Read Елизаветинская Библия, 1751 Иеремия 28 Bible Online

Иеремия 28 - Елизаветинская Библия, 1751 bible

Иеремия 28

¹И бысть в четвертое лето, царствующу седекии царю иудину, в пятый месяц, рече ми ананиа сын азоров лживый пророк таваонитский в дому Господни, пред очима жерцев и всех людий, глаголя:

²тако рече Господь вседержитель Бог израилев: сокруших ярем царя вавилонска:

³еще два лета дний, возвращу аз на место сие вся сосуды дому Господня, яже взя навуходоносор царь вавилонский от места сего и пренесе я до вавилона,

⁴и иехонию сына иоакимова царя иудина, и все преселение иудино вшедшее в вавилон возвращу в место сие, глаголет Господь, яко сокрушу ярем царя вавилонска.

⁵И рече иеремиа пророк ко анании лжепророку пред очима жерцев и пред очима всех людий стоящих в дому Господни,

⁶и рече иеремиа: поистинне тако да сотворит Господь, да утвердит Господь слово твое, еже ты прорицаеши, еже возвратити сосуды дому Господня и вся преселенныя из вавилона на место сие:

⁷обаче слышите слово сие, еже аз глаголю во ушы ваши и во ушы всех людий:

⁸пророцы, бывшии прежде мене и прежде вас от века, прорекоша на многи земли и на царства велика о рати и о погублении и о гладе:

⁹пророк прорекий мир, пришедшу слову познают пророка, егоже посла им Господь в вере.

¹⁰И взя ананиа пред очима всех людий клады от выи иеремиины и сокруши я.

¹¹И рече ананиа пред очима всех людий глаголя: сице рече Господь: тако сокрушу ярем навуходоносора царя вавилонска еще два лета дний со выи всех языков. И отиде иеремиа на путь свой.

¹²И бысть слово Господне ко иеремии, по сокрушении ананиине клад со выи его, глаголя:

¹³иди и рцы ко анании глаголя: тако рече Господь: клады древяныя сокрушил еси и сотвориши вместо тех клады железны,

¹⁴яко тако рече Господь: ярем железен возложих на выи всех языков, служити навуходоносору царю вавилонску, и послужат ему: ктому и звери земныя дах ему.

¹⁵И рече иеремиа пророк ко анании: слыши, анание: не посла тебе Господь, ты же сотворил еси людий сих уповати на неправду.

¹⁶Того ради сице рече Господь: се, аз отпущу тя от лица земли, в сем лете умреши, яко на Господа (Бога) глаголал еси.

¹⁷И умре ананиа лжепророк в сем лете месяца седмаго.