Read Елизаветинская Библия, 1751 Иеремия 39 Bible Online

Иеремия 39 - Елизаветинская Библия, 1751 bible

Иеремия 39

¹И бысть в девятое лето седекии царя иудина, в месяц десятый, прииде навуходоносор царь вавилонский и вся сила его на Иерусалим, и воеваху нань.

²И в первоенадесять лето седекии, в месяц четвертый, в девятый день месяца, разседеся град.

³И внидоша вси князи царя вавилонска и седоша во вратех средних, ниргелсарасар, самагад, навусахар, навусарис, нагаргас, насерравамаг, и прочии воеводы царя вавилонскаго.

⁴И бысть егда узре я седекиа царь иудин и вси мужие ратнии, и избегоша, и изыдоша в нощи от града по пути вертограда царева и сквозе врата, яже беша между стеною и предстением: и изыдоша в путь пустыни.

⁵И гнаша вслед их воинство халдейско, и постигоша седекию и поли пустыни иерихонския, и емше приведоша к навуходоносору царю вавилонску во ревлаф, иже в земли емаф, и глагола к нему с судом.

⁶И изби царь вавилонский сыны седекиины во ревлафе пред очима его, и вся вельможы иудины поби царь вавилонский.

⁷И очи седекии изят, и окова его путы, и отведе его в вавилон.

⁸Дом же царев и домы всех людий пожгоша халдее огнем и стену Иерусалимску превратиша:

⁹и останок людий, и оставших во граде, и убегшыя, иже утекоша ко царю вавилонску, и останок людий, и оставших пресели навузардан воевода в вавилон:

¹⁰а от людий убогих, ничтоже имущих, остави навузардан воевода воинств в земли иудине, и даде им винограды и нивы в той день.

¹¹И заповеда навуходоносор царь вавилонский о иеремии пророце навузарданови воеводе воинств и рече:

¹²возми его и положи нань очи твои и ничтоже ему сотвори зла: но якоже восхощет, тако сотвори ему.

¹³Посла убо навузардан воевода воинства и навузезван, и рапсарис и ниргел, и сарасар и фавман, и вси воеводы царя вавилонска:

¹⁴и послаша, и пояша иеремию от двора темничнаго, и даша его годолии сыну ахикамову, сына сафаня, и изведоша его, и седе среде людий.

¹⁵И ко иеремии бысть слово Господне ко дворе темничнем глаголя:

¹⁶иди и рцы ко авдемелеху мурину, глаголя: тако рече Господь Бог израилев: се, аз приношу словеса моя на град сей во злая? а не во благая: и будут пред лицем твоим в той день:

¹⁷и избавлю тя в той день, и не дам тебе в руце человек, ихже ты боишися от лица их:

¹⁸яко избавляя спасу тя, и мечем не падеши: и будет душа твоя на обретение, яко уповал еси на мя, рече Господь.