Read Елизаветинская Библия, 1751 Левит 8 Bible Online

Левит 8 - Елизаветинская Библия, 1751 bible

Левит 8

¹И рече Господь к моисею, глаголя:

²поими аарона и сыны его, и ризы его, и елей помазания, и телца иже за грех, и два овна, и кошницу опресноков,

³и весь сонм собери пред двери скинии свидения.

⁴И сотвори моисей, якоже повеле ему Господь: и собра сонм пред двери скинии свидения.

⁵И рече моисей к сонму: сие есть слово, еже завеща Господь сотворити.

⁶И приведе моисей аарона и сыны его и измы я водою:

⁷и облече его в срачицу, и опояса его поясом, и облече его в исподнюю ризу, и возвлече нань верхнюю ризу:

⁸и опояса его по устроению ефуда, и стисне его им: и возложи нань слово, и возложи на слово явление и истину:

⁹и возложи увясло на главу его, и возложи на увясло против лица его дщицу златую освященную святую, якоже повеле Господь моисею.

¹⁰И взя моисей от елеа помазания,

¹¹и воскропи от него на олтарь седмижды, и помаза олтарь и освяти его и вся сосуды его, и умывалницу и стояло ея, и освяти я, и помаза скинию и вся сосуды ея, и освяти ю,

¹²и возлия моисей от елеа помазания на главу аароню, и помаза его, и освяти его.

¹³И приведе моисей сыны аарони, и облече я в срачицы, и опояса я поясы, и возложи на ня клобуки, якоже повеле Господь моисею.

¹⁴И приведе моисей телца иже за грех, и возложи аарон и сынове его руки на главу телца иже за грех,

¹⁵и закла его ю взя моисей от крове, и возложи на роги олтаря окрест перстом, и очисти олтарь: и кровь пролия на стояло олтаря, и освяти его, еже молитися у него.

¹⁶И взя моисей весь тук иже на утробе, и препонку яже на печени, и обе почки, и тук иже на них, и вознесе моисей на олтарь:

¹⁷телца же и кожу его, и мяса его и мотылы его, сожже я огнем вне полка, якоже повеле Господь моисею.

¹⁸И приведе моисей овна иже во всесожжение, и возложи аарон и сынове его руки своя на главу овню.

¹⁹И закла моисей овна, и пролия моисей кровь на олтарь окрест:

²⁰овна же раздроби на уды его, и вознесе моисей главу и уды и тук, и утробу и ноги измы водою:

²¹и вознесе моисей всего овна на олтарь: всесожжение есть в воню благовония: принос есть Господу, якоже заповеда Господь моисею.

²²И приведе моисей овна втораго, овна совершения: и возложи аарон и сынове его руки своя на главу овню,

²³и закла его: и взя моисей от крове его, и возложи на край уха аароня деснаго, и на край руки его десныя, и на край ноги его десныя.

²⁴И приведе моисей сыны аарони, и возложи моисей от крове на край ушес их десных, и на край рук их десных, и на край ног их десных: и пролия моисей кровь на олтарь окрест:

²⁵и взя моисей тук и чресла, и тук иже на утробе, и препонку печени, и обе почки, и тук иже на них, и рамо десное,

²⁶и от кошницы совершения, яже есть пред Господем, и взя хлеб един пресный, и хлеб елеен един, и опреснок един, и возложи на тук, и рамо десное:

²⁷и возложи вся на руце аарони и на руце сынов его, и вознесе я участие пред Господа.

²⁸И взя моисей от рук их и вознесе на олтарь на всесожжение совершения, еже есть воня благоухания: принос есть Господу.

²⁹И взем моисей грудь, отлучи ю возложение пред Господем от овна совершения: и бысть моисею в масть, якоже заповеда Господь моисею.

³⁰И взя моисей от елеа помазания и от крове яже на олтари, и воскропи на аарона и на ризы его, и на сыны его и на ризы сынов его с ним: и освяти аарона и ризы его, и сыны его и ризы сынов его с ним.

³¹И рече моисей аарону и сыном его: сварите мяса во дворе скинии свидения на месте святе, и тамо да снесте я, и хлебы иже в кошнице совершения, якоже заповедано бысть мне глаголя: аарон и сынове его да снедят я:

³²и останок мяс и хлебов на огни да сожжете:

³³и из дверий скинии свидения да не изыдете седмь дний, дондеже день скончается, день совершения вашего: в седмь бо дний совершит руки вашя:

³⁴якоже сотвори в день сей, в оньже заповеда Господь сотворити, яко молитися о вас:

³⁵и у дверий скинии свидения седите седмь дний, день и нощь, и сохраните повеления Господня, да не умрете: тако бо заповеда мне Господь Бог.

³⁶И сотвори аарон и сынове его вся словеса, яже завеща Господь моисею.