Read Елизаветинская Библия, 1751 Левит 26 Bible Online

Левит 26 - Елизаветинская Библия, 1751 bible

Левит 26

¹Не сотворите себе (образов) рукотвореных, ниже изваяных, ниже столпа поставите себе, ниже камене поставите в земли вашей во знамение, ко еже покланятися ему: аз есмь Господь Бог ваш.

²Субботы моя сохраните, и от святых моих убойтеся: аз есмь Господь.

³Аще в повелениих моих ходите, и заповеди моя сохранитеи сотворите я:

⁴и дам дождь вам во время свое, и земля даст плоды своя, и древеса селная отдадят плод свой:

⁵и постигнет вам млачение (жит) обрание вина, и обрание вина постигнет сеятву, и снесте хлеб ваш в сытость, и вселитеся с твердостию на земли вашей, и рать не пройдет сквозе землю вашу:

⁶и дам мир в земли вашей, и уснете, и не будет устрашаяй вас: и погублю звери лютыя от земли вашея:

⁷и рать сквозе землю вашу не пройдет, и поженете враги вашя, и падут пред вами убиением:

⁸и поженут от вас пять сто, и сто вас поженет тмы, и падут врази ваши пред вами мечем:

⁹и призрю на вас и благословлю вас, и возращу вас и умножу вас, и поставлю завет мой с вами:

¹⁰и снесте ветхая и ветхая ветхих, и ветхая от лица новых изнесете:

¹¹и поставлю завет мой в вас, и не возгнушается душа моя вами:

¹²и похожду в вас, и буду вам Бог, и вы будете ми людие:

¹³аз есмь Господь Бог ваш, изведый вас из земли египетския, сущым вам рабом: и сокруших узы ярма вашего, и изведох вас со дерзновением.

¹⁴Аше же не послушаете мене, ниже сотворите повелений моих сих,

¹⁵но ни покоритеся им, и о судбах моих вознегодует душа ваша, яко не творити вам всех заповедий моих, яко разорити завет мой,

¹⁶и аз сотворю сице вам, и наведу на вас скудость и красту, и желтяницу вреждающую очи ваша и душы вашя истаевающую: и посеете вотще семена ваша, и поядят я супостаты вашя:

¹⁷и утвержу лице мое на вас, и падете пред враги вашими, и поженут вы ненавидящии вас, и побегнете ни комуже гонящу вас.

¹⁸И аще до сего не послушаете мене, и приложу наказати вы язвами седмижды за грехи вашя:

¹⁹и сокрушу досаждение гордыни вашея, и положу небо вам аки железно, и землю вашу аки медяну:

²⁰и будет вотще крепость ваша, и не даст земля ваша семене своего, и древа села вашего не дадут плода своего.

²¹И аще по сих пойдете страною и не восхощете послушати мене, приложу вам язв седмь по грехом вашым,

²²и послю на вы звери лютыя земныя, и изядят вы и потребят скоты вашя, и умалены сотворю вы, и пусты будут путие ваши.

²³И аще сими не накажетеся, но пойдете ко мне страною,

²⁴пойду и аз с вами в ярости страною, и поражу вы и аз седмижды грех ради ваших,

²⁵и наведу на вы мечь мстяй месть завета, и вбегнете в грады вашя: и послю на вы смерть, и предани будете в руце враг ваших:

²⁶внегда скорбети вам скудостию хлебов, и испекут десять жен хлебы вашя в пещи единей, и отдадят хлебы вашя весом, и ясти будете, и не насытитеся.

²⁷Аще же в сих не послушаете мене и пойдете ко мне страною,

²⁸и аз пойду с вами в ярости страною, и накажу вы аз седмижды по грехом вашым:

²⁹и ясти будете плоти сынов ваших, и плоти дщерей ваших ясти имате,

³⁰и сотворю пустая капища ваша и потреблю древяная рукотворения ваша, и положу трупы вашя на трупех кумир ваших, и возненавидит вас душа моя:

³¹и сотворю грады вашя пусты, и опустошу святая ваша, и не обоняю вони жертв ваших:

³²и сотворю пусту аз землю вашу, и удивятся о ней врази ваши, живущии на ней:

³³и разсыплю вы в языки, и потребит вы находяй мечь, и будет земля ваша пуста, и грады ваши будут пусты.

³⁴Тогда возблаговолит земля субботы своя, во вся дни запустения своего, и вы будете в земли враг ваших: тогда воспразднует земля и возблаговолит субботы своя:

³⁵во вся дни опустения своего воспразднует, яже не празднова в субботах ваших, егда живясте на ней.

³⁶И оставльшымся от вас вложу страх в сердца их в земли враг их, и поженет их глас листа летяща, и побегнут яко бежащии от рати, и падут ни кимже гоними.

³⁷И презрит брат брата аки на рати, ни кому нападающу, и не возможете противустати врагом вашым:

³⁸и погибнете в языцех, и потребит вас земля враг ваших.

³⁹И оставльшиися от вас истлеют за грехи своя и за грехи отец своих, в земли враг своих истают,

⁴⁰и исповедят грехи своя и грехи отец своих, яко преступиша и презреша мя, и яко ходиша предо мною страною:

⁴¹и аз пойду с ними в ярости страною и погублю их в земли врагов их: тогда усрамится сердце их необрезаное и тогда познают грехи своя:

⁴²и помяну завет иаковль и завет исааков, и завет авраамль помяну,

⁴³и землю помяну, и земля останется от них. Тогда приимет земля субботы своя, внегда опустети ей их ради: и они приимут своя беззакония, ихже ради презреша судбы моя, и о повелениих моих вознегодова душа их:

⁴⁴обаче сущым им в земли врагов своих, не презрех их, ниже вознегодовах о них, яко потребити я и разорити завет мой иже к ним: аз бо есмь Господь Бог их.

⁴⁵И помяну завет их первый, егда изведох их из земли египетския, из дому работы пред языки, еже быти мне Богу их: аз есмь Господь.

⁴⁶Сия судбы моя и повеления моя, и закон, егоже даде Господь между собою и между сыны израилевы, на горе синайстей, рукою моисеовою.