Read Елизаветинская Библия, 1751 Иеремия 6 Bible Online

Иеремия 6 - Елизаветинская Библия, 1751 bible

Иеремия 6

¹Укрепитеся, сынове вениаминовы, посреде Иерусалима, и в фекуи вострубите трубою, и над вефахармом воздвигните хоругвь: яко злая произникоша от севера, и сотрение велико бывает:

²и отимется высота твоя, дщи сионя.

³К ней приидут пастырие и стада их, и поставят на ней кущы окрест, и упасут кийждо рукою своею.

⁴Уготовитеся на ню на крань, востаните и взыдем на ню о полудни: горе нам, яко уклонися день, яко изчезают сени дневныя.

⁵Востаните и взыдем на ню нощию и расточим основания ея.

⁶Яко сия глаголет Господь сил: посецы древа его, излий на Иерусалим силу: о, граде лживый, всякое насильство в немъ!

⁷Якоже студену творит кладязь воду свою, тако студену творит ю злоба ея: нечестие и пакости услышатся в нем над лицем его всегда.

⁸Немощию и язвою накажешися, Иерусалиме: да не отступит душа моя от тебе, да не сотворю тя непроходну, землю необитанну.

⁹Яко сия глаголет Господь сил: обирайте, обирайте, аки виноград, останки израилевы, обратитеся аки обиратель на кошницу свою.

¹⁰Кому возглаголю и (кому) засвидетельствую, и услышит? се, необрезана ушеса их, и слышати не возмогут: се, слово Господне бысть к ним в поношение, и не восприимут того.

¹¹И ярость мою исполних, и терпех, и не скончах их: излию на младенцы отвне и на собрание юнош вкупе: муж бо и жена яти будут, старец со исполненным дний.

¹²И прейдут домы их ко иным, поля и жены их такожде, яко простру руку мою на обитающих на земли сей, глаголет Господь.

¹³Понеже от меншаго и даже до болшаго вси совершиша беззаконная, от священника и даже до лжепророка вси сотвориша ложная

¹⁴и целяху сотрение людий моих, уничижающе и глаголюще: мир, мир: и где есть мир?

¹⁵Постыдешася, яко оскудеша: и ниже аки посрамляеми постыдешася и безчестия своего не познаша: сего ради падут падением своим и во время посещения своего погибнут, рече Господь.

¹⁶Сия глаголет Господь: станите на путех и видите, и вопросите о стезях Господних вечных и видите, кий есть путь благ, и ходите по нему и обрящете очищение душам вашым. И рекоша: не пойдем.

¹⁷И поставих над вами стражы: слышите глас трубы. И рекоша: не послушаем.

¹⁸Сего ради услышаша языцы и пасущии стада своя.

¹⁹Слыши, земле: се, аз навожду на люди сия злая, плод отвращения их, яко словес моих не послушаша и закон мой отвергоша.

²⁰Вскую мне кадило от савы приносите и кинамон от земли дальния, всесожжения ваша не суть приятна, и жертвы вашя не усладиша мя.

²¹Сего ради тако глаголет Господь: се, аз дам на люди сия болезнь, и изнемогут отцы и сынове вкупе, сосед и искренний его погибнут.

²²Сия глаголет Господь: се, людие грядут от севера, и язык велик востанет от конец земли,

²³лук и щит возмут: мучителен есть и не умилосердится: глас его, яко море шумящее: на конех и колесницах ополчится аки огнь на брань на тя, дщи сионя.

²⁴Слышахом слух его, ослабеша руце наши, скорбь объят нас, болезни яко родящия.

²⁵Не исходите на нивы и на пути не ходите, понеже мечь вражий обитает окрест.

²⁶Дщи людий моих, препояшися вретищем и посыплися пепелом, плачь возлюбленнаго сотвори тебе рыдание горько, понеже внезапу приидет запустение на вас.

²⁷Искусителя дах тя в людех искусных, и увеси мя, внегда искусити ми путь их:

²⁸вси непослушни ходящии строптиво: медь и железо, вси растлени суть.

²⁹Оскуде мех от огня, истле олово: всуе ковачь сребро кует, лукавства бо их не истаяша.

³⁰Сребро отриновено нарцыте их, яко Господь отверже их.