Read Елизаветинская Библия, 1751 Иезекииль 3 Bible Online

Иезекииль 3 - Елизаветинская Библия, 1751 bible

Иезекииль 3

¹И рече ко мне: сыне человечь, снеждь свиток сей, и иди и рцы сыном израилевым.

²И отверзох уста моя, и напита мя свитком сим

³и рече ко мне: сыне человечь, уста твоя снедят, и чрево твое насытится свитка сего даннаго тебе. и снедох его, и бысть во устех моих яко мед сладок.

⁴И рече ко мне: сыне человечь иди и вниди в дом израилев, и глаголи словеса моя к ним:

⁵яко не к людем глубокоречивым и косноязычным посылаемь еси, к дому израилеву,

⁶ниже к людем многим иноязычным, иноречивым, ни тяжким языком сущым, ихже не разумел бы еси словес: аще же и к тацем послал бых тя, то и тии послушали быша тебе:

⁷а дом израилев не восхощет послушати тебе, понеже не хотят слушати мене, яко весь дом израилев непокориви суть и жестокосерди:

⁸и се, дах лице твое сильно противу лица их, и прю твою укреплю противу при их:

⁹и будет, всегда крепчае камене дах прю твою: не убойся их, ни ужасайся лица их, зане дом разгневаяй есть.

¹⁰И рече ко мне: сыне человечь, вся словеса, яже глаголах с тобою, возми в сердце твое и ушима твоима послушай:

¹¹и шед вниди в плен к сыном людий твоих, и речеши к ним и возглаголеши к ним: тако глаголет адонаи Господь: аще убо послушают и аще убо повинутся.

¹²И взя мя дух, и слышах глас за собою труса велика, глаголющих: благословена слава Господня от места его.

¹³И видех глас крил животных скриляющихся друг ко другу, и глас колес держащься их, и глас труса велика.

¹⁴И дух воздвиже мя и взя мя, и поидох вознесен во устремлении духа моего, и рука Господня бысть на мне крепкая.

¹⁵И внидох в пленники вознесен, и обыдох живущыя на реце ховар, и седох ту седмь дний, ходя посреде их.

¹⁶И бысть по седмих днех слово Господне ко мне глаголя:

¹⁷сыне человечь стража дах тя дому израилеву, да слышиши слово от уст моих и воспретиши им от мене.

¹⁸Внегда глаголати ми беззаконнику: смертию умреши: и не возвестиши ему, ни соглаголеши, еже остатися беззаконнику и обратитися от пути своего, еже живу быти ему: беззаконник той в беззаконии своем умрет, крове же его от руки твоея взыщу.

¹⁹И ты аще возвестиши беззаконнику, и не обратится от беззакония своего и от пути своего (беззаконна): той беззаконник во беззаконии своем умрет, а ты душу твою избавиши.

²⁰И егда совратится праведник от правд своих и сотворит согрешение: и дам муку пред ним, той умрет, яко ты не воспретил еси ему, и во гресех своих умрет, зане не помянутся правды его, яже сотвори: крове же его от руки твоея взыщу.

²¹Ты же аще возвестиши праведному, еже не согрешити, и той не согрешит: праведный жизнию поживет, яко воспретил еси ему, и ты твою душу избавиши.

²²И бысть на мне рука Господня, и рече ко мне: востани и изыди на поле, и тамо возглаголется к тебе.

²³И востах и изыдох на поле: и се, тамо слава Господня стояше, якоже видение и якоже слава Господня, юже видех на реце ховар, и падох на лицы моем.

²⁴И прииде на мя дух и постави мя на ногу моею: и глагола ко мне и рече ми: вниди и затворися среде дому твоего.

²⁵И ты, сыне человечь, се, дашася на тя узы, и свяжут тя ими, и не изыдеши от среды их:

²⁶и язык твой привяжу к гортани твоему, и онемееши и не будеши им в мужа обличения, понеже дом разгневаяй есть:

²⁷и внегда глаголати ми к тебе, отверзу уста твоя, и речеши к ним: сия глаголет адонаи Господь: слышай да слышит, и не покаряяйся да не покаряется, зане дом преогорчеваяй есть.