Read Елизаветинская Библия, 1751 Иезекииль 28 Bible Online

Иезекииль 28 - Елизаветинская Библия, 1751 bible

Иезекииль 28

¹И бысть слово Господне ко мне глаголя:

²и ты, сыне человечь, рцы князю тирску: сия глаголет адонаи Господь: понеже вознесеся сердце твое, и рекл еси: аз есмь Бог, в селение Божие вселихся в сердцы морстем: ты же человек еси, а не Бог, и положил еси сердце твое яко сердце Божие.

³Еда премудрее ты еси даниила? премудрии не наказаша тебе хитростию своею.

⁴Еда хитростию твоею или смыслом твоим сотворил еси себе силу и притяжал еси сребро и злато в сокровищих твоих?

⁵или во мнозей хитрости твоей и в купли твоей умножил еси силу твою? вознесеся сердце твое в силе твоей.

⁶Того ради сия глаголет адонаи Господь: понеже дал еси сердце свое яко сердце Божие,

⁷вместо сего, се, аз наведу на тя чуждыя губители от язык, и извлекут мечы своя на тя и на доброту хитрости твоея, и постелют доброту твою в погубление,

⁸и сведут тя, и умреши смертию язвеных в сердцы морстем.

⁹Еда речеши глаголя пред убивающими тя: Бог есмь аз? ты же человек еси, а не Бог, в руце убивающих тя.

¹⁰Смертьми необрезаных умреши в руках чуждих: яко аз рекох, глаголет адонаи Господь.

¹¹И бысть слово Господне ко мне глаголя:

¹²сыне человечь, возми плачь на князя тирска и рцы ему: сия глаголет адонаи Господь: ты еси печать уподобления, исполнен премудрости и венец доброты,

¹³в сладости рая Божия был еси, всяким камением драгим украсился еси, сардием и топазием, и смарагдом и иакинфом, и анфраксом и сапфиром, и иасписом и сребром и златом, и лигирием и ахатом, и амефистом и хрисолифом, и вириллием и онихом и златом наполнил еси сокровища твоя и житницы твоя, от негоже дне создан еси.

¹⁴Ты, с херувимом вчиних тя в горе святей Божии, был еси среде каменей огненных.

¹⁵Был еси ты непорочен во днех твоих, от негоже дне создан еси, дондеже обретошася неправды в тебе.

¹⁶От множества купли твоея наполнил еси сокровища твоя беззакония, и согрешил еси, и уязвлен еси от горы Божия: и сведе тя херувим осеняяй от среды камыков огненных.

¹⁷Вознесеся сердце твое в доброте твоей, истле хитрость твоя с добротою твоею: множества ради грехов твоих на землю повергох тя, пред цари дах тя во обличение.

¹⁸Множества ради грехов твоих и неправд купли твоея, осквернил еси святая твоя, и изведу огнь от среды твоея, сей снесть тя: и дам тя во прах на земли пред всеми видящими тя.

¹⁹И вси ведящии тебе во языцех возстенут по тебе: пагуба учинен еси, и не будеши ктому во век.

²⁰И бысть слово Господне ко мне глаголя:

²¹сыне человечь, утверди лице твое на сидона и прорцы о нем и рцы:

²²сия глаголет адонаи Господь: се, аз на тя, сидоне, и прославлюся в тебе, и уразумееши, яко аз есмь Господь, егда сотворю в тебе суд и освящуся в тебе:

²³и послю на тя смерть, и кровь в стогнах твоих будет, и падут язвении среде тебе мечем, в тебе и окрест тебе, и уведят, яко аз Господь:

²⁴и не будет ктому дому израилеву остен горести и терн болезни от всех окрестных его обезчестивших их, и уразумеют, яко аз есмь адонаи Господь.

²⁵Тако глаголет адонаи Господь: и соберу дом израилев от язык, идеже разсыпашася тамо, и освящуся в них пред людьми и языки: и вселятся на земли своей, юже дах рабу моему иакову,

²⁶и населятся на ней с надеждею, и созиждут домы, и насадят винограды, и вселятся на ней с надеждею, егда сотворю суд во всех, иже укориша я во окрестных их: и уразумеют, яко аз Господь Бог их и Бог отцев их.