Read Елизаветинская Библия, 1751 Иеремия 27 Bible Online

Иеремия 27 - Елизаветинская Библия, 1751 bible

Иеремия 27

¹В начале царства иоакима сына иосиина, царя иудина, бысть слово сие ко иеремии от Господа глаголя:

²тако рече Господь: сотвори себе узы и клады и возложи на выю свою,

³и да послеши я ко царю идумейску и ко царю моавску и ко царю сынов аммоних, и ко царю тирску и ко царю сидонску, в руку послов их идущих сретением своим во Иерусалим ко седекии царю иудину,

⁴и завещай им ко господем их рещи: тако рече Господь Бог израилев: тако рцыте ко господем своим:

⁵аз сотворих землю и человека и скоты, яже на лицы земли, крепостию моею великою и мышцею моею высокою, и дам ю, емуже будет угодно пред очима моима.

⁶И ныне аз дах всю землю сию в руце навуходоносору царю вавилонску, да ему работают, и звери селныя дах делати ему:

⁷и послужат ему вси языцы и сыну его и сыну сына его, дондеже приидет время земли его и его самого, и послужат ему мнози народи и царие велицы:

⁸страна же и царство, елицы аще не поработают царю вавилонску и елицы не вдежут выи своея в ярем царя вавилонска, мечем и гладом посещу их, рече Господь, дондеже скончаются в руце его.

⁹Вы же не слушайте лжепророк ваших и волхвующих вам и видящих сония вам, ни чарований ваших, ни обаятелей ваших глаголющих: не послужите царю вавилонскому:

¹⁰яко лжу прорицают тии вам, еже бы удалитися вам от земли вашея, извергнути вас и еже погибнути вам.

¹¹Страна же, яже склонит выю свою под ярем царя вавилонска и послужит ему, оставлю ю на земли своей, глаголет Господь: и орати будет ю и вселится на ней.

¹²И ко седекии царю иудину глаголах по всем словесем сим, глаголя: склоните выи вашя под иго царя вавилонска и служите ему и людем его, и живи будете:

¹³почто умираете, ты и людие твои, мечем и гладом и мором, якоже рече Господь ко странам, не хотевшым служити царю вавилонску?

¹⁴не послушайте слов пророков глаголющих вам: не послужите царю вавилонску:

¹⁵яко неправедно тии прорицают вам: яко не послах их, рече Господь, тии же прорицают именем моим о неправде, еже бы погубити вас, и погибнете вы и пророцы ваши, прорицающии вам о неправде ложная.

¹⁶Вам и всем людем сим и жерцем глаголах, рекий: тако рече Господь: не слушайте словес пророческих, прорицающих вам лжу и глаголющих: се, сосуди дому Господня возвратятся от вавилона ныне вскоре: яко лжу прорицают вам,

¹⁷не послушайте их, но служите царю вавилонскому, да живи будете. Вскую даете град сей в запустение?

¹⁸Аще суть пророцы и есть слово Господне в них, да предстанут гдоу вседержителю, да не отидут сосуди, оставшиися в дому Господни и в дому царя иудина и во Иерусалиме, в вавилон.

¹⁹Тако бо глаголет Господь вседержитель о столпех и о умывалнице, и о подставах и о прочих сосудех оставшихся во граде сем,

²⁰ихже не взя навуходоносор царь вавилонский, егда пресели иехонию сына иоакимова, царя иудина, из Иерусалима в вавилон, и вся старейшины иудины и Иерусалимли.

²¹Тако бо глаголет Господь вседержитель Бог израилев о сосудех оставшихся в дому Господни и в дому царя иудина и в Иерусалиме:

²²в вавилон принесутся и тамо будут даже до дне посещения своего, глаголет Господь: и повелю принести я и возвратити на место сие.