Read Елизаветинская Библия, 1751 Иеремия 25 Bible Online

Иеремия 25 - Елизаветинская Библия, 1751 bible

Иеремия 25

¹Слово, еже бысть ко иеремии на вся люди иудины, в лето четвертое иоакима сына иосиина, царя иудина: то лето первое навуходоносора царя вавилонскаго:

²еже глагола иеремиа пророк ко всем людем иудиным и ко всем обитателем Иерусалима, рекий:

³в третиенадесять лето иосии сына амосова, царя иудина, и даже до дне сего, сие двадесять третие лето, бысть слово Господне ко мне, и глаголах к вам, заутра востая и глаголя: и не слышасте.

⁴И посылаше Господь к вам всех раб своих пророк, востая заутра и посылая: и не слышасте, ни приклонисте ушес ваших, да слышите, егда глаголаше:

⁵отвратитеся кийждо от пути своего злаго и от злейших умышлений ваших, и обитати будете в земли, юже Господь даде вам и отцем вашым, от века даже и до века:

⁶и не ходите вслед богов чуждих, еже служити им и покланятися им, да не прогневаете мя в делех рук ваших, еже озлобити вас.

⁷И не послушасте мя, рече Господь, еже не подвизати мя ко гневу в делех руку вашею на зло вам.

⁸Сего ради сия глаголет Господь сил: понеже не послушасте словес моих,

⁹се, аз послю и возму вся племена северска, (рече Господь,) и навуходоносора царя вавилонска раба моего: и приведу их на землю сию и на обитатели ея и на вся языки, иже окрест ея, и убию их и поставлю их во ужас и во звиздание и в поношение вечное:

¹⁰и погублю от них глас радости и глас веселия, глас жениха и глас невесты, благоухание мира и свет светилника:

¹¹и будет вся земля сия в запустение и во ужас, и поработают сии во языцех царю вавилонску седмьдесят лет.

¹²Егда же исполнени будут седмьдесят лет, посещу на царя вавилонска и на язык оный, рече Господь, беззакония их, и на землю халдейску, и положу тую в запустение вечное,

¹³и наведу на землю ону вся словеса моя, яже глаголах на ню, вся писанная в книзе сей, и елика пророчествова иеремиа на вся языки:

¹⁴яко работаша им, егда беша языцы мнози и царие велицы, и воздам им по делом их и по творению рук их,

¹⁵елико прорече иеремиа до всех стран: тако бо глаголет Господь Бог израилев: возми чашу вина нераствореннаго от руки моея, да напоиши вся языки, к нимже аз послю тя.

¹⁶И испиют и изблюют, и обуяют от лица меча, егоже аз послю среде их.

¹⁷И взях чашу от руки Господни и напоих вся языки, к нимже посла мя Господь:

¹⁸Иерусалима и грады иудины, и цари его и князи его, яко положити я во опустение и в непрохождение, и во звиздание и в проклятие, яко день сей,

¹⁹и фараона царя египетскаго и отроков его, и вельможы его и вся люди его

²⁰и вся примесники его, и вся цари земли ус и вся цари иноплеменников, аскалона и газу, и аккарона и останок азота,

²¹и идумею и моавитиду и сыны аммони,

²²и вся цари т¦рски и цари сидонски и цари, иже об ону страну моря,

²³и дедана и фемана, и роса и всякаго остриженаго по лицу его,

²⁴и вся цари аравии и вся смесники обитающыя в пустыни,

²⁵и вся цари замврийския и вся цари еламския, и вся цари персския

²⁶и вся цари от восточия, дальния и ближния, коегождо ко брату его, и вся царства, яже на лицы земли, и царь сесах испиет последи их.

²⁷И речеши им: тако рече Господь сил, Бог израилев: пийте и упийтеся, и изблюйте и падите, и не востаните от лица меча, егоже аз послю среде вас.

²⁸И будет, егда не восхотят прияти чаши от руки твоея, еже пити, речеши к ним: тако рече Господь: пиюще пийте.

²⁹Яко во граде, в немже именовася имя мое, аз начну озлобляти, и вы очищением не очиститеся: понеже мечь аз призываю на вся седящыя на земли, рече Господь сил.

³⁰Ты же проречеши на них вся словеса сия и речеши: Господь с высоты суд воздаст, от святаго своего даст глас свой, слово проречет на место свое, сии же яко о‹емлюще виноград отвещают: и на вся седящыя на земли прииде пагуба,

³¹на часть земли, яко суд во языцех гдоу: судитися имать той со всякою плотию, нечестивии же предани быша мечу, глаголет Господь.

³²Тако глаголет Господь: се, злая грядут от языка на язык, и вихорь велик исходит от конца земли.

³³И будут язвении от Господа в день Господень, от края земли и до края земли: не оплачутся, ниже соберутся и не погребутся, в гной на лицы земли будут.

³⁴Воскликните, пастуси и возопийте, и восплачите, овни овчии, яко исполнишася дние ваши на заколение, и падете якоже овни избраннии,

³⁵и изгибнет бегство от пастухов и спасение от овнов овчих.

³⁶Глас вопля пастырска и кличь овец и овнов, яко потреби Господь пажити их:

³⁷и умолкнут останцы мира от лица ярости гнева Господня.

³⁸Остави якоже лев виталище свое, яко бысть земля их в непрохождение от лица меча великаго.