Read Елизаветинская Библия, 1751 Левит 21 Bible Online

Левит 21 - Елизаветинская Библия, 1751 bible

Левит 21

¹И рече Господь к моисею, глаголя: рцы жерцем сыном аароним, и речеши им: над душами да не осквернятся в языце своем,

²но разве в дому ближняго своего, над отцем и материю, и сынами и дщерьми, над братом

³и над сестрою своею девою, яже есть ближняя ему, не дана мужу, над сими да осквернятся:

⁴да не осквернится внезапу в людех своих, во осквернение свое.

⁵И да не обриете главы по мертвем, и обличия брады да не обриют, и на плотех своих да не сотворят язв:

⁶святи да будут Богу своему и не осквернят имене Бога своего: жертвы бо Господни дары Бога своего сами приносят, и будут святи.

⁷Жены блудницы и осквернены да не поймут, и жены изгнаныя от мужа ея да не поймут: яко святи суть Господу Богу своему:

⁸и да освятиши его: дары Господа Бога вашего сей приносит, свят будет: яко свят аз есмь Господь Бог ваш освящая их.

⁹И дщерь человека жерца аще осквернится, еже соблудити, имя отца своего сия оскверняет: огнем да сожжется.

¹⁰И жрец великий от братий своих, емуже возлиян на главу елей помазания, и совершенный, еже облачитися в ризы, главы да не открыет, и риз своих да не раздерет,

¹¹и ко всякой души умершей да не приидет: над отцем своим и над материю своею да не осквернится,

¹²и от святых да не изыдет, и да не осквернит имене святаго Бога своего, яко святый елей помазания Бога его на нем: аз Господь.

¹³Сей в жену деву от рода своего да поймет:

¹⁴вдовицы же и изгнаныя, и оскверненыя и блудницы, сих да не поймет: но девицу от племене своего да поймет в жену:

¹⁵и да не осквернит семене своего в людех своих: аз Господь Бог освящаяй его.

¹⁶И рече Господь к моисею, глаголя:

¹⁷рцы ко аарону, глаголя: человек от рода твоего в родех ваших, аще коему будет на нем порок, да не приступит приносити дары Бога своего:

¹⁸всяк человек, емуже аще будет на нем порок, да не приступит: человек слеп, или хром, или корносый, или ухорезан,

¹⁹или человек, емуже есть сокрушение руки или сокрушение ноги,

²⁰или горбат, или гноеточив очима, или бельмоочен, или человек, на немже суть красты дивия, или лишаи, или единоятрный:

²¹всяк, емуже аще будет на нем порок от семене аарона жерца, да не приступит принести жертв Богу твоему, зане порок на нем: даров Божиих да не приступит приносити:

²²дары Бога своего святая святых, и от святых да снест:

²³обаче к завесе да не приступит, и ко олтарю да не приближится, яко порок имать: и да не осквернит святилища Бога своего, яко аз Господь освящаяй их.

²⁴И глагола моисей ко аарону и сыном его, и ко всем сыном израилевым.