Read Елизаветинская Библия, 1751 Иезекииль 18 Bible Online

Иезекииль 18 - Елизаветинская Библия, 1751 bible

Иезекииль 18

¹И бысть слово Господне ко мне глаголя:

²сыне человечь, что вам притча сия на земли израилеве, глаголющым: отцы ядоша терпкое, а зубом чад их оскомины быша?

³Живу аз, глаголет адонаи Господь, аще будет еще глаголема притча сия во израили.

⁴Яко вся душы моя суть, якоже душа отча, тако и душа сыновня, моя суть: душа, яже согрешит, та умрет, и зобавшаго пародки зубы оскоминны будут.

⁵Человек же, иже есть праведен творяй суд и правду,

⁶на горах не снесть и очес своих не воздвигнет на кумиры дому израилева, и жены ближняго своего не осквернавит и к жене в месячных сущей не приближится,

⁷и человеку не насильствует, залог должнику отдаст и хищением не восхитит, хлеб свой алчному даст и нагаго облечет в ризу,

⁸и сребра своего в лихву не даст и прибытка не возмет, и от неправды отвратит руку свою и суд сотворит между мужем и ближним своим,

⁹и в заповедех моих ходил и оправдания моя снабдел, еже творити та: праведен сей есть, жизнию жити имать, глаголет адонаи Господь.

¹⁰И аще родит сына губителя, проливающаго кровь и творяща грехи,

¹¹в путь отца своего праведнаго не ходил, но и на горах пожре, и жену ближняго своего осквернавил,

¹²и убогаго и нищаго преобиде, и хищением восхитил и залога не отдал, и к кумиром положи очи свои, беззакония сотвори,

¹³с лихвою даде и с примножением приял, сей жизнию не поживет: вся сия беззакония сотвори, смертию умрет, кровь его на нем будет.

¹⁴Аще же родит сына, он же увидит вся грехи отца своего, яже сотворил есть, и убоится и не сотворит по ним,

¹⁵на горах не снесть и очес своих не положит к кумиром дому израилева, и жены подруга своего не осквернавит

¹⁶и человека не насильствует, и залога не удержит и хищением не восхитит, хлеб свои алчному даст и нага одеет ризою,

¹⁷и от неправды отвратит руку свою, лихвы и примножения не возмет, правду сотворит и в заповедех моих ходити будет: не скончается в неправдах отца своего, (но) жизнию поживет.

¹⁸Отец же его аще скорбию оскорбит и хищением восхитит, сопротивная сотворит посреде людий моих, и умрет в неправдах своих.

¹⁹И речете: что яко не взя сын неправды отца своего? Понеже сын правду и милость сотвори, вся законы моя соблюде и сотвори я, жизнию поживет.

²⁰Душа же согрешающая, та умрет: сын не возмет неправды отца своего, и отец не возмет неправды сына своего: правда праведнаго на нем будет, и беззаконие беззаконника на нем будет.

²¹И беззаконник аще обратится от всех беззаконий своих, яже сотворил, и сохранит вся заповеди моя и сотворит суд и правду и милость, жизнию поживет и не умрет:

²²вся согрешения его, елика сотворил, не помянутся ему: но в правде своей, юже сотворил, жив будет.

²³Еда хотением восхощу смерти грешника, глаголет адонаи Господь, а не еже обратитися ему от пути зла и живу быти ему?

²⁴И аще совратится праведник от правды своея и сотворит неправду по всем беззаконием, яже сотворил беззаконник, вся правды его, яже сотворил есть, не помянутся: в преступлении своем, имже преступи, и во гресех своих, имиже согреши, в них умрет.

²⁵И рекосте: не управится путь Господень. Слышите убо, весь дом израилев, еда путь мой не управится? ваш ли путь убо управится?

²⁶Егда совратится праведник от правды своея и сотворит грех, и умрет в преступлении, еже сотворил, в том умрет.

²⁷И егда обратится беззаконник от беззакония своего, еже сотворил, и сотворит суд и правду, той душу свою снабдел есть:

²⁸и виде и обратися от всех беззаконии своих, яже сотвори, жизнию поживет и не умрет.

²⁹И глаголет дом израилев: не управится путь Господень. Еда путь мой не управляется? о, доме израилев, убо ваш ли путь управляется?

³⁰(Сего ради) комуждо по пути его сужду вам, доме израилев, глаголет адонаи Господь: обратитеся и отвержитеся от всех нечестий ваших, и не будут вам неправды в мучение:

³¹отвержите от себе вся нечестия ваша, имиже нечествовасте ко мне, и сотворите себе сердце ново и дух нов, и сотворите вся заповеди моя: и вскую умираете, доме израилев? глаголет Господь.

³²Понеже не хощу смерти грешника умирающаго, глаголет адонаи Господь, но еже обратитися ему от пути своего и жити души его, глаголет адонаи Господь: обратитеся убо, и живи будете.