Read Елизаветинская Библия, 1751 Иеремия 16 Bible Online

Иеремия 16 - Елизаветинская Библия, 1751 bible

Иеремия 16

¹И бысть слово Господне ко мне, рекущее: и ты да не поймеши жены,

²и не родится тебе сын, ниже дщерь на месте сем.

³Яко сия глаголет Господь от сынех и дщерех, иже родятся на месте сем, и о матерех их, яже родиша их, и о отцех их родивших я в земли сей:

⁴смертию лютою изомрут, не оплачутся и не погребутся: во образ на лицы земли будут и мечем падут и гладом скончаются, и будут трупие их во снедь птицам небесным и зверем земным.

⁵Сия глаголет Господь: да не внидеши в дом их пирный, ни да ходиши плакати, ниже да рыдаеши их, понеже отях мир мой от людий сих, рече Господь, милость и щедроты.

⁶И умрут велицыи и малии в земли сей: не погребутся, ни оплачутся, ниже терзание о них будет, ниже обриются ради их,

⁷и не преломят хлеба во стенании их ко утешению над мертвым, и не дадут им пития чаши ко утешению над отцем и материю их.

⁸И в дом пирный да не внидеши седети с ними, еже ясти и пити.

⁹Понеже сия глаголет Господь сил, Бог израилев: се, аз отиму от места сего во очию вашею и во днех ваших глас радости и глас веселия, глас жениха и глас невесты.

¹⁰И будет, егда возвестиши людем сим вся словеса сия, и рекут к тебе: вскую глаголал есть Господь на нас вся злая сия? кая неправда наша? и кий грех наш, имже согрешихом Господу Богу нашему?

¹¹И речеши к ним: понеже оставиша мя отцы ваши, глаголет Господь, и идоша вслед богов чуждих, и послужиша им и поклонишася им, мене же оставиша и закона моего не сохраниша:

¹²и вы горше деласте, неже отцы ваши, и се, вы ходите кийждо вслед похотей сердца вашего лукаваго, еже не слушати мене:

¹³и изрину вас от земли сея в землю, еяже не весте вы и отцы ваши, и послужите тамо богом чуждим день и нощь, иже не дадут вам милости.

¹⁴Сего ради, се, дние грядут, глаголет Господь, и не рекут ктому: жив Господь, иже изведе сынов израилевых от земли египетския:

¹⁵но: живет Господь, иже изведе сынов израилевых от земли северныя и от всех стран, аможе извержени быша: и возвращу их в землю их, юже дах отцем их.

¹⁶Се, аз послю рыбари многи, рече Господь, и уловят их: и посем послю многи ловцы, и уловят их на всяцей горе и на всяцем холме и от пещер каменных.

¹⁷Яко очи мои на всех путех их, не сокровени суть от лица моего, и не утаена суть беззакония их от очию моею.

¹⁸И воздам первее сугубая беззакония и грехи их, имиже оскверниша землю мою в мертвечинах мерзостей своих и в беззакониих своих, имиже наполниша достояние мое.

¹⁹Господи, ты крепость моя и помощь моя и прибежище мое во днех злых: к тебе языцы приидут от последних земли и рекут: воистинну лживых стяжаша отцы наши идолов, и несть в них пользы.

²⁰Еда сотворит себе человек боги, и тии не суть бози?

²¹Сего ради, се, аз покажу им во время сие руку мою и знаему сотворю им силу мою, и познают, яко имя мне Господь.