Read Елизаветинская Библия, 1751 Иезекииль 16 Bible Online

Иезекииль 16 - Елизаветинская Библия, 1751 bible

Иезекииль 16

²сыне человечь, засвидетелствуй Иерусалиму беззакония его

³и речеши: сия глаголет адонаи Господь дщери Иерусалимстей: корень твой и бытие твое от земли хананейски: отец твой аморреанин и мати твоя хеттеаныня:

⁴и рождение твое, в оньже день родилася еси, не обязаша сосец твоих, и водою не омыша тя на спасение, ни солию осолиша, ниже пеленами повиша:

⁵и не пощаде тебе око мое, еже сотворити тебе едино от всех сих, пострадати что о тебе, и отвержена была еси на лице поля стропотством души твоея, в день в оньже родилася еси.

⁶И проидох сквозе тя и видех тя смешену во крови твоей и рекох ти: от крове твоея жива буди: и рекох тебе: во крови твоей живот твой:

⁷умножайся, якоже прозябение селное дах тя, и умножилася еси и возвеличилася и вошла еси во грады градов: сосцы твои возрастоша, и власи твои просветлеша, ты же была еси нага и без красы.

⁸И проидох сквозе тя и видех тя: и се, время твое, яко время витающих: и прострох криле мои на тя и прикрых студ твой, и кляхся тебе и внидох в завет с тобою, глаголет адонаи Господь, и была еси мне:

⁹и омых тя водою и ополосках кровь твою от тебе и помазах тя елеем,

¹⁰и облекох тя в пестроты и обух тя в червлены, и препоясах тя виссоном и возложих на тя трихаптон,

¹¹и украсих тя утварию и возложих запястие на руце твои и гривну на выю твою,

¹²и дах усерязи на ноздри твоя и колца во ушы твои и венец хвалы на главу твою:

¹³и украшенна была еси златом и сребром, и одежды твоя виссонны и трихапты и испещрения, семидал и мед и масло яла еси, и была еси добра зело зело, и управилася еси на царство:

¹⁴и изыде имя твое во языки в доброте твоей, зане совершенно бе лепотою в красоте, юже учиних на тебе, глаголет адонаи Господь.

¹⁵Ты же уповала еси на доброту твою и соблудила еси во имени твоем и излияла еси блужение твое на всякаго мимоходящаго, тому была еси, емуже не подобаше:

¹⁶и взяла еси от риз твоих и сотворила себе кумиры сошвеныя и соблудила еси с ними, и не внидеши, и не будет.

¹⁷И взяла еси сосуды хвалы твоея от сребра моего и злата моего, от нихже дах тебе, и сотворила себе образы мужески, и соблудила еси в них.

¹⁸И взяла еси ризы своя испещренныя и одеялася еси в ня, и масло мое и фимиам мой положила еси пред лицем их,

¹⁹и хлебы моя, яже дах тебе, семидалом и маслом и медом напитах тя, и положила еси та пред лицем их в воню благоухания. И бысть по сих, глаголет адонаи Господь,

²⁰и взяла еси сыны твоя и дщери твоя, яже родила еси, и заклала еси им в потребление. Еда мало соблудила еси?

²¹И заклала еси чада твоя и дала еси я, внегда принесла еси их на жертву им.

²²Сие паче всякаго блуда твоего и гнусностей твоих: и не помянула еси дний младенства твоего, егда была еси нага и безобразна, и смешена во крови твоей жила еси.

²³И бысть по всех злобах твоих, горе горе тебе, глаголет адонаи Господь,

²⁴и создала еси себе храм блуднический и сотворила себе полагания на всех стогнах:

²⁵и в начале всякаго пути создала еси блудилища своя и растлила доброту твою, и разложила голени твоя всякому мимоходящему и умножила еси блуд твой:

²⁶и соблудила с сынми египетскими соседы твоими дебелоплотными, и многажды блудила еси, еже разгневати мя.

²⁷И се, простру руку мою на тя и отвергу законы твоя и предам тя душам ненавидящым тебе, дщерем иноплеменников, совращающым тя с пути твоего, имже нечествовала еси.

²⁸И соблудила еси с сынми ассировыми и ниже тако насытилася еси: и соблудила и не насытилася,

²⁹и умножила заветы твоя ко земли хананейстей, халдейстей, и ниже в сих насытилася еси.

³⁰Что сотворю сердцу твоему, глаголет адонаи Господь, внегда твориши вся сия дела жены блудницы продерзыя? И соблудила еси трегубо во дщерех твоих.

³¹Егда соградила еси блудилище твое в начале всякаго пути и высокая твоя сотворила еси на всех стогнах, и не была яко блудница собирающая наем.

³²Жена любодейница подобна тебе, от мужа своего вземлющи наем,

³³всем блудившым с нею даяше наем: и ты дала еси наем всем рачителем твоим и обременяла их, еже приходити им к тебе отвсюду в блужения твоя.

³⁴И бысть в тебе сопротивно обычаю женску во блужении твоем, и с тобою соблудившым, вместо еже бы дати тебе наем, и наем не дадеся тебе, и бысть в тебе сопротивно.

³⁵Сего ради слыши, блуднице, слово Господне.

³⁶Сия глаголет адонаи Господь: зане излияла еси медь твою, и открыется срам твой во блужении твоем ко рачителем твоим, и во вся помышления беззаконий твоих, и во крови чад твоих, яже дала еси им:

³⁷сего ради, се, аз на тя соберу вся похотники твоя, с нимиже смесилася еси, и всех, ихже любила еси, со всеми, ихже ненавидела еси: и соберу я на тя отвсюду и открыю злобы твоя к ним, и узрят весь срам твой.

³⁸И отмщу ти отмщением любодейцы и проливающия кровь, и положу тя во крови ярости и рвения,

³⁹и предам тя в руце их, и раскопают блудилище твое и разорят высокая твоя, и совлекут с тебе ризы твоя и возмут сосуды хвалы твоея, и оставят тя нагу и безстудну:

⁴⁰и приведут на тя народы, и побиют тебе камением и изсекут тя мечьми своими,

⁴¹и запалят домы твоя огнем и сотворят в тебе отмщение пред женами многими: и обращу тя от блужения, и найма ктому не даси.

⁴²И послю ярость мою на тя, и отимется рвение мое от тебе: и почию и ктому не попекуся.

⁴³Понеже не помянула еси дний младенства твоего и опечалила мя во всех сих: и се, аз пути твоя на главу твою дах, глаголет адонаи Господь: и тако сотворила еси нечестие по всем беззаконием твоим.

⁴⁴Сия суть вся, елика рекоша на тя в притчи, глаголюще: якоже мати, тако и дщерь.

⁴⁵Дщерь матере твоея ты еси, отринувшая мужа своего и чада своя: и сестры сестр твоих, отринувшыя мужей своих и чад своих: мати ваша хеттеаныня, а отец ваш аморрей:

⁴⁶сестра ваша старейшая самариа, та и дщери ея живущыя ошуюю тебе: и сестра твоя меншая, живущая одесную тебе, содома и дщери ея.

⁴⁷Но ниже по путем их ходила еси, ниже сотворила по беззаконием их поне мало, и превозшла еси их во всех путех твоих.

⁴⁸Живу аз, глаголет адонаи Господь, не сотворила содома сия сестра твоя и дщери ея, якоже ты сотворила и дщери твоя.

⁴⁹Обаче сие беззаконие содомы сестры твоея, гордость в сытости хлеба и во изюбилии вина, и сластолюбствоваша та и дщери ея: сие бяше ей и дщерем ея: и руки убогому и нищему не подаяху,

⁵⁰и величахуся, и сотвориша беззакония предо мною: и отвергох я якоже видех.

⁵¹Самариа же пол грехов твоих не согреши: и умножила еси беззакония твоя паче онех, и оправдала еси сестры твоя во всех беззакониих твоих, яже сотворила еси.

⁵²И ты приими мучение твое, в немже растлила еси сестры твоя во гресех твоих, имиже беззаконновала паче тех, и оправдала их паче тебе: и ты посрамися и приими безчестие твое, внегда оправдати тебе сестры твоя.

⁵³И обращу обращения их, обращение содомы и дщерей ея, и обращение самарии и дщерей ея, и обращу обращение твое среде их,

⁵⁴яко да приимеши мучение твое и безчестна будеши от всех, яже сотворила еси во разгневании моем.

⁵⁵И сестра твоя содома и дщери ея возставятся, якоже беша исперва: и самариа и дщери ея возставятся, якоже беша исперва: и ты и дщери твоя возставитеся, якоже бесте прежде.

⁵⁶И не была содома сестра твоя во слышание во устех твоих во днех гордыни твоея,

⁵⁷прежде откровения злоб твоих, якоже ныне укоризна еси дщерей сирских и всех сущих окрест ея дщерей иноплеменничих одержащих тя окрест:

⁵⁸нечестия твоя и беззакония твоя ты понесла еси я, глаголет Господь.

⁵⁹Сия глаголет адонаи Господь: и сотворю в тебе, якоже сотворила еси, якоже презрела еси еже преступити завет мой:

⁶⁰и воспомяну аз завет мой, иже с тобою во днех младенства твоего, и возставлю тебе завет вечный:

⁶¹и помянеши пути твоя и безчестна будеши, внегда поймеши сестры твоя старейшыя со юнейшими твоими, и дам я тебе на созидание, но не от завета твоего:

⁶²и возставлю аз завет мой с тобою, и увеси, яко аз Господь:

⁶³яко да помянеши и усрамишися, и не будет тебе ктому отверсти уст твоих от лица безчестия твоего, егда милостив буду тебе по всем, елика сотворила еси, глаголет адонаи Господь.