боится, и субботы моя сохраните: аз Господь Бог ваш.

⁴Не последуйте идолом, и богов слияных не сотворите себе: аз Господь Бог ваш.

⁵И аще пожрете жертву спасения Господу, приятну вам пожрите:

⁶в оньже день аще пожрете, (в той день) да снестся, и на утрие: и аще останется до третияго дне, на огни да сожжется:

⁷аще же ли ядением сястся в день третий, не жертвенно есть, не приимется:

⁸и иже яст е, грех приимет, яко святая Господня оскверни: и потребятся душы ядущыя от людий своих.

⁹И пожинающым вам жатву земли вашея, да не скончаете жатвы вашея, нивы твоея пожинания: и падающих клас от жатвы твоея да не собереши:

¹⁰и винограда твоего вторицею да не обереши, ниже грезн винограда твоего да собереши: нищему и пришелцу да оставиши я: аз есмь Господь Бог ваш.

¹¹Не украдите, ни солжите, ниже да оклеветает кийждо ближняго.

¹²И не кленитеся именем моим в неправде, и да не оскверните имене святаго Бога вашего: аз Господь Бог ваш.

¹³Да не обидиши ближняго: и да не отимеши, и да не прележит мзда наемника твоего у тебе до утрия.

¹⁴Зла да не речеши глухому, и пред слепым да не положиши претыкания: и да убоишися Господа Бога твоего: аз Господь Бог ваш.

¹⁵Не сотворите неправды в суде: да не приимеши лица нищаго, ниже почудишися лицу могущаго: по правде да судиши ближнему твоему.

¹⁶Да не ходиши лестию во своем языце, и не востанеши на кровь ближняго твоего: аз Господь Бог ваш.

¹⁷Да не возненавидиши брата твоего во уме твоем, обличением да обличиши ближняго твоего: и не приимеши ради его греха.

¹⁸И да не отмщает рука твоя, и да не враждуеши на сыны людий своих, и возлюбиши ближняго своего яко сам себе: аз Господь Бог ваш.

¹⁹Закон мой сохраните: и скота твоего да не смесиши со скотом инаго рода, и винограда твоего да не насадиши различна: и ризы из двух (вещей) сотканыя гнусныя да не возложиши на ся.

²⁰И аще кто будет с женою ложем семене, и сия бяше раба хранима мужу, и ценою не искуплена или свобода не дана ей, наказаны да будут: не умрут, яко не свободися:

²¹и да приведет за преступление свое Господу к дверем скинии свидения овна преступления,

²²и да помолится о нем жрец овном преступления пред Господем о гресе имже согреши, и оставится ему грех, егоже сотвори.

²³Егда же внидете в землю, юже Господь Бог ваш дает вам, и насадите всяко древо снедное, и очистите нечистоту его, плод его три лета нечист да будет вам, да не снестся:

²⁴в лето же четвертое будет всяк плод его свят, похвален Господу:

²⁵в лето же пятое да снесте плод его, прибыток вам плоды его: аз Господь Бог ваш.

²⁶Не ядите на горах, и не вражите, и ни сряща смотрите от птиц.

²⁷Не сотворите обстрижения кругом от влас глав ваших, ниже бриете брад ваших.

²⁸И кроения не сотворите на теле вашем о души: и язв настреканных да не сотворите в вас: аз Господь Бог ваш.

²⁹Да не оскверниши дщере твоея еже блудити ей: и да не прелюбы деет земля, и наполнится земля беззаконий.

³⁰Субботы моя сохраните, и от святых моих убойтеся: аз Господь.

³¹Не последуйте утробным баснем, и к волхвом не прилепитеся, осквернитися в них: аз Господь Бог ваш.

³²Пред лицем седаго востани и почти лице старчо, и да убоишися Господа Бога твоего: аз Господь Бог ваш.

³³Аще же кто приидет к вам пришлец в землю вашу, не стужите ему:

³⁴якоже туземец будет в вас пришлец, иже приидет к вам, и возлюбиши его яко сам себе: яко (и вы) пришелцы бесте в земли египетстей: аз Господь Бог ваш.

³⁵Не сотворите неправды в суде, в мерах и в весах и в мерилех:

³⁶мерила праведна и весы праведны и мера праведна да будет в вас: аз есмь Господь Бог ваш, изведый вас от земли египетския.

³⁷И сохраните весь закон мой и вся повеления моя, и сотворите я: аз Господь Бог ваш.