Read Елизаветинская Библия, 1751 Иеремия 41 Bible Online

Иеремия 41 - Елизаветинская Библия, 1751 bible

Иеремия 41

¹И бысть в седмый месяц, прииде исмаил сын нафаниин сына елисамова, от рода царева, и вельможи царевы десять мужей с ним ко годолии в массифаф, и ядоша ту вкупе хлеб.

²И воста исмаил и десять мужей иже с ним, и поразиша годолию мечем, и убиша, егоже постави царь вавилонский над землею,

³и всех иудеев, иже беша с ним в массифафе, и всех халдеев, иже обретошася тамо, и мужей военных изби исмаил.

⁴И бысть во вторый день по убиении годолиеве, и человек не уведе.

⁵И приидоша мужие от сихема и от салима и от самарии осмьдесят мужей, обритыми брадами и растерзаными ризами, плачущеся, и дары и фимиам в руку их, еже внести в дом Господень.

⁶И изыде противу им исмаил сын нафаниев от массифы: тии же идяху и плакахуся: и егда сретеся с ними, рече к ним: внидите ко годолии.

⁷И бысть, вшедшым им среде града, изсече я исмаил у кладязя, той и мужие, иже беша с ним.

⁸И обретошася десять мужей ту и реша исмаилу: не убий нас, яко суть нам имения на нивах, пшеница и ячмень, и мед и масло. И мину их и не уби их посреде братий их.

⁹И кладязь, в оньже вверже исмаил вся, яже изби, сей кладязь велик есть, егоже сотвори царь аса, от лица ваасы царя израилева, сей наполни исмаил убиенными.

¹⁰И обрати исмаил вся люди оставшыя в млссифафе и дщери царевы, яже вручил архимагир годолии сыну ахикамову, и взя их исмаил сын нафань: и отиде на ону страну сынов аммоних.

¹¹И слыша иоанан сын кариев и вси воеводы силы, иже с ним, вся злая, яже сотвори исмаил сын нафаниев,

¹²и приведоша вся воя своя и идяху воевати нань, и обретоша его при воде мнозе во гаваоне.

¹³И бысть, егда увидеша вси людие, иже со исмаилом, иоанана сына кариева и вся воеводы силы, иже быша с ним, возрадовашася:

¹⁴и возвратишася вси людие, ихже плени исмаил от массифы, и возвратившеся отидоша ко иоанану сыну кариеву.

¹⁵Исмаил же уцеле со осмию мужи от лица иоананя и иде ко сыном аммоним.

¹⁶И взя иоанан и вси воеводы силы, иже с ним, вся оставшыяся люди, ихже возврати от исмаила сына нафаня из массифафа, повнегда уби годолию, сына ахикамля, мужы сильны на рати, и жены, и останки, и каженики, ихже обрати от гаваона,

¹⁷и идоша, и седоша на земли вирофоамли, яже ко вифлеему, еже ити и внити во египет от лица халдейска: понеже убояшася от лица их:

¹⁸яко уби исмаил годолию, егоже постави царь вавилонский на земли иудине.