Read Елизаветинская Библия, 1751 Иеремия 4 Bible Online

Иеремия 4 - Елизаветинская Библия, 1751 bible

Иеремия 4

¹Аще обратишися, израилю, глаголет Господь, ко мне обратися: и аще отимеши мерзости твоя от уст твоих, и от лица моего убоишися,

²и кленешися, живет Господь, во истине и в суде и в правде, и благословят в нем языцы и в нем восхвалят Бога во Иерусалиме.

³Сия бо глаголет Господь мужем иудиным и обитателем Иерусалимлим: поновите себе поля и не сейте на тернии:

⁴обрежитеся Богу вашему и обрежите жестосердие ваше, мужие иудины и обитающии во Иерусалиме, да не изыдет яко огнь ярость моя, и возгорится, и не будет угашаяй, ради лукавства начинаний ваших.

⁵Возвестите во иудеи, и да услышится во Иерусалиме: глаголите, воспойте трубою на земли, возопийте зело и рцыте: соберитеся, и внидем во грады тверды.

⁶Воздвигше (знамение) бежите в сион, потщитеся, не стойте, яко злая аз навожду от севера и сотрение велико.

⁷Взыде лев от ложа своего, и погубляяй языки воздвижеся и изыде от места своего, да положит землю твою в пустыню, и гради твои разорятся, оставшии без обитателей.

⁸О сих препояшитеся во вретища и плачите и рыдайте, яко не отвратися гнев ярости Господни от вас.

⁹И будет в день той, глаголет Господь, погибнет сердце царево и сердце началников, и священницы ужаснутся, и пророцы удивятся.

¹⁰И рекох: о, Владыко Господи, еда обольстил еси люди сия и Иерусалима, рекий: мир будет вам? и се, пройде мечь даже до души их.

¹¹Во время оно речется людем сим и Иерусалиму: дух заблуждения в пустыни, путь дщере людий моих, не ко очищению, ниже во святое:

¹²дух исполнения от сих приидет мне, и ныне аз возглаголю суды моя к ним.

¹³Се, яко облак взыдет, и яко вихрь колесницы его, быстрее орлов кони его: горе нам, яко бедствуем.

¹⁴Омый от лукавства сердце твое, Иерусалиме, да спасешися: доколе будут в тебе помышления бед твоих?

¹⁵Глас бо возвещающаго от дана приидет, и слышана будет болезнь от горы ефремли.

¹⁶Рцыте языком: се, приидоша: возвестите во Иерусалиме: полцы идут от земли дальния и даша на грады иудины глас свой,

¹⁷аки стражы селнии быша над ним окрест: яко пренебрегл мя еси, глаголет Господь.

¹⁸Пути твоя и начинания твоя сотвориша тебе сия: сие лукавство твое, понеже горько, яко прикоснуся сердцу твоему.

¹⁹Чрево мое, чрево мое болит мне, и чувства сердца моего, смущается душа моя, терзается сердце мое: не умолчу, яко глас трубы услышала душа моя, вопль рати и беды:

²⁰сотрение (на сотрение) призывается, понеже опустела вся земля, внезапу опусте жилище мое, расторгошася кожы моя.

²¹Доколе зрети имам бежащих, слышащь гласы трубныя?

²²Понеже вождеве людий моих мене не познаша: сынове буии суть и безумни, мудри суть, еже творити злая, благо же творити не познаша.

²³Воззрех на землю, и се, ничтоже, и на небо, и не бе света его.

²⁴Видех горы, и трепетаху, и вси холми возмутишася.

²⁵Воззрех, и се, не бе человека, и вся птицы небесныя ужасахуся.

²⁶Видех, и се, кармил пуст, и вси гради сожжени огнем от лица Господня, и от лица гнева ярости его погибоша.

²⁷Сия глаголет Господь: пуста будет вся земля, скончания же не сотворю.

²⁸О сих да плачет земля, и да помрачится небо свыше: понеже глаголах, и не раскаюся: устремихся и не отвращуся от него.

²⁹От гласа яздящих и напряженна лука побеже всяка страна: внидоша в разселины и в дубравы сокрышася и на камение взыдоша: вси гради оставлени суть, не обитает в них человек.

³⁰Ты же, запустелая, что сотвориши? аще облечешися во багряницу и украсишися монисты златыми, аще намажеши стивием очи твои, всуе украшение твое: отринуша тя любовницы твои, души твоея ищут.

³¹Глас бо яко родящия слышах стенания твоего: аки первородящия глас дщере сиони истает, и опустит руце свои: горе мне, яко изчезает душа моя над убиенными.