Read Елизаветинская Библия, 1751 Иеремия 36 Bible Online

Иеремия 36 - Елизаветинская Библия, 1751 bible

Иеремия 36

¹И бысть в лето четвертое иоакима, сына иосиина, царя иудина, бысть слово Господне ко иеремии глаголя:

²возми себе свиток книжный и напиши в нем вся словеса, яже соглаголах к тебе на израиля и на иуду и на вся языки, от негоже дне глаголах к тебе, от дне иосии царя иудина и до сего дне:

³негли услышит дом иудин вся злая, яже аз помышляю сотворити им, да отвратятся от пути своего злаго, и милостив буду неправдам их и грехом их.

⁴И призва иеремиа варуха, сына нириина: и вписа варух от уст иеремииных вся словеса Господня, яже соглагола к нему, во свиток книжный.

⁵И заповеда иеремиа варуху глаголя: мене стрегут, и не могу внити в дом Господень,

⁶ты убо вниди и прочти во свитце сем, в немже написал еси от уст моих словеса Господня, во ушы людий в дому Господни в день поста и во ушы всему дому иудину, приходящым от градов своих, да прочтеши им:

⁷негли падет молитва их пред лицем Господним, и отвратятся от пути своего злаго: яко велика ярость и гнев Господень, егоже соглагола на люди сия.

⁸И сотвори варух сын нириин но всему, елика заповеда ему иеремиа пророк прочести во книзе словеса Господня в дому Господни.

⁹И бысть в пятое лето иоакима царя иудина, в девятый месяц, заповедаша пост пред лицем Господним всем людем во Иерусалиме и всему множеству, еже снидеся от градов иудиных во Иерусалим.

¹⁰И прочте варух во книзе словеса иеремиина в дому Господни, в дому гамариеве, сына сафаня книгочия, во дворе вышнем, во преддверии врат дому Господня новых, во ушы всех людий.

¹¹И слыша михей сын гамариев, сына сафаня, вся словеса Господня от книги.

¹²И сниде в дом царев, в дом книжника, и се, тамо вси князи седяху, елисам книгочий и далеа сын селемиев, и нафан сын аховоров и гамариа сын сафань, и седекиа сын ананиин и вси князи,

¹³и возвести им михей вся словеса, яже слыша чтуща варуха во ушы людем.

¹⁴И послаша вси князи ко варуху сыну нириину, иудину сыну нафаниину, сына селемиина, сына хусиина, глаголюще: книгу, юже ты чтеши во ушы людем, возми ю в руку свою и прииди. И взя варух сын нириин книгу в руку свою и сниде к ним.

¹⁵И рекоша ему: паки прочти во ушы наши. И прочте варух во ушы их.

¹⁶И бысть яко услышаша вся словеса, совещашася кийждо со ближним своим и реша варуху: возвещающе возвестим царю вся словеса сия.

¹⁷И вопросиша варуха, глаголюще: откуду еси вписал вся словеса сия?

¹⁸И рече варух: от уст своих поведа ми иеремиа вся словеса сия, аз же писах в книгу.

¹⁹И рекоша князи варуху: иди и скрыйся ты и иеремиа, и человек да не увесть, где вы.

²⁰И внидоша ко царю во двор, книгу же вдаша хранити в дому елисама книгочия, и возвестиша царю вся словеса сия.

²¹И посла царь иудина взяти книгу. И взя ю от дому елисамы книгочия, и прочте иудин во ушы царевы и во ушы всех князей стоящих окрест царя.

²²Царь же седяше во храмине зимней, в девятый месяц, и поставлено бе пред ним огнище со огнем.

²³И бысть чтущу иудину третий лист и четвертый, раздроби я бритвою книгочия и возметаше на огненное огнище, дондеже скончася весь свиток на огненнем огнищи.

²⁴И не ужасошася и не растерзаша риз своих царь и вси отроцы его, слышавшии вся словеса сия.

²⁵Елнафан же и далеа, и гамариа и годолиа глаголаша царю, еже бы не сожещи свитка. И не послуша их.

²⁶И повеле царь иеремеилу сыну цареву и сараеви сыну езриилеву и селемию сыну авдеилеву, да изымают варуха книгочия и иеремию пророка. Но сокры я Господь.

²⁷И бысть слово Господне ко иеремии, егда сожже царь свиток, вся словеса, яже вписа варух от уст иеремииных, глаголя:

²⁸паки возми ты свиток другий и впиши вся словеса бывшая во свитце, яже сожже царь иоаким:

²⁹и ко иоакиму царю иудину речеши: тако рече Господь: ты сожегл еси сию книгу, глаголя: почто вписал еси в ней, глаголя: входя внидет царь вавилонский и потребит землю сию, и потребятся от нея человецы и скоти?

³⁰Того ради сице рече Господь на иоакима царя иудина: не будет ему седящаго на престоле давидове, и будет тело его мертвое повержено на знои дневнем и на мразе нощнем:

³¹и посещу нань и на его род и на отроки его, и наведу нань и на живущыя во Иерусалиме и на землю иудину вся злая, яже соглаголах на ня, и не послушаша.

³²И взя варух свиток другий и вписа в нем от уст иеремииных вся словеса книги, яже сожже иоаким царь иудин: и еще приложишася ему словеса множайша неже первая.