Read Елизаветинская Библия, 1751 Иеремия 5 Bible Online

Иеремия 5 - Елизаветинская Библия, 1751 bible

Иеремия 5

¹Обыдите пути Иерусалимския и воззрите, и познайте и поищите на стогнах его, аще обрящете мужа творящаго суд и ищуща веры: и милосерд буду ему, глаголет Господь.

²Живет Господь, глаголют, сего ради не во лжах ли кленутся?

³Господи, очи твои (зрят) на веру: бил еси их, и не поболеша, сокрушил еси их, и не восхотеша прияти наказания: ожесточиша лица своя паче камене и не хотеша обратитися.

⁴Аз же рех: негли убози суть (и буии), того ради не возмогоша, яко не уведаша пути Господня и суда Бога своего.

⁵Пойду ко державным и возглаголю им, тии бо познаша путь Господень и суд Бога своего. И се, единодушно сии сокрушиша иго, расторгоша узы.

⁶Сего ради порази их лев от дубравы, и волк даже до домов погуби их, и рысь бдяше над градами их: вси исходящии от них будут яти, яко умножиша нечестия своя, укрепишася во отвращениих своих.

⁷О чем от сих милосерд буду тебе? сынове твои оставиша мя и кляшася теми, иже не суть бози: насытих их, и прелюбодействоваша и в домех блудниц обиташа,

⁸кони женонеистовни сотворишася, кийждо ко жене искренняго своего ржаше.

⁹Еда о сих не посещу? рече Господь: или языку сицевому не мстит душа моя?

¹⁰Взыдите на стены его и разорите, окончания же не сотворите: оставите подпоры его, яко Господни суть.

¹¹Преступлением бо преступил есть на мя дом израилев и дом иудин глаголет Господь.

¹²Солгаша Господу своему и рекоша: не суть сия, ниже приидут на нас злая и меча и глада не узрим:

¹³пророцы наши быша на ветр, и слово Господне не бе в них, тако будет им.

¹⁴Сего ради тако глаголет Господь сил: занеже глаголали есте слово сие, се, аз даю словеса моя во уста твоя огнь, и люди сия древа, и пояст их.

¹⁵Се, аз наведу на вас язык издалеча, доме израилев, рече Господь, язык сильный, язык старый, егоже языка не увеси, (ни уразумееши, что глаголет):

¹⁶тул его яко гроб отверст, вси крепцыи и поядят жатву вашу

¹⁷и хлебы вашя, и поядят сынов ваших и дщерей ваших, и снедят овец ваших и телцев ваших, и поядят винограды вашя и смокви вашя и масличия ваша, и сокрушат грады вашя твердыя, на нихже вы уповасте, мечем.

¹⁸Обаче во днех онех, глаголет Господь Бог твой, не сотворю вас во истребление.

¹⁹И будет, егда речете: почто сотвори Господь Бог наш нам сия вся? И речеши к ним: яко остависте мя и послужисте богом чуждим в земли вашей, тако послужите богом чуждим в земли не вашей.

²⁰Возвестите сия дому иаковлю и слышано сотворите в дому иудине (рекуще):

²¹слышите сия, людие буии и не имущии сердца, иже, имеюще очи, не видите, и ушы, и не слышите:

²²мене ли не убоитеся? рече Господь: или от лица моего не устыдитеся? иже положих песок предел морю, заповедь вечну, и не превзыдет его, и возмутится и не возможет: и возшумят волны его, и не прейдут того.

²³Людем же сим бысть сердце непослушно и непокориво, и уклонишася и поидоша,

²⁴и не рекоша в сердцы своем: убоимся Господа Бога нашего, дающаго нам дождь ранний и поздный во время исполнения повеления жатвы и хранящаго нам.

²⁵Беззакония наша уклониша сия, и греси наши отринуша благая от нас.

²⁶Яко обретошася в людех моих нечестивии, и сети поставиша, еже погубити мужы, и уловиша.

²⁷Аки клетка поставлена полна птиц, тако домы их полни лести: сего ради возвеличишася и обогатишася:

²⁸утыша и утолстеша и преступиша словеса моя злейшии: прю вдовицы не судиша, суда сира не управиша и суда убогим не судиша.

²⁹Еда сих ради не посещу? рече Господь: или языку сицевому не отмстит душа моя?

³⁰Ужас и страшная содеяшася на земли:

³¹пророцы пророчествоваша неправедная, и священницы восплескаша руками своими, и людие мои возлюбиша таковая. И что сотворите в последняя сих?