Read Елизаветинская Библия, 1751 Иезекииль 23 Bible Online

Иезекииль 23 - Елизаветинская Библия, 1751 bible

Иезекииль 23

²сыне человечь, две жене бесте дщери матере единыя

³и соблудисте во египте, в юности своей соблудисте: тамо спадоша сосцы их, и тамо растлисте девство.

⁴Имена же има: оола старейшая, оолива же меншая сестра ея: и бысте мне и родисте сыны и дщери: имена же има: самариа оола, и Иерусалим оолива.

⁵И соблуди оола от мене и возложися на похотники своя, на ассирианы приближающыяся ей,

⁶облеченныя в червленицы, старейшины и воеводы: юноши избраннии, вси конницы яздящии на конех:

⁷и даде блужение свое к ним: избранным сыном ассирийским всем, и ко всем, на няже возлагашеся, во всех нечистотах их оскверняшеся:

⁸и блужения своего, еже из египта, не остави, яко с нею спаху в юности ея, и тии растлиша девство ея и излияша блужение свое на ню.

⁹Того ради предах ю в руце похотником ея, в руце сыном ассирийским, на нихже возлагашеся.

¹⁰Тии открыша стыд ея, сыны и дщери ея пояша и самую мечем усекнуша: и бысть поношение в женах, и отмщение сотвориша в ней во дщерех ея.

¹¹И виде сестра ея оолива, и растли возложение свое паче ея, и блуд свой паче блуда сестры своея умножи:

¹²на сынов ассирийских возложися, на старейшины и воеводы, иже близ ея, облеченны во благоистканны, на конники яздящыя на конех, юноши избранни вси.

¹³И видех, яко осквернися путь един обою.

¹⁴И приложи ко блужению своему, и виде мужы написаны на стене, образы халдейски написаны шарами,

¹⁵препоясаны пестротами о чреслех своих, и превои крашеннии на главах их, вид троякий всех, подобие сынов вавилонских, халдейских, земли отечества их:

¹⁶и возложися на ня зрением очей своих, и посла послы к ним в землю халдейску.

¹⁷И приидоша к ней сынове вавилонстии на ложе витающих и оскверниша ю в блужении ея, и осквернися в них, и отступи душа ея от них:

¹⁸и откры блужение свое и откры срамоту свою. И отступи душа моя от нея, якоже отступи душа моя от сестры ея.

¹⁹И умножила еси блужение твое, еже помянути дни юности твоея, в няже блудила еси во египте,

²⁰и возлегла еси на халдеи, ихже плоти быша аки плоти осли, и яко лона конская лона их,

²¹и посетила еси беззаконие юности твоея, яже творила еси во египте во виталищи твоем, идеже сосцы юности твоея спадоста.

²²Того ради, ооливо, сия глаголет адонаи Господь: се, аз воздвигну похотники твоя на тя, от нихже отступи душа твоя, и наведу их на тя окрест,

²³сынов вавилонских и всех халдеев, факуда и суда и куда, и вся сыны ассирийски с ними, юношы избранны, старейшины и воеводы, вся тристаты и нарочитыя, конники на конех вси.

²⁴И приидут на тя вси от севера, колесницы и колеса со многим народом, щиты и сулицы и шлемы, и поставят стражбу окрест тебе, и дам пред лицем их суд, и отмстят ти в судех своих:

²⁵и дам рвение мое в тебе, и сотворят с тобою гнев ярости моея, ноздри твоя и ушы твои обрежут, и оставших твоих мечем изсекут: тии сынов твоих и дщерей твоих возмут, и оставших твоих потребит огнь:

²⁶и совлекут с тебе ризы твоя и возмут сосуды хвалы твоея.

²⁷И отвращу нечестия твоя от тебе и блуд твой от земли египетския: и не воздвигнеши очес твоих на них и египта не помянеши ктому.

²⁸Понеже сия глаголет адонаи Господь: се, аз предаю тя в руце, ихже ненавидиши, от нихже отступи душа твоя:

²⁹и сотворят в тебе в ненависти, и возмут вся труды твоя и дела твоя, и будеши нага и посрамлена, и открыется студ блуда твоего и нечестие твое.

³⁰И блужение твое сотвори сия тебе, егда блудила еси вслед языков и осквернялася в кумирех их:

³¹в пути сестры твоея ходила еси, и дам чашу ея в руце твои.

³²Сия глаголет адонаи Господь: чашу сестры твоея испиеши глубокую и широкую, и будет на смех и подражнение, изюбилную ко совершению пиянства,

³³и разслабления наполнишися: чаша же потребления и погубления чаша сестры твоея самарии:

³⁴и испиеши ю и истощиши, и чреп ея ядущи потребиши, и сосца твоя отторгнеши: и праздники и новомесячия твоя отвращу: понеже аз глаголах, рече адонаи Господь.

³⁵Сего ради сия глаголет адонаи Господь: понеже забыла мя еси и отвергла мене назад тела твоего, и ты возми нечестие твое и блуд твой.

³⁶И рече Господь ко мне: сыне человечь, не будеши ли судити ооле и ооливе, и возвестиши ли има беззакония ею?

³⁷яко любодействовасте, и кровь в руках ею, и в кумирех ею прелюбодействовасте, и чада своя, яже родисте мне, провождасте им сквозе огнь.

³⁸Даже и сия сотвористе ми, осквернясте святая моя в той день, и субботы моя осквернясте:

³⁹и внегда закаласте чада своя кумиром своим, и вхождасте во святая моя в той день, еже сквернити я: и се, тако творясте среде дому моего:

⁴⁰и посыласте ко мужем грядущым издалеча, к нимже послов посыласте. И егда приходити им, абие умывалася еси и утваряла еси очи твои и украшалася утварию,

⁴¹и седела еси на одре постлане, и трапеза украшенна пред лицем ея, и фимиам мой и елей мой предлагала пред ними, и веселяхуся в них:

⁴²и гласом сличным возглашаху, и ко мужем от множества человеча приходящым от пустыни, и даяху перстни на руки их и венец хвалы на главы их.

⁴³И рекох: не в сих ли прелюбодействуют? и дела блудницы, и сама соблуди.

⁴⁴И вхождаху к ней: якоже влазят к жене блуднице, тако влазяху ко ооле и ко ооливе, женам беззаконницам, еже сотворити беззаконие.

⁴⁵Мужие же праведнии, тии и отмстят има отмщением любодейниц и отмщением проливающих кровь, яко любодейцы суть, и кровь в руках их.

⁴⁶Сия глаголет адонаи Господь: приведи на них народы и даждь на них мятеж и разграбление,

⁴⁷и вержи камение на них, камение народов, и да избодут их мечьми своими: сыны их и дщери их избиют и домы их огнем сожгут:

⁴⁸и отвращу нечестие от земли, и накажутся вся жены и не сотворят по нечестием их:

⁴⁹и дастся нечестие ваше на вы: и (вся) грехи кумир ваших приимете и уразумеете, яко аз адонаи Господь.