Read Елизаветинская Библия, 1751 Иеремия 3 Bible Online

Иеремия 3 - Елизаветинская Библия, 1751 bible

Иеремия 3

¹Аще отпустит муж жену свою, и отидет от него и будет мужу иному, еда возвращающися возвратится к нему паки? еда непорочна будет и неосквернена жена та? Ты же соблудила еси с пастырьми многими, и возвращалася еси и ко мне, глаголет Господь.

²Воздвигни очи твои на правоту и виждь, где не смесилася еси? На путех сидела еси аки врана особящаяся и осквернила еси землю в любодеяниих и в лукавствех твоих,

³и имела еси пастырей многих в претыкание себе: лице жены блудницы бысть тебе, не хотела еси постыдетися ко всем.

⁴Не аки ли домом мене нарекла еси и отцем и вождем девства твоего?

⁵еда пребудет во век, или сохранится в победу? Сия глаголала еси, и сотворила еси злая, и возмогла еси.

⁶И рече Господь ко мне во дни иосии царя: видел ли еси, яже сотвори ми дом израилев? поидоша на всяку гору высоку и под всяко древо листвяно и соблудиша тамо.

⁷И рекох по внегда прелюбодействовати ему во всех сих: ко мне обратися. И виде преступление его преступница иудеа сестра его..

⁸И видех, яко о всех (изобличен есть), в нихже ят бысть, в нихже любодействова дом израилев: сего ради отпустих и и дах ему книгу распустную в руце его. Обаче не убояся преступница иудеа (сестра его), но иде и соблудила есть и та:

⁹и бысть ни во что блуд ея, и оскверни землю, и соблудила есть с каменем и со древом.

¹⁰И во всех сих не обратися ко мне преступница сестра ея иудеа от всего сердца своего, но во лжи, рече Господь.

¹¹И рече Господь ко мне: оправда душу свою отступница израиль, паче преступницы иудеи:

¹²иди, и прочти словеса та к северу, и речеши: обратися ко мне, доме израилев, рече Господь: и не утвержду лица моего на вас, яко милостив аз есмь, рече Господь, и не прогневаюся на вы во веки.

¹³Обаче веждь беззаконие твое, яко в Господа Бога твоего преступила еси, и расточила еси пути твоя чуждим под всяким древом листвяным, гласа же моего не послушала еси, рече Господь.

¹⁴Обратитеся, сынове отступившии, глаголет Господь: яко аз возобладаю вами и поиму вы единаго от града и двух от племене, и введу вас в сион

¹⁵и дам вам пастыри по сердцу моему, и упасут вас разумом и учением.

¹⁶И будет, егда умножитеся и возрастете на земли, глаголет Господь, во дни оны не рекут ктому: кивот завета святаго израилева: не взыдет на сердце, ни воспомянется, ниже посетится, ниже сотворится ктому.

¹⁷Во дни оны нарекут Иерусалима престол Господень, и соберутся к нему вси языцы во имя Господне во Иерусалим, и не пойдут ктому вслед похотей сердца своего злейшаго.

¹⁸Во днех тех приидет дом иудин ко дому израилеву, и пойдут вкупе от земли северныя и от всех стран к земли, юже дах в наследие отцем их.

¹⁹Аз же рех: да будет, Господи, яко положу тя в чада и дам тебе землю избранную, достояние Бога вседержителя языков: и рекох: Отцем наречете мя и от мене не отвратитеся.

²⁰Обаче якоже отвергается жена сожителя своего, тако отвержеся от мене дом израилев, рече Господь.

²¹Глас из устен слышан бысть плача и моления сынов израилевых, яко беззаконноваша в путех своих, забыша Господа Бога святаго своего.

²²Возвратитеся, сынове возвращаюшиися, и изцелю сокрушения ваша. Се, рабы мы будем тебе, ты бо еси Господь Бог наш.

²³Истинно лживи быша холми и множество гор, токмо Господем Богом нашим спасение израилево.

²⁴Студ же пояде труды отец наших, от юности нашея, овцы их и телцы их, и сыны их и дщери их.

²⁵Уснухом в постыдении нашем, и покры нас безчестие наше, яко Господу Богу нашему согрешихом, мы и отцы наши, от юности нашея даже до сего дне, и не послушахом гласа Господа Бога нашего.