Read Елизаветинская Библия, 1751 Иеремия 44 Bible Online

Иеремия 44 - Елизаветинская Библия, 1751 bible

Иеремия 44

¹Слово бывшее ко иеремии (от Господа) и ко всем иудеем сущым в земли египетстей и седящым во магдале и во тафнасе, и во мемфисе и в земли пафурсте, глаголя:

²тако глаголет Господь Бог израилев: вы видесте вся злая, яже наведох на Иерусалим и на грады иудины: и се, пусти суть ныне от живущих,

³от лица злобы их, юже сотвориша разгневати мя, ходяще кадити богом чуждим, ихже не ведесте вы сами и отцы ваши.

⁴И послах к вам отроки моя пророки заутра, и посылах я, глаголя: не творите дела осквернения сего, егоже возненавидех.

⁵И не послушаша мене, ни приклониша уха своего обратитися от злоб своих, еже не кадити богом инем.

⁶И вскапа ярость моя и гнев мои и разгореся во вратех иудиных и вне Иерусалима: и быша во опустение и в непроходимую до сего дне.

⁷И ныне сице рече Господь вседержитель, Бог израилев: вскую вы творите злобы велики на душы своя, еже изсещи вам мужы и жены, младенца и ссущаго от среды иуды, да не останется ни един от вас,

⁸разгневати мя в делех рук ваших, кадити богом инем в земли египетстей, в нюже приидосте жити тамо, да изсечени будете и в проклятие да будете и на укоризну во всех языцех земли?

⁹еда забысте злобы отец ваших и злобы царей иудиных, и злобы князей ваших и злобы вашя, и злобы жен ваших, яже сотвориша в земли иудине и вне Иерусалима?

¹⁰И не престаша даже до сего дне и не убояшася и не держахуся законов моих и повелений моих, яже дах пред лицем вашим и пред очима отец ваших.

¹¹Того ради тако глаголет Господь сил, Бог израилев: се, аз приставлю лице мое на вы во зло, еже погубити вся люди иудины:

¹²и возму останки иудины, иже поставиша лица своя, еже внити в землю египетску и жити тамо, и изчезнут вси в земли египетстей, и падут мечем и гладом, и изчезнут от мала даже до велика: и будут на укоризну и в пагубу и в проклятие:

¹³и посещу на седящих в земли египетстей, якоже посетих на Иерусалим, мечем и гладом и смертию,

¹⁴и не будет уцелевша ни единаго же от оставших иудиных, обитающих в земли египетстей, еже возвратитися на землю иудину, к нейже тии надеются душами своими возвратитися тамо: не возвратятся, разве избегшии.

¹⁵И отвещаша иеремии вси мужие разумеющии, яко кадят жены их богом иным, и вся жены собор велик, и вси людие седящии в земли египетстей, в земли пафурсте, глаголюще:

¹⁶слово, еже глаголал еси к нам во имя Господне, не послушаем тебе,

¹⁷яко творяще сотворим всякое слово, еже изыдет из уст наших, кадити царице небесней и возливати ей возлияния, якоже сотворихом мы и отцы наши, и царие наши и князи наши во градех иудиных и вне Иерусалима: и насытихомся хлебов, и благо нам бысть, и зла не видехом.

¹⁸И егда престахом кадити царице небесней и возливати возлияния, оскудехом хлебы вси мы, и мечем и гладом скончахомся.

¹⁹И егда кадихом мы царице небесней и возливахом ей возлияния, еда без мужей наших творихом ей опресноки и возливахом ей возлияния?

²⁰И рече иеремиа всем людем сильным и всем женам и всем людем отвещавшым ему словеса, глаголя:

²¹не каждение ли, еже кадисте во градех иудиных и внеуду Иерусалима вы и отцы ваши, и царие ваши и князи ваши и людие земли, помяну Господь, и взыде на сердце его?

²²И не можаше Господь терпети ктому от лица злобы деяний ваших и от гнусностей, яже сотвористе: и бысть земля ваша во опустение и в непрохождение и в клятву, еже не быти живущым, якоже есть день сей,

²³от лица сих, имже кадисте (идолом) и имиже согрешисте Господеви: и не послушасте гласа Господня, и в повелениих его и в законе и во свидениих его не ходисте, и постигнуша вы злая сия, якоже день сей.

²⁴И рече иеремиа людем и женам: слышите слово Господне, весь иуда, иже есте в земли египетстей:

²⁵тако рече Господь вседержитель, Бог израилев, глаголя: вы и жены вашя усты вашими соглаголасте и руками вашими исполнисте, глаголюще: творяще сотворим исповедания наша, яже обещахом кадити царице небесней и возливати возлияния ей: пребывающе пребысте во обетех ваших и творяще сотвористе я.

²⁶Того ради слышите слово Господне, весь иуда, седящии в земли египетстей: се, кляхся именем моим великим, рече Господь, аще будет ктому имя мое во устех всего иуды, еже рещи, жив Господь Бог, во всей земли египетстей.

²⁷Яко се, аз возбудихся на ня озлобити их, а не благосотворити, и изчезнут весь иуда живущии в земли египетстей мечем и гладом, дондеже скончаются.

²⁸И уцелевшии от меча возвратятся на землю иудину малым числом: и уведят оставшии иудины, преселившиися в землю египетску обитати тамо, слово чие пребудет, мое, или их?

²⁹И сие вам знамение, глаголет Господь, яко посещу аз на вы на месте сем, да уведите, яко воистинну исполнятся словеса моя на вас во злая.

³⁰Тако рече Господь: се, аз предаю фараона вафриа царя египетска в руце врага его и в руце ищущих души его, якоже дах седекию царя иудина в руце навуходоносора царя вавилонска врага его и ищущаго души его.