Read Елизаветинская Библия, 1751 Левит 20 Bible Online

Левит 20 - Елизаветинская Библия, 1751 bible

Левит 20

¹И рече Господь к моисею, глаголя:

²рцы сыном израилевым, глаголя: аще кто от сынов израилевых, или от прибывших пришелцев во израили, иже аще даст от семене своего молоху, смертию да умрет: людие земли да побиют его камением:

³и аз утвержу лице мое на человека того и погублю его от людий его, яко от семене своего даде молоху, да осквернит святыню мою и осквернит имя освященных мне.

⁴Аще же презрением презрят туземцы земли очима своима от человека того, внегда дати ему от семене своего молоху, еже не убити его:

⁵и утвержу лице мое на человека того и на сродники его, и погублю его и всех единомыслящих с ним, еже соблуждати ему со идолы от людий своих.

⁶И душа яже аще последует утробным баснем или волхвом, яко соблудити вслед их, утвержу лице мое на душу ту и погублю ю от людий ея.

⁷И будете святи, яко аз свят Господь Бог ваш.

⁸И сохраните повеления моя и сотворите я: аз Господь освящаяй вас.

⁹Человек человек, иже аше зло речет отцу своему или матери своей, смертию да умрет: отцу своему или матери своей зле рече, повинен будет.

¹⁰Человек человек, иже аще прелюбы содеет с мужнею женою, или кто прелюбы содеет с женою ближняго своего, смертию да умрут прелюбодей и прелюбодейца.

¹¹И иже аще пребудет с женою отца своего, срамоту отца своего открыл есть, смертию да умрут оба, повинни суть.

¹²И аще кто будет с невесткою своею, смертию да умрут оба, нечествоваша бо, повинни суть.

¹³И аще кто будет с мужеским полом ложем женским, гнусность сотвориша оба, смертию да умрут, повинни суть:

¹⁴Иже аще поймет жену и матерь ея, беззаконие есть, огнем да сожгут его и оныя, и не будет беззаконие в вас.

¹⁵И иже аще даст ложе свое четвероножному, смертию да умрет, четвероножное же убиете.

¹⁶И жена яже аше приступит ко всякому скоту, еже быти с ним, да убиете жену и скот, смертию да умрут, повинни суть.

¹⁷иже аще поймет сестру свою от отца своего или от матере своея, и увидит срамоту ея, и она увидит срамоту его, укоризна есть, да потребятся пред сыны рода их: срамоту сестры своея откры, грех приимут.

¹⁸И муж иже будет с женою сквернавою и открыет срамоту ея, течение ея откры, и она откры течение крове своея, да потребятся оба от рода их.

¹⁹И срамоту сестры отца твоего и сестры матере твоея да не открыеши: ужичество бо откры, грех понесут.

²⁰иже аще будет со сродницею своею, срамоту сродства своего откры, безчадни измрут.

²¹И человек иже аще поймет жену брата своего, нечистота есть: срамоту брата своего открыл есть, безчадни измрут.

²²И сохраните вся повеления моя и вся судбы моя и сотворите я, и не вознегодует на вас земля, в нюже аз введу вы тамо вселитися на ней.

²³И не ходите в законы языческия, ихже аз изгоню от вас: яко сия вся сотвориша, и возгнушахся ими.

²⁴И рех к вам: вы наследите землю их, и аз дам вам ю в притяжание, землю текущую медом и млеком, аз Господь Бог ваш, отлучивый вас от всех язык.

²⁵И отлучите себе между скоты чистыми и между скоты нечистыми, и между птицами чистыми и нечистыми: и не оскверните душ ваших в скотех и в птицах и во всех гадех земных, яже аз отлучих вам в нечистоте,

²⁶И будете ми святи, яко аз свят есмь Господь Бог ваш, отлучивый вас от всех язык быти моими.

²⁷И муж или жена иже аще будет от них чревобасник или волшебник, смертию да умрут оба: камением да побиете их, повинни суть.