Read Елизаветинская Библия, 1751 Иезекииль 29 Bible Online

Иезекииль 29 - Елизаветинская Библия, 1751 bible

Иезекииль 29

¹В десятое лето, в десятый месяц, (в первый день) месяца, бысть слово Господне ко мне глаголя:

²сыне человечь, утверди лице твое на фараона царя египетска и прорцы нань и на египет весь:

³глаголи и рцы: сице глаголет адонаи Господь: се, аз наведу на тя, фараоне, царю египетский, змиа великаго, седящаго среде рек своих, глаголющаго: моя суть реки, и аз сотворих я.

⁴Аз же дам узду в челюсти твоя, и прилеплю рыбы реки твоея ко крилома твоима, и возведу тя от среды реки твоея, и к чешуям твоим прильпнут:

⁵и низвергу тя вскоре и вся рыбы реки твоея: на лицы поля падеши, и не соберешися, и не оградишися, зверем земным и птицам небесным дах тя во снедь.

⁶И уведят вси живущии во египте, яко аз есмь Господь: зане был еси жезл тростян дому израилеву:

⁷егда яся тебе рукою своею, сокрушился еси, и егда восплеска на них всяка рука, и егда почиша на тебе, стерлся еси и сломил еси их вся чресла.

⁸Сего ради тако глаголет адонаи Господь: се, аз наведу на тя мечь и погублю от тебе человеки и скоты,

⁹и будет земля египетска в погибель и во опустение, и уразумеют, яко аз есмь Господь. Понеже глаголал еси, яко реки моя суть, и аз сотворих я:

¹⁰того ради, се, аз на тя и на и вся реки твоя, и дам землю египетску во опустение и в мечь и в погибель, от магдола и сиины и даже до предел ефиопских:

¹¹не пройдет сквозе ея нога человеча, ни нога скотия не поступит по ней, и не населится четыредесять лет:

¹²и дам землю его в пагубу среде земли опустелыя, и гради его среде градов опустевших будут, в разорении будут четыредесять лет: и разсею египта во языцех, и развею я по странам.

¹³Сия глаголет адонаи Господь: по четыредесятих летех соберу египтяны от язык, аможе разсыпашася,

¹⁴и возвращу пленники египетския и вселю я в землю фафорскую, в землю, отюнудуже взяти быша, и будет власть смиренна:

¹⁵паче всех властей будет смиренна, и не вознесется ктому над языки, и умалены сотворю я, еже не быти им многим во языцех.

¹⁶И не будут ктому дому израилеву в надежду воспоминающую беззаконие, внегда последовати им по них: и уразумеют, яко аз есмь Господь.

¹⁷И бысть в двадесять седмое лето, во един день месяца перваго, бысть слово Господне ко мне глаголя:

¹⁸сыне человечь, навуходоносор царь вавилонск поработи силу свою работою великою на тира, всяка глава плешива и всяко рамо наго: и мзда не бысть ему ни силе его на тира, за работу, еюже работаша нань.

¹⁹Того ради сице глаголет адонаи Господь: се, аз даю навуходоносору царю вавилонску землю египетску, и возмет множество ея, и пленит плен ея, и расхитит корысти ея, и будет мзда силе его:

²⁰за службу его, еюже послужи на тира, дах ему землю египетску, зане послужи мне, сия глаголет адонаи Господь.

²¹В той день взыдет рог всему дому израилеву, и тебе дам уста отверста среде их, и уведят, яко аз есмь Господь.