Read Елизаветинская Библия, 1751 Иезекииль 36 Bible Online

Иезекииль 36 - Елизаветинская Библия, 1751 bible

Иезекииль 36

¹И ты, сыне человечь, прорцы на горы израилевы и рцы:

²горы израилевы, слышите слово Господне, сия глаголет адонаи Господь: понеже рече враг на вы: благоже, пустыня вечная во одержание нам бысть:

³того ради прорцы и рцы: тако глаголет адонаи Господь: зане быти вам погубленым и безчестным и возненавиденым от язык окрестных вам, еже быти вам во одержание прочым языком, и взыдосте и бысте в поношение устен и во укоризну странам:

⁴сего ради, горы израилевы, слышите слово Господне, сия глаголет адонаи Господь горам и холмом, и потоком и дебрем, и полянам и опустошеным, и разореным и градом оставленым, иже быша в пленение и в попрание оставшым языком окрестным.

⁵Того ради сия глаголет адонаи Господь: аще не во огни рвения моего глаголах на прочыя языки и на идумею всю, яко даша землю мою себе во одержание со веселием (от всего сердца), обезчестивше душы, еже потребити повоеванием:

⁶того ради прорцы на землю израилеву и рцы горам и холмом, и полянам и дебрем: сия глаголет адонаи Господь: се, аз во рвении моем и в ярости моей глаголах, за укоризну, юже приясте от язык.

⁷Того ради сия глаголет адонаи Господь: се, аз воздвигну руку мою на языки, иже окрест вас, тии безчестие свое приимут.

⁸Ваше же гроздие и плод ваш, горы израилевы, поядят людие мои, яко надеются приити.

⁹Яко се, аз к вам, и призрю на вы, и возделаете и насеете:

¹⁰и умножу в вас человеки, весь дом израилев до конца, и населятся гради, и пустыни оградятся:

¹¹и умножу вас людьми и скотом, и умножатся и возрастут, и вселю вас якоже прежде, и благо сотворю вам якоже бывшым прежде вас, и уразумеете, яко аз есмь Господь:

¹²и нарожду в вас человеки люди моя израиля, и наследят вас, и будете им во одержание, и не приложите ктому безчадни быти от них.

¹³Сия глаголет адонаи Господь: понеже глаголаша тебе: земля поядающая человеки ты еси, и безчадная от языка твоего была еси:

¹⁴того ради человеков ктому не пояси и языка твоего не обезчадиши ктому, глаголет адонаи Господь.

¹⁵И не услышится в вас ктому безчестие языков, и укоризны людий не приимете ктому, и язык твой не будет без чад ктому, глаголет адонаи Господь.

¹⁶И бысть слово Господне ко мне глаголя:

¹⁷сыне человечь, дом израилев вселися на земли своей, и оскверниша ю путем своим и кумирми своими и нечистотами своими, и по нечистоте месячная имущия бысть путь их пред лицем моим:

¹⁸и излиях ярость мою на ня, крови ради, юже пролияша на землю, и кумирми своими оскверниша ю,

¹⁹и разсыпах я во языки и развеях я во страны: по пути их и по начинанию их судих им.

²⁰И внидоша во языки, в няже внидоша тамо, и оскверниша имя мое святое, внегда глаголатися им: людие Господни сии и от земли своея изыдоша.

²¹И пощадих я имене ради моего святаго еже оскверниша дом израилев во языцех, аможе внидоша.

²²Того ради рцы дому израилеву: сия глаголет адонаи Господь: не вам аз творю, доме израилев, но имене моего ради святаго, еже осквернисте во языцех, тамо аможе внидосте.

²³И освящу имя мое великое, оскверненное во языцех, еже осквернисте среде их, и уразумеют языцы, яко аз есмь Господь, глаголет адонаи Господь, внегда освящуся в вас пред очима их.

²⁴И возму вы от язык и соберу вы от всех земель, и введу вы в землю вашу,

²⁵и воскроплю на вы воду чисту, и очиститеся от всех нечистот ваших и от всех кумиров ваших, и очищу вас.

²⁶И дам вам сердце ново и дух нов дам вам, и отиму сердце каменное от плоти вашея и дам вам сердце плотяно, и дух мой дам в вас:

²⁷и сотворю, да в заповедех моих ходите, и суды моя сохраните и сотворите я.

²⁸И вселитеся на земли, юже дах отцем вашым, и будете ми в люди, аз же буду вам в Бога.

²⁹И спасу вы от всех нечистот ваших (и очищу вы от грех ваших всех), и призову пшеницу и умножу ю, и не дам на вы глада:

³⁰и распложу плод древесный и плоды селныя, яко да не приимете ктому гладныя укоризны во языцех.

³¹И помянете пути своя злыя и начинания ваша не благая, и вознегодуете пред лицем их о беззакониих ваших и о мерзостех ваших.

³²Не вас ради аз творю, доме израилев, глаголет адонаи Господь, вестно да будет вам, (доме израилев:) постыдитеся и усрамитеся от путий ваших, доме израилев.

³³Сия глаголет адонаи Господь: во оньже день очищу вы от всех беззаконий ваших и населю грады, и соградятся пустыни,

³⁴и земля погибшая возделается вместо того, яко погублена бысть пред очима всякаго мимоходящаго:

³⁵и рекут: земля оная погибшая бысть яко вертоград сладости, и гради опустевшии и разореннии и раскопаннии, забралы утвержденни сташа:

³⁶и уразумеют языцы, елицы останутся окрест вас, яко аз Господь возградих разоренныя и насадих погубленныя: аз Господь глаголах и сотворю.

³⁷Сия глаголет адонаи Господь: се, еще обрящуся дому израилеву, еже сотворити им: умножу их яко овцы, человеки яко овцы святыя,

³⁸яко овцы Иерусалимли во праздниках его, тако будут гради опустевшии полни стад человеческих: и уразумеют, яко аз Господь.