Read Елизаветинская Библия, 1751 Иезекииль 24 Bible Online

Иезекииль 24 - Елизаветинская Библия, 1751 bible

Иезекииль 24

¹И бысть слово Господне ко мне, в девятое лето, в месяц десятый, в десятый день месяца, глаголя:

²сыне человечь, напиши себе имя дне сего, от негоже укрепися царь вавилонский на Иерусалим, от сего дне, иже днесь,

³и рцы притчу к дому прогневляющему, и речеши к ним: сия глаголет адонаи Господь: настави коноб, настави и влий в онь воду,

⁴и верзи в онь на двое разсеченая, всякое разсечение доброе, голень и рамо, обрезана от костей,

⁵от избранных скотов взятая, и подгнещай костьми под ними: возвре и воскипе, и сваришася кости его посреде его.

⁶Того ради сия глаголет адонаи Господь: о, граде кровей! конобе, в немже есть яд, и яд не изыде из него: по удом его изнесе, не паде на нем жребий.

⁷Яко кровь его среде его есть, на гладцем камени вчиних ю: не пролиях ея на землю, еже покрыти ю землею,

⁸еже навести ярость мою (на ню), во отмщение еже отмстити: дах кровь его на гладцем камени, еже не покрыти ея.

⁹Того ради сия глаголет адонаи Господь: о, люте, граде кровей! аз же возвеличу главню

¹⁰и умножу дрова и возгнещу огнь, яко да истают мяса, и оскудеет юха, и кости истают,

¹¹и станет на главнях его, (тощь) разгореся, яко да изгорит, и распалится и сгорит медь его, и истает среде его нечистота его, и оскудеет яд его:

¹²да смирится яд его, и не изыдет из него многий яд его, и посрамится яд его:

¹³в нечистоте твоей укроп, понеже осквернялся еси ты и не очистился от нечистоты твоея: и что будет аще не очистишися по сем, дондеже исполню ярость мою в тебе?

¹⁴Аз Господь глаголах, и приидет, и сотворю, и не укосню, и не пощажу, и не буду умолен: по путем твоим и по помыслом твоим сужду тебе, глаголет адонаи Господь: сего ради, се, аз сужду тебе по кровем твоим и по помыслом твоим сужду тебе, нечисте, пресловуте и великий на разгневание.

¹⁵И бысть слово Господне ко мне глаголя:

¹⁶сыне человечь, се, аз вземлю от тебе желания очес твоих в поражении, не восплачи, ниже возрыдай, ниже да приидут тебе слезы,

¹⁷возстени молчя: стенание крове, чресл плачь есть: да будут власи твои сплетени на тебе, и сапози твои на ногах твоих, и да не утешишися устнами их, и хлеба мужей да не снеси.

¹⁸И глаголах к людем заутра, якоже заповеда ми, и умре жена моя в вечер, и сотворих заутра, якоже повелеся ми.

¹⁹И рекоша ко мне людие: не возвестиши ли нам, что суть сия, яже ты твориши?

²⁰И рекох к ним: слово Господне бысть ко мне глаголя:

²¹рцы к дому израилеву, сия глаголет адонаи Господь: се, аз оскверню святая моя, величания крепости вашея, желания очес ваших, и ихже щадят души вашя: и сынове ваши и дщери вашя, яже остависте, мечем падут:

²²и сотворите, якоже аз сотворих: от уст их не утешитеся и хлеба мужей не снесте,

²³и власи ваши на главах ваших, и сапози ваши на ногах ваших: не будете терзатися, ниже плакати, и истаете в неправдах ваших, и не утешите кийждо брата своего.

²⁴И будет вам иезекииль в чудо: по всему елика сотворих, сотворите: егда приидут сия, и уразумеете, яко аз адонаи Господь.

²⁵И ты, сыне человечь, не в день ли той, егда возму от них крепость их, вознесение хвальбы их, желания очию их и возношение души их, сыны их и дщери их:

²⁶в той день приидет уцелевый к тебе возвестити тебе во ушы,

²⁷в той день отверзутся уста твоя ко уцелевшему, и возглаголеши и не премолчиши ктому, и будеши им в чудо: и уведят, яко аз адонаи Господь.