Read Елизаветинская Библия, 1751 Иезекииль 34 Bible Online

Иезекииль 34 - Елизаветинская Библия, 1751 bible

Иезекииль 34

¹И бысть слово Господне ко мне глаголя:

²сыне человечь, прорцы на пастыри израилевы, прорцы и рцы пастырем: сия глаголет адонаи Господь:

³оле, пастырие израилевы! еда пасут пастырие самих себе? не овец ли пасут пастырие? се, млеко ядите и волною одеваетеся и тучное закалаете, а овец моих не пасете:

⁴изнемогшаго не подясте и болящаго не уврачевасте, и сокрушеннаго не обязасте и заблуждающаго не обратисте, и погибшаго не взыскасте и крепкое оскорбисте трудом и властию наказасте я и наруганием.

⁵И разсыпашася овцы моя, понеже не имеяху пастырей, и быша на изядение всем зверем селным.

⁶И расточишася овцы моя по всем горам и (заблудиша) по всем холмом высоким, и на лицы всея земли разсыпашася овцы моя, и не бе взыскающаго, ни обращающаго.

⁷Того ради, о, пастырие, слышите слово Господне:

⁸живу аз, глаголет адонаи Господь, понеже учинена суть стада моя в расхищение, и овцы моя быша во снедение всем зверем селным, занеже несть пастырей, и не поискаша пастырие овец моих, но пасоша пастырие самих себе, а овец моих не пасоша:

⁹сего ради, пастырие, слышите слово Господне,

¹⁰сия глаголет адонаи Господь: се, аз на пастыри, и взыщу овец моих от рук их, и отставлю я от паствы овец моих, и не будут пасти их пастырие: ниже самих себе имут пасти, и отиму овцы моя из уст их, и ктому не будут им на изядение.

¹¹Сего ради сия глаголет адонаи Господь: се, аз взыщу овец моих и присещу их:

¹²якоже присещает пастух паству свою в день, егда есть облачен и мглян, среде овец своих разлученых, тако взыщу овец моих и избавлю я от всякаго места, аможе суть разсыпаны в день облачен и примрачен.

¹³И изведу я от язык и соберу и от стран, и введу я в землю их и упасу я на горах израилевых и в дебрех и во всем селении земли,

¹⁴на пажити блазе упасу я, на горе высоце израилеве: и будут ограды их тамо, и успнут и почиют тамо в пищи блазе, и на пажити тучне упасутся на горах израилевых.

¹⁵Аз упасу овцы моя и аз упокою я, и уразумеют, яко аз есмь Господь.

¹⁶Сия глаголет адонаи Господь: погибшее взыщу и заблудившее обращу, и сокрушенное обяжу и немощное укреплю, и крепкое снабдю и упасу я с судом.

¹⁷И вы, овцы моя, сия глаголет адонаи Господь: се, аз разсужду между овцею и овцею, и овном и козлом.

¹⁸Не доволно ли вам, яко на блазей пажити пасостеся, и останок пажити вашея ногами вашими попирасте, и устоявшуюся воду пивасте, и останок ногами вашими возмущасте,

¹⁹и овцы моя попранием ног ваших живяху, и возмущенную воду ногами вашими пияху?

²⁰Того ради сия глаголет адонаи Господь: се, аз разсужду между овчатем сильным и между овчатем немощным.

²¹Ребрами и плещами вашими реясте и рогами вашими бодосте, и всякое немощное пхасте, дондеже изгнасте я вон:

²²и спасу овцы моя, и ктому не будут на разграбление, и разсужду между овчатем и овчатем, и между овном и овном:

²³и возставлю им пастыря единаго, и упасет я, раба моего давида, той упасет я, (и той упокоит я,) и будет им пастырь,

²⁴аз же Господь буду им в Бога, и раб мой давид князь среде их: аз Господь глаголах.

²⁵И завещаю давидови завет мирный, и потреблю звери злы от земли, и вселятся в пустыни, уповающе успнут в дубравах.

²⁶И дам им окрест горы моея благословение, и испущу дождь вам во время свое, дождь благословения.

²⁷И древеса на поли дадят плод свой, и земля даст силу свою, и вселятся на земли своей с надеждею мира, и уведят, яко аз есмь Господь, егда сокрушу узы ига их: и избавлю я из руки поработивших я,

²⁸и не будут ктому во пленение языком, и зверие земнии не поядят их ктому: и вселятся с надеждею, и не будет устрашаяй их.

²⁹И возставлю им сад мирен, и не будут ктому малы числом на земли, и не будут погублени гладом на земли, и не приимут ктому укорения от язык:

³⁰и уведят, яко аз есмь Господь Бог их с ними, а тии людие мои дом израилев, глаголет адонаи Господь:

³¹вы же овцы моя и овцы паствы моея есте, и аз Господь Бог ваш, глаголет адонаи Господь.