Read Елизаветинская Библия, 1751 Иеремия 49 Bible Online

Иеремия 49 - Елизаветинская Библия, 1751 bible

Иеремия 49

¹К сыном аммоним тако глаголет Господь: еда не суть сынове израилевы, или наследника несть им? почто убо прия наследие мелхом гада, и людие его во градех его живяху?

²Сего ради, се, дние грядут, глаголет Господь, и оглашу на равваф сынов аммоних ратный звук, и будет в непроходная и в пагубу, и требища его огнем сожжена будут, и восприимет израиль власть свою, глаголет Господь.

³Возопий, есевоне, яко погибе гай: возопийте, дщери раввафски, препояшитеся вретищами, рыдайте и бегайте по забралом, яко мелхом во плен отведется, священницы и князи его вкупе.

⁴Что хвалишися во удолиих? стече удолие твое, дщи безстудная, уповающая на богатства своя, глаголющи: кто приидет на мя?

⁵Се, аз наведу на тя страх, глаголет Господь вседержитель, от всех сущих окрест тебе: и разсеетеся вси от лица его, и не будет собирающаго бежащих.

⁶И посем возвращу пленники сынов аммоних, глаголет Господь.

⁷Ко идумеи сия глаголет Господь вседержитель: еда есть ктому мудрость во фемане? погибе совет от разумных, непотребна бысть мудрость их,

⁸попрано бысть место их: снидите в пропасть к седению, живущии во дедане: яко жестокая сотвори: (погибель исавлю) наведох нань во время, в неже посетих его.

⁹Яко оымателие вина приидоша на тя, не оставят тебе останков: аки татие в нощи возложат руки своя.

¹⁰Яко (аз) обнажих исава, открых тайная его, не возможет утаитися, погибе рукою брата своего и соседа своего,

¹¹и несть остатися сироте твоей, да живет: аз же сотворю жити, и вдовицы на мя уповаша.

¹²Тако бо глаголет Господь: се, имже не бе закона пити чашу, пиюще испиют: и ты ли аки неповинный останешися? не будеши неповинен, но пия испиеши.

¹³Собою бо кляхся, глаголет Господь, яко в пустыню и в поругание и в посмех и в проклятие будеши посреде его, и вси гради его будут в пустыню вечную.

¹⁴Слух слышах от Господа, и послов во языки посла: соберитеся и идите противу ему и востаните на ополчение.

¹⁵Се, мала дах тя во языцех и поругаема в людех.

¹⁶Играние твое прельсти тя, безстудие сердца твоего обиташе в разселинах каменных, похити крепость холма высокаго: егда вознесеши яко орел гнездо свое, оттоле свергу тя, глаголет Господь.

¹⁷И будет идумеа в запустение, всяк ходяй чрез ню подивится и позвиждет над всякою язвою ея.

¹⁸Якоже превращена есть содома и гоморра и соседи ея, глаголет Господь, не поживет тамо муж, ниже пребудет тамо сын человечь.

¹⁹Се, якоже лев изыдет от среды иордана на место сильнаго, яко скоро сотворю им бежати от него, и кто будет избран, егоже поставлю над ним? кто бо подобен мне? и кто противостанет ми? и кто есть сей пастырь, иже сопротивится лицу моему?

²⁰Сего ради слышите совет Господень, егоже совеща на едома, и умышление его, еже умысли на живущих во фемане, не свергут ли их малая от стад, и не разметано ли будет на них жилище их?

²¹От гласа бо падения их потрясеся земля, и вопль на мори чермнем слышася гласа их.

²²Се, яко орел взыдет и возлетит и прострет криле свои над твердыньми его: и будет сердце сильных идумейских в той день, яко сердце жены родящия.

²³К дамаску: посрамися емаф и арфаф, яко слух зол слышаша, ужасошася, возмутишася на мори, (за попечение) упокоитися не могут.

²⁴Расторжеся дамаск, обратися на бежание, трепет объят и, скорбь и болезнь одержаша его яко раждающую.

²⁵Како не оставиша града славнаго, крепости любезныя?

²⁶Сего ради падут юноши на стогнах твоих, и вси мужие воинстии падут в той день, глаголет Господь вседержитель.

²⁷И возжгу огнь на стене дамаска, и пожжет стены сына адерова.

²⁸К кидару, царице двора, егоже порази навуходоносор царь вавилонский, тако глаголет Господь: востаните и взыдите на кидар и погубите сыны восточныя.

²⁹Селения их и стада их возмут: одежды их и вся сосуды их и велблюды их возмут себе, и призовут на ня страх окрест.

³⁰Бежите и отидите вскоре, в пропастех сядите, живущии во дворе, глаголет Господь: яко совеща на вы навуходоносор царь вавилонский совет и помысли на вас умышление.

³¹Востаните и внидите к людем упокоеным, живущым в прохладе, глаголет Господь: иже ни дверий, ниже заворов имут, едини обитают.

³²И будут велблюды их в расхищение и множество скота их в разграбление, и развею я всяким ветром остриженых окрест, и от всех окрестных их приведу на ня погибель, глаголет Господь.

³³И будет двор в жилище змием и пуст даже до века, не поживет тамо муж, ниже будет живяй в нем сын человечь.

³⁴Слово Господне, еже бысть ко иеремии пророку на елам, в начале царства седекии царя иудина, глаголя:

³⁵тако глаголет Господь вседержитель: се, аз сокрушу лук еламль, начало силы их,

³⁶и наведу на елам четыри ветры от четырех стран небесных и развею я во вся ветры тыя, и не будет языка, в оньже бы не пришли бежащии еламитяне.

³⁷И устрашу их пред враги их и пред лицем ищущих души их, и наведу на ня злая, по гневу ярости моея, глаголет Господь: и послю вслед их мечь мой, дондеже сотру их:

³⁸и поставлю престол мой во еламе, и иждену оттуду царя и князи, глаголет Господь:

³⁹и будет в последния дни, возвращу плен еламль, глаголет Господь.