Read Елизаветинская Библия, 1751 Иеремия 37 Bible Online

Иеремия 37 - Елизаветинская Библия, 1751 bible

Иеремия 37

¹И царствова седекиа сын иосиин вместо иехонии сына иоакимова, егоже постави навуходоносор царь вавилонский царствовати во иудеи.

²И не послуша той и отроцы его и людие земли словес Господних, яже глагола рукою иеремииною.

³И посла царь седекиа иоахала сына селемиина и софонию сына массеа жерца ко иеремии пророку, глаголя: молися за ны ко гдоу Богу нашему.

⁴Иеремиа же свободен прихождаше и прохождаше среде града, не введоша бо его во храмину темничную.

⁵И сила фараоня изыде из египта, и слышавше халдее облегшии Иерусалим слух их, отступиша от Иерусалима.

⁶И бысть слово Господне ко иеремии глаголя:

⁷тако рече Господь Бог израилев: тако речеши царю иудину, пославшему к тебе вопросити мя: се, сила фараоня, изшедшая вам на помощь, возвратится паки до земли египетския,

⁸и возвратятся халдее и повоюют град сей, и возмут его и пожгут его огнем.

⁹Яко тако рече Господь: не прельщайте душ своих, глаголюще: отходяше отидут от нас халдее: яко не отидут.

¹⁰И аще побиете всю силу халдеев воюющих на вы, и останут нецыи язвени, кийждо на месте своем, сии востанут и пожгут град сей огнем.

¹¹И бысть егда взыде сила халдейска от Иерусалима, от лица силы фараони,

¹²изыде иеремиа из Иерусалима ити в землю вениаминю, еже купити оттуду посреде людий.

¹³Внегда же быти ему во вратех вениаминих, и (бысть) тамо человек, у негоже обита саруиа сын селемиин, сына ананиина, и взя иеремию, глаголя: ко халдеем ты бежиши.

¹⁴И рече иеремиа: лжа, не ко халдеем аз бегу. И не послуша его. И взя саруиа иеремию и приведе его ко князем.

¹⁵И разгневашася князи на иеремию и биша его, и послаша его в дом ионафана книгочия, яко той сотвориша храминою темничною.

¹⁶И прииде иеремиа в дом рва и в херет, и седе ту дни многи.

¹⁷И посла седекиа царь и призва его, и вопрошаше его царь отай, аще есть слово от Господа? И рече ему иеремиа: есть. И рече: в руце царя и вавилонска предан будеши.

¹⁸И рече иеремиа царю: чим преобидех тя и отроки твоя и люди сия, яко ты вдаеши мя в дом темничный?

¹⁹и где суть пророцы ваши прорицавшии вам, глаголюще, яко не приидет царь вавилонский на вас и на землю сию?

²⁰ныне же послушай, молютися, господи мой, царю, да падет моление мое пред лицем твоим: и не посылай мя паки в дом ионафана книгочия, да не умру тамо.

²¹И повеле царь, и ввергоша его во храмину темничную, и даяху ему хлеб един на день извне, идеже пекут, дондеже скончашася хлебы из града. И седяше иеремиа во дворе темничнем.