Read Елизаветинская Библия, 1751 Иеремия 18 Bible Online

Иеремия 18 - Елизаветинская Библия, 1751 bible

Иеремия 18

¹Слово, еже бысть ко иеремии от Господа, рекущее:

²востани и сниди в дом скудельничь, и тамо услышиши словеса моя.

³И снидох в дом скудельничь, и се, той творяше дело на каменех.

⁴И разбися сосуд, егоже той творяше от глины рукама своима: и паки той сотвори из него иный сосуд, якоже угодно во очию его творити.

⁵И бысть слово Господне ко мне, рекущее:

⁶еда, якоже скудельник сей, не возмогу сотворити вас, доме израилев? рече Господь: се, якоже брение в руку скудельника, тако вы есте, доме израилев, в руку моею:

⁷наконец возглаголю на язык и на царство, да искореню их и разорю и расточу я:

⁸и аще обратится язык той от всех лукавств своих, то раскаюся о озлоблениих, яже помыслих сотворити им:

⁹и наконец реку на язык и царство, да возсозижду и насажду я,

¹⁰и аще сотворят лукавая пред очима моима, еже не послушати гласа моего, то раскаюся о благих, яже глаголах сотворити им.

¹¹И ныне рцы ко мужем иудиным и обитателем Иерусалима, рекий: сия рече Господь: се, аз творю на вас злая и мышлю на вас умышление: да обратится убо кийждо от пути своего лукаваго, и исправите пути вашя и умышления ваша.

¹²И рекоша: укрепимся, ибо по развращением нашым пойдем, и кийждо угодное сердца своего лукаваго сотворим.

¹³Сего ради сия глаголет Господь: вопросите ныне языков, кто слыша сицевая страшная, яже сотвори зело дева израилева?

¹⁴еда оскудеют от камене сосцы, или снег от ливана? еда уклонится вода зелно ветром носимая?

¹⁵понеже забыша мене людие мои всуе жруще, и изнемогут на путех своих и на стезях вечных, еже взыти на стези не имущыя пути на хождение,

¹⁶еже положити землю свою в запустение и во звиздание вечное: всяк, иже прейдет по ней, почудится и покивает главою своею:

¹⁷якоже ветр палящь разсею их пред враги их, хребет, а не лице покажу им в день погибели их.

¹⁸И рекоша: приидите и умыслим на иеремию совет, ибо не погибнет закон от священника, ни совет от премудраго, ни слово от пророка: приидите и поразим его языком, и не вонмем всем словесем его.

¹⁹Вонми, Господи, мне и услыши глас оправдания моего.

²⁰Еда воздаются злая за благая? яко глаголаша словеса на душу мою и мучителство свое сокрыша ми. Помяни стоявшаго мя пред тобою, еже глаголати за них благая, да отвращу гнев твой от них.

²¹Сего ради даждь сыны их в глад и собери их в руце меча: да будут жены их безчадны и вдовы, и мужие их да будут убиени смертию, и юноши их да падут мечем на рати:

²²да будет вопль в домех их: наведи на них разбойники внезапу, понеже совещаша слово, да имут мя, и сети скрыша на мя.

²³Ты же, Господи, веси весь совет их на мя в смерть: да не очистиши беззакония их и грехов их от лица твоего да не изгладиши: да будет болезнь их пред тобою, и во время ярости твоея сотвори им.