Read Елизаветинская Библия, 1751 Левит 6 Bible Online

Левит 6 - Елизаветинская Библия, 1751 bible

Левит 6

¹И рече Господь к моисею, глаголя:

²душа яже аще согрешит, и презрев презрит заповеди Господня, и солжет к другу о вдании, или о общине, или о хищении, или преобиде чим ближняго,

³или обрете погубленое, и солжет о нем, и кленется в неправду о единем от всех, яже аще сотворит человек яко согрешити в них:

⁴и будет егда согрешит и преступит, и отдаст похищеное, еже похити, или обиду, еюже преобиде, или вдание, еже вдано бысть ему, или погибшее, еже обрете:

⁵от всякия вещи, еяже ради кляся в неправду, и да отдаст самое то истое, и пятую часть свою приложит ктому: егоже есть, тому да отдаст, в оньже день обличится:

⁶и о преступлении своем да принесет Господу овна от овец непорочна, ценою в немже прегреши:

⁷и да помолится жрец о нем пред Господем, и оставится ему за едино от всех, яже сотвори и преступи в нем.

⁸И рече Господь к моисею, глаголя:

⁹заповеждь аарону и сыном его, глаголя: сей закон всесожжения: сие всесожжение на горении его на олтари всю нощь до заутра, и огнь олтаря да горит на нем, и не угасает:

¹⁰и да облечется жрец в срачицу льняну, и надраги льняны да возвлечет на тело свое, и да изнесет принос, егоже аще изжжет огнь всесожжения от олтаря, и да поставит близ олтаря:

¹¹и да совлечет ризы своя, и да облечется в ризы ины, и да изнесет принос вне полка на место чисто:

¹²и огнь на олтари да горит на нем и не угасает: и да возжжет на нем жрец дрова по вся утра, и да возкладет нань всесожжение, и да возложит нань тук спасения:

¹³и огнь всегда да горит на олтари, не угасает:

¹⁴сей закон жертвы, юже принесут сынове аарони жерцы пред Господем, прямо олтаря:

¹⁵и да возмет от него (жрец) горсть муки пшеничны жертвенныя с елеем ея и со всем ливаном ея, сущими на жертве: и да вознесет на олтарь принос в воню благовония, в память ея Господу:

¹⁶оставшееся же от нея снест аарон и сынове его: пресна да снедятся в месте святе, в притворе скинии свидения да снедят я:

¹⁷да не испечется квасна: часть сию дах им от приносов Господних: святая святых суть, якоже еже о гресе, и якоже еже о преступлении:

¹⁸всяк мужеск пол жреческ да снедят ю: законно вечно в роды вашя от принос Господних: всяк, иже аще прикоснется им, освятится.

¹⁹И рече Господь к моисею, глаголя:

²⁰сей дар аарону и сыном его, егоже принесут Господу в день, в оньже аще помажеши его: десятую часть меры ефи муки пшеничны в жертву всегда, пол ея заутра и пол ея в вечер:

²¹на сковраде в елеи да сотворится, спряжену да принесет ю витую жертву от укрухов, жертву в воню благовония Господу:

²²жрец помазанный, иже вместо его от сынов его, да сотворит ю: законно вечно, все да совершится:

²³и всяка жертва жреческа всесожженна да будет и да не снестся.

²⁴И рече Господь Бог моисею, глаголя:

²⁵рцы аарону и сыном его, глаголя: сей закон согрешения: на месте, на немже закалают всесожжения, да закалают яже греха ради пред Господем: святая (бо) святых суть:

²⁶жрец приносяй ю да снест ю: в месте святе да снестся, в притворе скинии свидения:

²⁷всяк прикасайся мяс ея освятится: и емуже аще воскропится от крове ея на ризу, яже аще воскропится на ню, да исперется на месте святе:

²⁸и сосуд глинян, в немже варится, да разбиется: аще же в медян сосуде сварится, да изтрет его, и измыет водою:

²⁹всяк мужеск пол в жерцех да снест ю: святая (бо) святых суть Господу:

³⁰и вся, яже от гресе аще принесутся от крове их в скинию свидения, ко очищению во святыни, да не снедятся, огнем да сожгутся.