Read Елизаветинская Библия, 1751 Иеремия 7 Bible Online

Иеремия 7 - Елизаветинская Библия, 1751 bible

Иеремия 7

¹Слово, еже бысть ко иеремии от Господа, глаголющее:

²стани во вратех дому Господня и проповеждь тамо слово то и глаголи: слышите слово Господне, вся иудеа, ходящии сквозе врата сия, да поклонитеся Господу:

³сия глаголет Господь сил, Бог израилев: исправити пути вашя и начинания ваша, и вселю вы на месте сем.

⁴Не надейтеся на себе во словесех лживых, понеже весьма не упользуют вас, глаголюще: храм Господень, храм Господень, храм Господень есть.

⁵Яко аще исправляюще исправите пути ваша и умышления ваша, и творяще сотворите суд посреде мужа и посреде искренняго его,

⁶и пришелцу и сиру и вдовице не сотворите насилия, и крове неповинныя не излиете на месте сем, и вслед богов чуждих не пойдете на зло вам,

⁷вселю вас на месте сем, в земли, юже дах отцем вашым от века даже и до века.

⁸Аще же вы надеетеся на словеса лживая, отюнудуже не будет вам пользы,

⁹и крадете и убиваете, и блудствуете и кленетеся лживо, и жрете ваалу и ходите вслед богов чуждих, ихже не весте, яко во зло вам суть,

¹⁰и приидосте и стасте предо мною в дому сем, в немже призвано есть имя мое, и рекли есте: удалихомся, еже не творити вся мерзости сия:

¹¹еда вертеп разбойником есть дом мой, в немже призвася имя мое тамо во очию вашею? И се, аз видех, глаголет Господь.

¹²Сего ради идите к месту моему, еже в силоме, идеже вселих имя мое от начала, и видите, что сотворих ему лукавств ради людий моих израиля.

¹³И ныне, понеже сотвористе вся дела сия, рече Господь, и глаголах к вам рано востающь и глаголющь, и не услышасте мене, и звах вас, и не отвещасте:

¹⁴убо и аз сотворю дому сему, в немже призвано есть имя мое, на негоже вы уповасте, и месту, еже дах вам и отцем вашым, якоже сотворих силому.

¹⁵И отвергу вас от лица моего, якоже отвергох всю братию вашу, все семя ефремово.

¹⁶Ты же не молися о людех сих и не проси еже помилованым быти им, и не моли, ниже приступай ко мне о них, яко не услышу тя.

¹⁷Еда не видиши, что сии творят во градех иудиных и на путех Иерусалимских?

¹⁸Сынове их собирают дрова, и отцы их зажигают огнь, и жены их месят муку, да сотворят опресноки воинству небесному, и возлияша возлияния богом чуждим, да прогневают мя.

¹⁹Мене ли тии прогневляют? глаголет Господь: еда не себе самих? да постыдятся лица их.

²⁰Сего ради тако глаголет Господь: се, гнев и ярость моя лиется на место сие и на люди, и на скоты и на всяко древо страны их и на плоды земныя, и возжжется и не угаснет.

²¹Сия глаголет Господь сил, Бог израилев: всесожжения ваша соберите со жертвами вашими и изядите мяса:

²²яко не глаголах ко отцем вашым и не заповедах им в день, в оньже изведох их от земли египетския, о всесожжениих и жертвах,

²³но (токмо) слово сие заповедах им, рекий: услышите глас мой, и буду вам в Бога, и вы будете мне в люди, и ходите во всех путех моих, в нихже повелех вам, да благо будет вам.

²⁴И не услышаша мене, и не внят ухо их: но поидоша в похотех и стропотстве сердца своего лукаваго, и сотворишася на задняя, а не на предняя,

²⁵от дне, в оньже изыдоша отцы их от земли египетския, и даже до дне сего: и послах к вам вся рабы моя пророки, в день и рано востая и посылая:

²⁶и не услышаша мя, ни приклониша ухо свое, но ожесточиша выю свою паче отец своих.

²⁷И речеши к ним вся словеса сия, и не услышат тя, и воззовеши их, и не отвещают тебе.

²⁸И речеши к ним: сей язык, иже не послуша гласа Господа Бога своего, ни восприят наказания: погибе вера и отята есть от уст их.

²⁹Остризи главу твою и отметни, и восприими во устне рыдание, яко отверже Господь и отрину род творяй сия.

³⁰Понеже сотвориша сынове иудины лукавое во очию моею, рече Господь: поставиша мерзости своя в дому, в немже призвано есть имя мое, да осквернят его,

³¹и создаша требище тафефу, еже есть во юдоли сына енномля, да сожигают сыны своя и дщери своя огнем, егоже не повелех им, ниже помыслих в сердцы моем:

³²сего ради се, дние грядут, глаголет Господь, и не рекут ктому: требище тафефово и юдоль сына енномля, но юдоль закланых: и погребутся во тафефе, занеже несть места.

³³И будут трупие людий сих во снедь птицам небесным и зверем земным, и не будет отгоняющаго.

³⁴И упраздню от градов иудиных и от путий Иерусалимлих глас радующихся и глас веселящихся, глас жениха и глас невесты, во опустении бо будет вся земля.