Read Елизаветинская Библия, 1751 Иезекииль 27 Bible Online

Иезекииль 27 - Елизаветинская Библия, 1751 bible

Иезекииль 27

¹И бысть слово Господне ко мне глаголя:

²и ты, сыне человечь, возми на сор плачь,

³и речеши сору населенному на морстем входе, торжищу людий от островов многих, сия глаголет адонаи Господь сору: ты рекл еси: аз сам возложих на мя мою доброту,

⁴в сердцы морстем веелиму, и сынове твои возложиша на тя доброту.

⁵Кедр от санира истесася тебе, тонкия доски кипарисныя от ливана взяты быша, еже сотворити тебе ядрила елова:

⁶от васанитиды сотвориша весла твоя: святилища твоя состроиша от слоновых (костей), домы древяны от островов хеттиимских:

⁷виссон со испещрением от египта бысть тебе постеля, еже обложити тебе славу и облещи тя в синету и во багряницу от островов елиссе, и бысть одежда твоя.

⁸И князи твои живущии во сидоне и арадиане быша весленицы твои: премудрии твои, сор, иже быша в тебе, сии кормчии твои.

⁹Старейшины вивлийстии и премудрии их, иже быша в тебе, тии укрепляху совет твой: и вси корабли морстии и весленицы их быша в тебе ко западом западов.

¹⁰Персяне и лидяне и ливиане беша в силе твоей, мужие доблии твои щиты и шлемы повесиша в тебе, сии даша славу твою.

¹¹Сынове арадийстии и сила твоя на забралех твоих окрест: но и мидяне во пиргах твоих быша стражие, тулы своя обесиша на забралех твоих окрест: сии совершиша твою доброту.

¹²Кархидоняне купцы твои, от множества силы твоея, сребро и злато, и медь и железо, и чистое олово и свинец даша куплю твою.

¹³Еллада вся и ближнии твои продаяху в тебе душы человечы, и сосуды медяны даша куплю твою.

¹⁴От дому форгамова кони и конники и мщята даша куплю твою.

¹⁵Сынове родийстии купцы твои от островов умножиша куплю твою, зубы слоновы, и вводимым воздавал еси мзды твоя.

¹⁶Человеки куплю твою от множества примешенца твоего, стакти и пестроты и синету от фарсиса, и рамоф и хорхор даша куплю твою.

¹⁷Иуда и сынове израилевы, сии купцы твои: продаянием пшеницы и миров и касии, и первый мед и елей и ритину даша примешенцу твоему.

¹⁸Дамаск купцы твои от множества всея силы твоея, вино от хелвона, и волну блещащуся от милита, и вино деданово и ионаново и меозелево в куплю твою даша.

¹⁹От ассиила железо деланое и колеса в примесницех твоих суть.

²⁰Дедан купцы твои со скоты избранными в колесницы.

²¹Аравиа и вси князи кидарстии, сии купцы рукою твоею, велблюды и овны и агнцы в тебе продадят, имиже куплю творят.

²²Купцы савы и раммы, тии купцы твои с первыми сладостьми и со камением драгим, и злато даша куплю тебе.

²³Харран, ханаа и дедан, сии купцы твои: сава, ассур и харман купцы твои,

²⁴приносяще куплю синету и червленицу, и испещренная и сокровища избранная связана ужами, и кипарисная.

²⁵Корабли, в тех купля твоя, (корабли) кархидонстии купцы твои, во множестве смесник твоих, и насытился еси, и отягчал зело в сердцах морских.

²⁶В воде мнозе привождаху тя весленицы твои: ветр южный сокруши тя в сердцы морстем.

²⁷Быша силы твоя и мзда твоя от смесник твоих, и весленицы твои и кормчии твои, и советницы твои и смесницы от смесников твоих, и вси мужие твои доблии в тебе и весь сонм твой падут среде тебе в сердцы морстем, в день падения твоего.

²⁸От гласа вопля твоего кормчии твои страхом убоятся.

²⁹И снидут с кораблей своих вси весленицы твои, и всадницы и ловцы морстии на земли станут:

³⁰и воскликнут на тя гласом своим, и воскричат горце, и возложат землю на главы своя, и прах постелют:

³¹и оплешивеют над тобою плешьми, и облекутся во вретище, и восплачутся о тебе в горести души, и плачем горьким ужаснутся:

³²и возмут о тебе сынове их плачь, возрыдают плаканием о тебе: кто якоже тир умолкнувый среде моря? колику обрел еси мзду от моря?

³³Наполнил еси страны от множества твоего и от смесник твоих обогатил еси вся цари земныя.

³⁴Ныне же сокрушился еси в мори, во глубинах водных смесницы твои, и весь сонм твой среде тебе падоша, и вси весленицы твои.

³⁵Вси же живущии во островех уныли по тебе, и царие их ужасом ужасошася, и прослезися лице их.

³⁶Купцы от язык позвиждут о тебе, в погибель был еси, и ктому не будеши в век, глаголет Господь Бог.