Read Елизаветинская Библия, 1751 Иеремия 8 Bible Online

Иеремия 8 - Елизаветинская Библия, 1751 bible

Иеремия 8

¹Во время оно, глаголет Господь, извергут кости царей иуды и кости князей его, и кости священников и кости пророков и кости обитающих во Иерусалиме из гробов их

²и повергут их противу солнца и луны и противу всех звезд небесных и противу всего воинства небеснаго, ихже возлюбиша и имже служиша и вслед их ходиша, и ихже держахуся и имже поклонишася: неоплакани и непогребени будут и в пример на лицы земли будут:

³яко избраша паче смерть, неже живот, и всем, иже осташа от племене сего строптиваго во всех местех, аможе изрину их рече Господь сил.

⁴И речеши к ним: понеже сия глаголет Господь: еда падаяй не востает, или отврашаяйся не обратится?

⁵Вскую отвратишася людие мои сии во Иерусалиме отвращением безстудным и укрепишася во произволении своем и не восхотеша обратитися?

⁶Внимайте и слушайте: не тако ли возглаголют: несть человек творяй покаяние о гресе своем, глаголя: что сотворих? Изнеможе бежай от течения своего, аки конь утружден во ржании своем.

⁷Еродиа на небеси позна время свое, горлица и ластовица селная, врабие сохраниша времена входов своих: людие же мои сии не познаша судеб Господних.

⁸Како речете, яко мы мудри есмы и закон Господень с нами есть? Истинно всуе бысть трость лживая книжником.

⁹Постыдешася премудрии, и устрашени и поимани быша, слово бо Господне отвергоша: кая мудрость есть в них?

¹⁰Сего ради дам жены их иным и села их наследником, понеже от мала даже до велика вси златолюбию последуют и от пророка даже до священника вси творят лжу,

¹¹и изцеляху сотрения дщере людий моих, ко безчестию глаголюще: мир, мир. И не бе мира.

¹²Постыждени суть, яко гнусство сотвориша и постыдением не постыдешася и посрамитися не ведеша: сего ради падут между падающими, во время посещения своего падут рече Господь.

¹³И соберут плоды их, глаголет Господь: несть грозда на лозе, и не суть смокви на смоковницах, и листвие отпадоша: и дах им, и мимоидоша их.

¹⁴Почто мы седим? совокупитеся и внидем во грады тверды и повержемся тамо, яко Господь Бог наш отрину нас и напои нас водою желчи, согрешихом бо пред ним.

¹⁵Ждахом мира, и не бяху благая: времене уврачевания, и се, боязнь.

¹⁶От дана слышано бысть ржание коней его, от гласа ржания яждения коней потрясеся вся земля: и приидет и пожрет землю и исполнение ея, град и обитающих в нем:

¹⁷яко се, аз послю на вас змии умерщвляющыя, имже несть обаяния, и угрызут вас, рече Господь,

¹⁸неизцельно со болезнию сердца вашего изчезающаго.

¹⁹Се, глас вопля и дщере людий моих от земли издалеча: еда Господь несть в сионе? или Царя несть в нем? понеже прогневаша мя во изваянных своих и в суетных чуждих.

²⁰Пройде жатва, мимоиде лето, и мы несмы спасени.

²¹Над сокрушением дщере людий моих сокрушен есмь и скорбен: во ужасе объяша мя болезни аки раждающия.

²²Или ритины несть в галааде? или врача несть тамо? чесо ради несть изцелена рана дщере людий моих?