Read Елизаветинская Библия, 1751 Иеремия 46 Bible Online

Иеремия 46 - Елизаветинская Библия, 1751 bible

Иеремия 46

¹Слово, еже бысть ко иеремии пророку от Господа на языки,

²ко египту противу силы фараона нехао царя египетскаго, иже бысть над рекою евфратом во кархамисе, егоже порази навуходоносор царь вавилонский, в лете четвертем иоакима сына иосиина, царя иудина.

³Возмите оружие и щиты и идите на брань,

⁴оседлайте кони и вседайте, всадницы, и станите во шлемех ваших, уставите копия и облецытеся в броня вашя.

⁵Что убо видех их страшливых и хребты обращающих? крепцыи их избити, побегоша скоро и не озрешася вспять, отвсюду страх, глаголет Господь.

⁶Не утечет легкий, ниже возможет избавитися крепкий на полунощь: близ реки евфрата побеждени суть и падоша.

⁷Кто есть той, иже яко река восходит, и яко реки воздвижутся волны его?

⁸Воды египта аки река взыдут, и аки река восколеблются воды его. И рече: взыду и покрыю землю, и погублю град и живущыя в нем.

⁹Возсядите на кони и устройте колесницы, изыдите, сильнии муринстии, и ливиане вооруженнии щитами, и лидяне, взыдите наляцающе лук.

¹⁰День сей Господа Бога вседержителя, день отмщения, да отмстит врагом своим, и пожрет я мечь Господень и насытится и упиется кровию их, яко жертва Господу вседержителю в земли полунощней, близ реки евфрата.

¹¹Взыди в галаад и возми ритину, дево, дщи египетска! всуе умножила еси врачевания твоя, и цельбы несть тебе.

¹²Услышаша языцы глас, и плачь твой наполни землю: яко сильный сретеся с сильным, и оба вкупе изнемогоста и падоста.

¹³Слово, еже глагола Господь ко иеремии пророку о сем: яко име приити навуходоносор царь вавилонский и поразити землю египетску.

¹⁴Возвестите египту и разгласите во магдалу, и возопийте во мемфисе и во тафнасе поведите: стой и уготовися, яко пожрет мечь сия, яже окрест тебе суть.

¹⁵Почто убежа от тебе апис? телец избранный твой не пребысть, яко Господь разруши его.

¹⁶И множество твое изнеможе и паде, и кийждо ко ближнему своему глаголаху: востаним и возвратимся к людем нашым и в землю рождения нашего от лица меча еллинскаго.

¹⁷Назовите имя фараона нехао царя египетска, смятение преведе время.

¹⁸Живу аз, глаголет Царь, Господь вседержитель имя его: ибо, якоже фавор на горах и якоже кармель в мори, приидет.

¹⁹Сосуды пленения сотвори себе, живущая дщи египетска, яко мемфис в запустение будет, и наречется, увы! и не будут в нем жити.

²⁰сница (избранна и) украшена египет, разорение от полунощи прииде на ню,

²¹и наемницы его, живущии посреде его, якоже телцы тучнии питаеми в нем: зане и тии обратишася и побегоша вкупе, и не могоша стати, яко день погибели их прииде на ня и время отмщения их.

²²Глас их, якоже змиа звиздающаго, понеже с силою пойдут, со секирами приидут на него.

²³Яко древие секуще посекут лес его, глаголет Господь Бог: ибо не может сочтен быти, яко умножишася паче пругов, и несть им числа.

²⁴Посрамленна есть дщи египетска и дана в руце людем полунощным.

²⁵Рече Господь вседержитель, Бог израилев: се, аз посещу на аммона сына ея, и на фараона и на египет, и на боги его и на цари его, и на фараона и на уповающыя нань,

²⁶и дам их в руце ищущих души их, и в руку навуходоносора царя вавилонска, и в руце слуг его: и посем поживут якоже и первее, глаголет Господь.

²⁷Ты же не убойся, рабе мой иакове, ни устрашайся, израилю: се бо, аз тебе спасена сотворю издалеча и семя твое от земли пленения их: и возвратится иаков и почиет и благоуспеет, и не будет устрашаяй его.

²⁸Не бойся, рабе мой иакове, глаголет Господь, яко с тобою есмь аз: яко сотворю скончание во всех языцех, в няже извергох тя, тебе же не сотворю оскудети, но накажу тя судом и обезвиняя не обезвиню тя.