Read Елизаветинская Библия, 1751 Левит 22 Bible Online

Левит 22 - Елизаветинская Библия, 1751 bible

Левит 22

¹И рече Господь к моисеовы, глаголя:

²рцы аарону и сыном его, да внимают от святынь сынов израилевых, и да не осквернят имене святаго моего, елика они освящают ми: аз Господь.

³Рцы им: в роды вашя всяк человек, иже аще приступит от всякаго семене вашего ко святым, елика аще освятят сынове израилевы Господу, и нечистота его на нем будет, потребится душа оная от мене: аз Господь Бог ваш.

⁴И человек от семене аарона жерца, и сей прокажен, или семя изливает, от святых да не снест, дондеже очистится: и прикасаяйся всякой нечистоте души, или человек, емуже аще изыдет от его ложа семя,

⁵или иже аще прикоснется всякому гаду нечисту, иже осквернит его, или человеку, иже осквернит его, по всякой нечистоте его:

⁶душа, яже аще прикоснется их, нечиста будет до вечера: да не снест от святых, аще не омыет тела своего водою,

⁷и зайдет солнце, и чист будет: и тогда да снест от святых, яко хлеб его есть.

⁸Мертвечины и звероядины да не снест, еже осквернитися ему в них: аз Господь.

⁹И да сохранят повеления моя, да не приимут сих ради греха, и измрут за них, аще осквернят их: аз Господь Бог освящаяй их.

¹⁰И всяк иноплеменник да не снест святынь: приселник иереев или наемник да не снест святынь.

¹¹Аще же жрец пристяжет душу пристяжаную сребром, сия да снест хлебы его: и домочадцы его, и сии да снедят хлебы его.

¹²И дщерь человека жерца, аще посягнет за мужа иноплеменника, сия от начатков святых да не снест.

¹³И дщерь жерца аще будет вдова или отпущена, плода же не будет ей, возвратится в дом отца своего, по юности своей, от хлебов отца своего да снест: всяк же иноплеменник да не снест от них.

¹⁴И человек, иже аще яст святая по неведению, и да приложит пятую свою часть ко истому, и да даст сие жерцу святое.

¹⁵И да не осквернят святынь сынов израилевых, ихже они отделяют Господу:

¹⁶и да не наведут на себе беззаконие преступления, внегда ясти им святыню их, яко аз Господь освящаяй их.

¹⁷И рече Господь к моисею, глаголя:

¹⁸глаголи аарону и сыном его и всему сонму израилеву и речеши к ним: человек человек от сынов израилевых, или от пришлец прилежащих к ним во израили, иже аще принесет дары своя по всякому исповеданию своему, или по всякому изволению своему, елика аще принесут Господу на всесожжение,

¹⁹приятны вам непорочны мужеск пол от стад волов, или от овен и от коз:

²⁰всех, елика аще имут порок на себе, да не принесут Господу, понеже неприятно будет вам.

²¹И человек иже аще принесет жертву спасения Господу, отлучив обет или по изволению, или в праздники вашя, от стад волов или от овец, непорочно да будет в приятие, всяк порок да не будет на нем:

²²слепо, или сокрушено, или язык урезан имущо, или червиво, или крастово, или лишаво, да не принесут тех Господу, и в жертву не дадите от них на олтарь Господеви:

²³и телца или овцу ухорезну, или безхвостну, в заколение сотвориши я себе (по изволению), в обет же твой да не приимется:

²⁴емуже суть ятра сокрушена, и емуже раздавлена, и изрезана, и исторжена, да не принесете сих Господу, и в земли вашей да не сотворите.

²⁵И от руки иноплеменника да не принесете даров Богу вашему от всех сих, яко вреждения суть на них, порок на них, не приимутся сия от вас.

²⁶И рече Господь к моисею, глаголя:

²⁷телец, или овча, или козля, егда родится, да будет седмь дний под материю своею, в день же осмый и далее принесется в дар, принос Господу:

²⁸и телца и овчате вкупе с материю да не заколете в един день,

²⁹Аше же пожреши жертву обет радования Господеви, приятно вам пожрите е:

³⁰сия в тойже день да снестся, да не оставите от мяс на утрие: аз есмь Господь.

³¹И сохраните заповеди моя и сотворите я: аз Господь:

³²и не оскверните имене святаго, и освящуся посреде сынов израилевых: аз Господь освящаяй вас,

³³изведый вы из земли египетския, яко быти вам в Бога: аз Господь.