Read Елизаветинская Библия, 1751 Иезекииль 33 Bible Online

Иезекииль 33 - Елизаветинская Библия, 1751 bible

Иезекииль 33

¹И быти слово Господне ко мне глаголя:

²сыне человечь, глаголи ко сыном людий твоих и речеши к ним: земля, на нюже аз аще наведу мечь, и поймут людие земли человека единаго от себе и поставят его себе во стража,

³и узрит мечь грядущь на землю, и вострубит трубою, и проповесть людем,

⁴и услышит услышавый глас трубы, а не сохранится, и найдет мечь и постигнет его, кровь его на главе его будет:

⁵яко слыша глас трубы и не сохранися, кровь его на нем будет: а сей, понеже сохранися, душу свою избавил.

⁶И страж, аще увидит мечь грядущь, и не вострубит трубою, (и не проповесть людем,) и людие не охранят себе, и нашед мечь возмет от них душу, та убо беззакония ради своего взяся, а крове ея от руки стража взыщу.

⁷И ты, сыне человечь, во стража дах тя дому израилеву, и услышиши от уст моих слово, и проповеси им от мене.

⁸Егда реку грешнику: грешниче, смертию умреши: и не будеши глаголати (грешнику), еже сохранитися нечестивому, (еже обратитися ему) от пути своего (и живу быти ему), той беззаконник во беззаконии своем умрет, а крове его от руки твоея взыщу.

⁹Аще же ты проповеси нечестивому путь его, еже обратитися от него, и не обратится с пути своего, той в нечестии своем умрет, а ты душу твою избавил еси.

¹⁰И ты, сыне человечь, рцы дому израилеву: сице ресте глаголюще: прелести нашя и беззакония наша в нас суть, и мы в них таем, и како нам живым быти?

¹¹Рцы им: живу аз, глаголет адонаи Господь, не хощу смерти грешника, но еже обратитися нечестивому от пути своего и живу быти ему: обращением обратитеся от пути вашего злаго: и вскую умираете, доме израилев?

¹²И ты, сыне человечь, рцы ко сыном людий твоих: правда праведника не избавит его, в оньже день прельстится: и беззаконие беззаконника не убиет, в оньже день обратится от беззакония своего: и праведник не может спастися в день греха своего.

¹³Егда реку праведнику: жизнию жив будеши: сей же уповая на правду свою и сотворит беззаконие, вся правды его не воспомянутся, в неправде своей, юже сотвори, в той умрет.

¹⁴И егда реку нечестивому: смертию умреши: и обратится от греха своего и сотворит суд и правду,

¹⁵и залог отдаст и восхищеное возвратит, беззаконник в заповедех жизни ходити будет, еже не сотворити неправды, жизнию жив будет и не умрет:

¹⁶вси греси его, яже согреши, не помянутся: понеже суд и правду сотвори, жив будет в них.

¹⁷И рекут сынове людий твоих: неправ путь Господень. И се, путь их неправ.

¹⁸Егда совратится праведник от правды своея и сотворит беззаконие, и умрет в нем.

¹⁹И егда грешник возвратится от беззакония своего и сотворит суд и правду, той жив будет в них.

²⁰И се есть, еже рекосте: неправ путь Господень. Комуждо по путем его сужду вам, доме израилев.

²¹И бысть во второенадесять лето, месяца вторагонадесять, в пятый день месяца пленения нашего, прииде ко мне от Иерусалима уцелевый глаголя: пленен бысть град.

²²И рука Господня бысть на мне в вечер, прежде пришествия его, и отверзе уста моя, дондеже прииде ко мне заутра: и отверзшаяся уста моя не затворишася ктому.

²³И бысть слово Господне ко мне глаголя:

²⁴сыне человечь, живущии на опустевших местех во земли израилеве глаголют: един бяше авраам и одержаше землю, а мы множайшии есмы, нам дана есть земля во одержание.

²⁵Того ради рцы им: сице глаголет адонаи Господь: понеже с кровию ясте и очи ваши воздвигосте ко кумиром и кровь проливаете, и землю ли наследите?

²⁶стасте с мечем вашим, сотвористе мерзости, и кийждо жену ближняго своего осквернисте, и тако ли землю имате наследити?

²⁷Того ради рцы им: сия глаголет адонаи Господь: живу аз, яко падут мечем сущии во опустевших, и иже на лицы поля, зверем польным предадутся на изядение, и сущыя во градех и иже в пещерах смертию поражу,

²⁸и дам землю на опустение, и погибнет гордость крепости ея, и опустеют горы израилевы, занеже не будет проходящаго:

²⁹и уведят, яко аз Господь: и сотворю землю их пусту, и опустеет всех ради мерзостей их, яже сотвориша.

³⁰И ты, сыне человечь, сынове людий твоих глаголющии о тебе у забрал и во вратех дворов, и глаголют кийждо ко ближнему своему и кийждо ко брату своему, глаголюще: соберимся и услышим исходящая от уст Господних.

³¹И приходят к тебе, якоже сходятся людие, и седят людие мои пред тобою, и послушают глаголов твоих, и не сотворят их: понеже лжа во устех их, и вслед скверн их сердце их ходит.

³²И будеши им яко глас песнивца сладкогласнаго благосличнаго, и услышат глаголы твоя, и не сотворят их.

³³И егда приидеши, рекут: се, прииде. И уведят, яко пророк бе среде их.