Read Елизаветинская Библия, 1751 Иеремия 51 Bible Online

Иеремия 51 - Елизаветинская Библия, 1751 bible

Иеремия 51

¹Тако глаголет Господь: се, аз воздвигну на вавилон и на живущыя халдеи ветр зноен губителный:

²и послю на вавилон ругатели, и студно поругаются ему и истлят землю его: понеже горе на вавилон окрест в день озлобления его.

³Да наляцает наляцаяй лук свой, и да облечется в броня своя, и не пощадите юнош его, и побийте все воинство его.

⁴И падут избиеннии в земли халдейстей и язвеннии во странах ея.

⁵Понеже не овдове израиль и иуда от Бога своего, от Господа вседержителя, яко земля их наполнися неправды от святых израилевых.

⁶Бежите от среды вавилона и спасите кийждо душу свою и не погибнете в неправде его, зане время отмщения его есть от Господа, воздаяние той воздаст ему.

⁷Чаша златая вавилон в руце Господни, напаяющи всю землю, от вина его пиша (вси) языцы, сего ради потрясошася.

⁸Внезапу паде вавилон и сокрушися: плачите по нем, возмите масти к болезни его, да изцелится.

⁹Врачевахом вавилона, и не изцеле: оставим его и отидем кийждо в землю свою, взыде бо к небеси суд его и воздвижеся даже до звезд.

¹⁰Изнесе Господь суд свой: приидите и возвестим в сионе дела Господа Бога нашего.

¹¹Наострите стрелы, наполните тулы: воздвиже Господь дух царей мидских, яко противу вавилона гнев его, да погубит и, понеже отмщение Господне есть, отмщение людий его.

¹²На стенах вавилонских воздвигните знамя, поставите стражи, уготовите стражей, уготовите оружие: яко умысли Господь, и сотворит, яже рече на живущыя в вавилоне,

¹³живый над водами многими и богат в сокровищих своих: прииде конец твой истинно во утробы твоя.

¹⁴Клятся бо Господь сил мышцею своею, яко наполню тебе людьми, якоже акридами, и возгласят над тобою низходящии.

¹⁵Господь сотворивый землю в силе своей и устроивый вселенную в мудрости своей, и разумением своим распростре небеса,

¹⁶егда он даст глас, умножатся воды на небеси, воздвизаяй облаки от конец земли, молнию в дождь сотвори, изводяй свет от сокровищ своих.

¹⁷Обуя всяк человек от разума, посрамися всяк слиятель от изваяний своих, яко ложная слияния его, и несть духа в них:

¹⁸суетна суть дела и смеху достойна, в час посещения своего погибнут.

¹⁹Не такова часть иаковля, яко сотворивый всяческая той есть, (а израиль) жезл достояния его, Господь вседержитель имя его.

²⁰Сокрушаеши ты мне сосуды бранныя, и аз сокрушу в тебе языки и погублю в тебе царствия:

²¹и избию в тебе кони и всадники их, и избию в тебе колесницы и вседающих на них:

²²и избию в тебе мужа и жену, и избию в тебе стара и отрока, и избию в тебе юношу и деву:

²³и избию в тебе пастыря и стада его, и избию в тебе орюща и работна скота его, и избию в тебе воеводы и правители.

²⁴И воздам вавилону и всем жителем халдейским вся злобы их, яже сотвориша над сионом пред очима вашима, глаголет Господь.

²⁵Се, аз на тя, горо смертоносная, глаголет Господь, растлевающая всю землю, и простру руку мою на тя и извергу тя из каменей, и дам тя в гору сожженую:

²⁶и не возмут от тебе камене во угл и камене во основание, яко потребишися во веки, глаголет Господь.

²⁷Воздвигните знамя на земли, вострубите трубою во языцех, освятите нань языки, возвестите нань царствам араратским от мене и асханазеом: утвердите над ним стрельницы, возведите нань кони, яко акридов множество.

²⁸Возведите нань языки, царя мидска и всея земли, воевод его и всех воев его и всея земли области его.

²⁹И потрясеся земля и смутися, зане воста на вавилон умышление Господне, еже положити землю вавилонску пусту и ненаселену.

³⁰Оскудеша крепцыи вавилонстии еже ратовати: сядут тамо во ограде, погибе храбрость их, и быша яко жены: пожжена суть селения, сотрены заворы его.

³¹Гоняй во сретение текуща постигнет, и вестник сретит посла, да возвестит царю вавилонску, яко взят бысть град его.

³²От края прехождений его яти быша, и твердыни его зажжены огнем, и мужие его воинстии исходят.

³³Тако бо глаголет Господь вседержитель, Бог израилев: домове царя вавилонскаго яко гумно зрело измлачени будут: еще мало, и приидет жатва его.

³⁴Снеде мя, раздроби мя, прият мя тма тонка, навуходоносор царь вавилонский пожре мя, яко змий наполни чрево свое сладостию моею: и извергоша мя.

³⁵Труды мои и беды моя на вавилон, речет живущая в сионе, и кровь моя на живущыя в халдеех, речет Иерусалим.

³⁶Сего ради тако глаголет Господь: се, аз судити буду соперника твоего и отмщу отмщение твое, и пусто сотворю море его и изсушу потоки его.

³⁷И будет вавилон в запустение, жилище змием, в чудо и позвиздание, понеже не будет живущаго.

³⁸Вкупе аки львы востанут и аки скимни львов.

³⁹В горячести их дам питие им и упою я, да спят и уснут сном вечным и не востанут, глаголет Господь.

⁴⁰И низведу я яко агнцы на заклание и яко овны с козлы.

⁴¹Како взяся сесах, и ята слава всея земли? како бысть во удивление вавилон во языцех?

⁴²Взыде на вавилон море в шуме волн своих, и покрыся.

⁴³Быша гради его в запустение, земля безводна и пуста, земля, в нейже никтоже поживет, и ниже будет витати в нем сын человечь.

⁴⁴И посещу на вила в вавилоне, и извергу то, еже поглоти, от уст его, и не соберутся вящше к нему языцы, зане и стены вавилонския падут.

⁴⁵Изыдите от среды его, людие мои, да спасет кийждо душу свою от гнева ярости Господни.

⁴⁶Да не когда умягчится сердце ваше, и убоитеся ради слуха, иже услышится на земли, и приидет в лето слышание, и по лете слышание, бедность и неправда на землю, и властелин на властелина.

⁴⁷Сего ради, се, дние грядут, и посещу на изваяныя вавилона: и вся земля его посрамится, и вси язвении его падут посреде его.

⁴⁸И возвеселятся над вавилоном небеса и земля и вся сущая в них: от полунощи бо приидут нань всегубителие, глаголет Господь:

⁴⁹и якоже сотвори вавилон падати язвеным во израили, тако в вавилоне падут язвении всея земли.

⁵⁰Избегшии меча, идите, не стойте: иже издалече, помяните Господа, и Иерусалим да взыдет на сердце ваше.

⁵¹Посрамихомся, зане слышахом ругание наше, покры срамота лице наше, яко приидоша чуждии во святая наша в дом Господень.

⁵²Сего ради, се, дние грядут глаголет Господь, и посещу на изваяния его, и по всей земли его падут язвении.

⁵³Яко аще взыдет вавилон на небо и аще утвердит на высоте крепость свою, от мене приидут губителие его, глаголет Господь.

⁵⁴Глас вопля вавилонска, и сотрение велико в земли халдейстей:

⁵⁵яко погуби Господь вавилона и сотре от него глас велий шумящь яко воды многи, даде в пагубу глас его:

⁵⁶яко прииде на вавилон хищник, яти быша сильнии его, увяде лук их, яко Бог воздает им,

⁵⁷Господь воздает ему воздаяние: и упоит князи его и мудрыя его, и воеводы его и вои его и сильныя его, и уснут сном вечным и не возбудятся, глаголет Царь, Господь вседержитель имя его.

⁵⁸Тако глаголет Господь вседержитель: стена вавилонска сия преширока, подкопанием подкопана будет, и врата его высока огнем сожжена будут, и будут трудитися людие вотще, и языцы в начале погибнут.

⁵⁹Слово, еже заповеда Господь иеремии пророку, рещи сарею сыну нириину, сына маассеова, егда иде от седекии царя иудина в вавилон, в четвертое лето царства его: сарей же бе началник даров.

⁶⁰И написа иеремиа вся злая, яже имяху приити на вавилон, во едину книгу вся словеса сия, яже писана суть на вавилон. И рече иеремиа к сарею:

⁶¹егда внидеши в вавилон, и узриши и прочтеши вся словеса сия, и речеши:

⁶²Господи, ты рекл еси противу места сего погубити е, и да не будет живяй в нем от человека и до скота, и да будет в вечную пустыню:

⁶³и будет, егда прочтеши книгу сию, привяжи к ней камень и вверзи ю посреде евфрата и рцы:

⁶⁴тако потопится вавилон и не востанет от лица зол, яже аз наведу нань, и разорится. Даже до зде словеса иеремиина.