Read Елизаветинская Библия, 1751 Левит 25 Bible Online

Левит 25 - Елизаветинская Библия, 1751 bible

Левит 25

¹И рече Господь к моисею на горе синайстей, глаголя:

²глаголи сыном израилевым и речеши к ним: егда внидете в землю, юже аз даю вам, и почиет земля, юже аз даю вам, субботы Господу.

³Шесть лет да сееши ниву твою, и шесть лет да режеши виноград твой и собереши плод его:

⁴в седмое же лето суббота, покой да будет земли, суббота Господня: нивы твоея сеяти и винограда твоего резати не будеши,

⁵и сама собою произрастающая нивы твоея да не пожнеши, и винограда отлучения твоего да не собереши: лето покоя будет земли.

⁶И будут субботы земли яди тебе, и рабу твоему и рабыни твоей, и наемнику твоему и обиталнику прилежащему к тебе,

⁷и скотом твоим и зверем сущым на земли твоей да будет всяк плод его в снедь.

⁸И исчислиши себе седмь лет покоя, седмь лет седмижды: и будут тебе седмь седмин лет, четыредесять девять лет.

⁹И возвестите трубным гласом во всей земли вашей месяца седмаго в десятый день месяца: в день очищения возвестите трубою во всей земли вашей.

¹⁰И освятите лето, пятьдесятое лето, и разгласите оставление на земли всем живущым на ней: лето оставления знамение сие будет вам: и да отидет кийждо вас в притяжание свое, и кийждо во отечество свое отидете.

¹¹Оставления знамение сие будет вам, лето пятьдесятое, лето будет вам: ни сеяти, ниже жати будете, еже само произникнет на ней, и да не о‹емлеши освященных (Богу) ея:

¹²яко оставления знамение есть, свято да будет вам: от нив ядите плоды ея:

¹³и в лето оставления знамения сего да возвратится кийждо в притяжание свое.

¹⁴Аще же отдаси куплею ближнему твоему, или аще притяжеши от ближняго твоего, да не оскорбляет человек ближняго:

¹⁵по числу лет по знамении, да притяжеши от ближняго, по числу лет плодов да продастся тебе.

¹⁶Якоже аще более лет, умножит притяжание его, и якоже аще мнее лет, уменшит притяжание его: яко число плодов его, тако да продаст тебе.

¹⁷Да не оскорбит человек ближняго, и да убоишися Господа Бога твоего: аз Господь Бог ваш.

¹⁸И сотворите вся оправдания моя и вся суды моя, сохраните же и сотворите я, и вселитеся на земли уповающе.

¹⁹И даст земля плоды своя, и снесте в сытость, и вселитеся на ней уповающе.

²⁰Аще же речете: что ясти будем в седмое лето сие, аще не сеем, ни собираем плодов своих,

²¹и послю благословение мое вам в лето шестое, и сотворит плоды своя на три лета:

²²и посеете в лето осмое, и снесте от плодов ветхих даже до лета девятаго: дондеже приспеют плоды ея, снесте ветхая ветхих.

²³И земля да не продастся во утверждение: моя бо есть земля, яко пришелцы и приселницы вы есте предо мною:

²⁴и по всей земли одержания вашего, искуп дадите земли.

²⁵Аще же нищетствует брат твой, иже с тобою, и продаст от одержания своего, да приидет ужик ближний ему и искупит продание брата своего.

²⁶Аще же не будет кому ужика, и возможет рука его обрести доволен искуп его,

²⁷и исчислит лета продания его, и воздаст еже излише имать, человеку емуже продано бе оное, и возвратится во одержание свое.

²⁸Аще же не обрящет рука его доволное, еже отдати ему, да будет проданое купившему е даже до шестаго лета оставления, и изыдет во оставление, и возвратится во одержание свое.

²⁹Аще же кто продаст дом обитаемый во граде огражденнем, и будет искупление его, дондеже исполнится: лето дний будет искупление его.

³⁰Аще же не искупит, дондеже скончается лето все, да укрепится дом сущий во граде имущем ограждение в твердость купившему его, в роды его, и не возвратится во оставление.

³¹Домы же иже на селех, имже несть окрест их ограждения, к селу земли да приложатся: искупуемы всегда да будут, и во оставление да возвратятся.

³²И гради левитстии, домы градов одержания их, искупуемы да будут всегда левитом.

³³И иже аще искупит от левит: и изыдет продание домов града одержания их во оставление, яко домы градов левитских одержание их, посреде сынов израилевых.

³⁴И села отделеная градом их да не продадутся, яко одержание вечное сие их есть.

³⁵Аще же нищетствует брат твой, иже с тобою, и изнеможет руками у тебе, заступи его яко пришелца и приселника, да поживет брат твой с тобою:

³⁶да не возмеши от него лихвы, ниже более (данаго), и убоишися Бога твоего: аз Господь: и поживет брат твой с тобою.

³⁷Сребра твоего да не даси ему в лихву, и ради прибытка не даси ему пищей твоих.

³⁸Аз Господь Бог ваш, изведый вы из земли египетския, еже дати вам землю ханаанску, яко быти мне Богу вашему.

³⁹Аще же оубожает брат твой у тебе, и продастся тебе, да не поработает тебе работы рабския:

⁴⁰аки наемник или пришлец да будет тебе, даже до лета оставления делати будет у тебе,

⁴¹и да изыдет от тебе, и дети его с ним в лето оставления, и да отидет в род свой, и во одержание отчее свое возвратится,

⁴²понеже раби мои суть сии, ихже изведох из земли египетския, да не продастся проданием рабиим:

⁴³да не отяготиши его трудом, и убоишися Господа Бога твоего.

⁴⁴И раб и рабыня, иже _ще будут у тебе от язык, иже окрест тебе суть, от тех да притяжете раба и рабыню.

⁴⁵И от сынов приселничих, иже суть в вас, от сих притяжете, и от сродников их, елицы аще будут в земли вашей, да будут вам во одержание,

⁴⁶и да разделите я детем вашым по вас, и да будут вам во одержание во век: братии же вашея, сынов израилевых, кийждо брата своего да не отяготит его в трудех.

⁴⁷Аще же обрящет рука пришелца или приселника иже у тебе, и обнищав брат твой продастся к пришелцу или приселнику иже у тебе, или родившемуся от рода пришелча,

⁴⁸по продании ему, искуп да будет ему, един от братий его да искупит его:

⁴⁹брат отца его, или сын брата отца его, да искупит его, или от свойственных плоти племене его искупит его: аще же возможет рука его, искупит себе,

⁵⁰да сочтется с притяжавшим его, от лета в неже продася ему даже до лета оставления, и будет сребро продания его аки день наемника: от лета до лета да будет с ним.

⁵¹Аще же кому множае лет будет, против тех отдаст искуп свой, от сребра продания своего.

⁵²Аще же мало останется от лет до лета оставления, и да сочтет ему по летом его, и отдаст искуп его аки наемник:

⁵³от года до года да будет с ним: да не отяготиши его трудом пред тобою.

⁵⁴Аше же не искупится по сим, да изыдет в лето оставления сам и дети его с ним:

⁵⁵яко мои сынове израилевы раби суть, отроцы мои сии суть, ихже изведох из земли египетския: аз Господь Бог ваш.