Read Елизаветинская Библия, 1751 Иеремия 35 Bible Online

Иеремия 35 - Елизаветинская Библия, 1751 bible

Иеремия 35

¹Слово бывшее ко иеремии от Господа, во дни иоакима сына иосиина, царя иудина, глаголя:

²иди в дом рихавль и призови я и веди я в дом Господень, во един от дворов, и напоиши я вином.

³И изведох иезонию сына иеремиина, сына хавасиина, и братию его, и сыны его, и весь дом рихавль,

⁴и введох я в дом Господень, во хранилище имения сынов анании, сына годолиина, человека Божия, иже есть близ дому князей, выше дому маасеова, сына селомля, стрегущаго двор.

⁵И поставих пред ними корчаг вина и чашы, и рекох: пийте вино.

⁶И рекоша: не пием вина, яко ионадав сын рихавль, отец наш, заповеда нам, глаголя: не пийте вина вы и сынове ваши до века:

⁷и храмин да не соградите, и семене не сейте, и виноград да не будет вам, но в кушах да живете вся дни живота вашего, да поживете дни многи на земли, на нейже обитаете вы.

⁸И послушахом словесе ионадава отца нашего, еже не пити вина вся дни живота нашего, мы и жены нашя, и сынове наши и дщери нашя,

⁹и еже не сограждати храмин жити тамо: и винограда и нивы и семене не бысть нам.

¹⁰И жихом в кущах, и послушахом и сотворихом по всем, елика заповеда нам ионадав отец наш.

¹¹И бысть, егда прииде навуходоносор царь вавилонский на землю нашу, и рекохом: вшедше да внидем во Иерусалим от лица халдейска и от лица силы ассирийския: и вселихомся ту.

¹²И бысть слово Господне ко иеремии глаголя:

¹³тако глаголет Господь сил, Бог израилев: иди и рцы человеку иудину и живущым во Иерусалиме: еда не восприимете наказания послушати словес моих?

¹⁴Утвердиша слово сынове ионадава, сына рихавля, еже заповеда сыном своим, еже не пити вина, и не пиша даже до дне сего, яко послушаша заповеди отца своего: аз же глаголах к вам заутра, и не послушасте мене:

¹⁵и посылах к вам рабы моя пророки, утренюя и глаголя: обратитеся кийждо от пути своего злаго, и лучше сотворите дела своя, и не ходите вслед богов инех, еже служити им, и вселитеся на земли, юже дах вам и отцем вашым: и не приклонисте ушес ваших и не послушасте.

¹⁶И уставиша сынове ионадавли, сына рихавля, заповедь отца своего, юже заповеда им: а людие мои не послушаша мене.

¹⁷Сего ради сице рече Господь сил, Бог израилев: се, аз наведу на иуду и на вся живущыя во Иерусалиме вся злая, яже соглаголах на ня: понеже глаголах к ним, и не послушаша, призывах я, и не отвещаша ми.

¹⁸Дому же рихавлю рече иеремиа: тако рече Господь Бог вседержитель: понеже послушаша сынове ионадава, сына рихавля, заповеди отца своего, творити, елика заповеда им отец их:

¹⁹сего ради сия глаголет Господь сил, Бог израилев: не оскудеет муж от сынов ионадавлих, сына рихавля, стояй пред лицем моим, вся дни земли.