Read Елизаветинская Библия, 1751 Плач Иеремии 3 Bible Online

Плач Иеремии 3 - Елизаветинская Библия, 1751 bible

Плач Иеремии 3

¹Алеф. Аз муж видя нищету (мою) в жезле ярости его на мя:

²поят мя и отведе мя во тму, а не во свет.

³Обаче на мя обрати руку свою весь день,

⁴Беф. обетши плоть мою и кожу мою, кости моя сокруши:

⁵согради на мя и объя главу мою и утруди,

⁶в темных посади мя, якоже мертвыя века:

⁷Гимель. согради на мя, и не изыду, отяготи оковы моя,

⁸и егда воскричу и возопию, загради молитву мою:

⁹возгради пути моя, загради стези моя, возмяте.

¹⁰Далеф. Бысть яко медведь ловяй, (приседяй ми) яко лев в сокровенных,

¹¹гна отступившаго, и упокои мя, положи мя погибша:

¹²напряже лук свои, и постави мя яко знамение на стреляние,

¹³Ге. пусти в лядвия моя стрелы тула своего.

¹⁴Бых в смех всем людем моим, песнь их весь день.

¹⁵Насыти мя горести, напои мя желчи

¹⁶Вав. и изя каменем зубы моя, напита мя пепелом

¹⁷и отрину от мира душу мою. Забых благоты

¹⁸и рех: погибе победа моя и надежда моя от Господа.

¹⁹Заин. Помяни нищету мою и гонение мое.

²⁰Горесть и желчь мою помяну, и стужит во мне душа моя.

²¹Сия положу в сердцы моем, сего ради потерплю.

²²Иф. Милость Господня, яко не остави мене, не скончашася бо щедроты его: пребываяй во утриих, помилуй, Господи, яко не погибохом, не скончашася бо щедроты твоя.

²³Новая во утриих, многа есть вера твоя.

²⁴Часть моя Господь, рече душа моя: сего ради пожду его.

²⁵Теф. Благ Господь надеющымся нань:

²⁶души ищущей его благо (есть), и надеющейся с молчанием спасения Божия.

²⁷Благо есть мужу, егда возмет ярем в юности своей:

²⁸Иод. сядет на едине и умолкнет, яко воздвигну на ся:

²⁹положит во прахе уста своя, негли како будет надежда:

³⁰подаст ланиту свою биющему, насытится укоризн.

³¹Каф. Яко не во век отринет Господь,

³²яко смиривый помилует по множеству милости своея,

³³не отрину от сердца своего и смири сыны мужеския.

³⁴Ламед. Еже смирити под нозе его вся узники земныя,

³⁵еже уклонити суд мужа пред лицем вышняго,

³⁶осудити человека, внегда судитися ему, Господь не рече.

³⁷Мем. Кто есть той, иже рече, и быти, Господу не повелевшу?

³⁸Из уст вышняго не изыдет зло и добро.

³⁹Что возропщет человек живущь, муж о гресе своем?

⁴⁰Нун. Изыскася путь наш и испытася, и обратимся ко Господу.

⁴¹Воздвигнем сердца наша с руками к Богу высокому на небеси.

⁴²Мы согрешихом и нечествовахом, сего ради не помиловал еси:

⁴³Самех. покрыл еси яростию и отгнал еси нас, убил и не пощадел еси:

⁴⁴покрылся еси облаком, да не дойдет к тебе молитва,

⁴⁵сомжити очи мои и отринути, положил еси нас посреде людий.

⁴⁶Аин. Отверзоша на ны уста своя вси врази наши.

⁴⁷Страх и ужас бысть нам, надмение и сокрушение:

⁴⁸исходища водная излиет око мое о сокрушении дщере людий моих.

⁴⁹Фи. Око мое погрязну: и не умолкну, еже не быти ослаблению,

⁵⁰дондеже приклонится и увидит Господь с небесе.

⁵¹Око мое закрывается о души моей, паче всех дщерей града.

⁵²Цади. Ловяще уловиша мя яко врабия врази мои туне:

⁵³умориша в рове жизнь мою и возложиша на мя камень.

⁵⁴Возлияся вода выше главы моея: рех: отриновен есмь.

⁵⁵Коф. Призвах имя твое, Господи, из рова преисподняго:

⁵⁶глас мой услышал еси: не покрый ушес твоих на мольбу мою:

⁵⁷на помощь мою приближился еси, в день, в оньже призвах тя, рекл ми еси: не бойся.

⁵⁸Реш. Судил еси, Господи, прю души моея, избавил еси жизнь мою:

⁵⁹видел еси, Господи, смятения моя, разсудил еси суд мой:

⁶⁰веси все отмщение их и вся помышления их на мя.

⁶¹Шин. Слышал еси укоризны их, вся советы их на мя,

⁶²устне востающих на мя и поучение их на мя весь день,

⁶³седение их и востание их: призри на очи их.

⁶⁴Фав. Воздаси им, Господи, воздаяние по делом руку их:

⁶⁵воздаси им заступление, сердца моего труд.

⁶⁶Ты их проженеши во гневе и потребиши их под небесем, Господи.