Read Елизаветинская Библия, 1751 Иезекииль 37 Bible Online

Иезекииль 37 - Елизаветинская Библия, 1751 bible

Иезекииль 37

¹И бысть на мне рука Господня, и изведе мя в Дусе Господни и постави мя среде поля: се же бяше полно костей человеческих:

²и обведе мя окрест их около, и се, многи зело на лицы поля, и се, сухи зело.

³И рече ко мне: сыне человечь, оживут ли кости сия? И рекох: Господи Боже, ты веси сия.

⁴И рече ко мне: сыне человечь, прорцы на кости сия и речеши им: кости сухия, слышите слово Господне:

⁵се глаголет адонаи Господь костем сим: се, аз введу в вас дух животен

⁶и дам на вас жилы, и возведу на вас плоть и простру по вам кожу, и дам дух мой в вас, и оживете и увесте, яко аз есмь Господь.

⁷И прорекох, якоже заповеда ми Господь. И бысть глас внегда ми пророчествовати, и се, трус, и совокупляхуся кости, кость к кости, каяждо ко составу своему.

⁸И видех, и се, быша им жилы, и плоть растяше, и восхождаше (и протяжеся) им кожа верху, духа же не бяше в них.

⁹И рече ко мне: прорцы о дусе, прорцы, сыне человечь, и рцы духови: сия глаголет адонаи Господь: от четырех ветров прииди, душе, и вдуни на мертвыя сия, и да оживут.

¹⁰И прорекох, якоже повеле ми, и вниде в ня дух жизни, и ожиша и сташа на ногах своих, собор мног зело.

¹¹И рече Господь ко мне глаголя: сыне человечь, сия кости весь дом израилев есть, тии бо глаголют: сухи быша кости нашя, погибе надежда наша, убиени быхом.

¹²Того ради прорцы (сыне человечь) и рцы к ним: сия глаголет адонаи Господь: се, аз отверзу гробы вашя и изведу вас от гроб ваших, людие мои, и введу вы в землю израилеву:

¹³и увесте, яко аз есмь Господь, внегда отверсти ми гробы вашя, еже возвести ми вас от гробов ваших, людие мои: и дам дух мой в вас, и живи будете,

¹⁴и поставлю вы на земли вашей, и увесте, яко аз Господь: глаголах и сотворю, глаголет адонаи Господь.

¹⁵И бысть слово Господне ко мне глаголя:

¹⁶сыне человечь, возми себе жезл един и напиши на нем иуду и сыны израилевы прилежащыя к нему: и жезл вторый возми себе и напиши на нем иосифа, жезл ефремов, и вся сыны израилевы приложившыяся к нему:

¹⁷и совокупи я друг ко другу себе в жезл един, еже связати я, и будут (вкупе) в руце твоей:

¹⁸и будет, егда рекут к тебе сынове людий твоих, вопрошающе: не возвестиши ли нам ты, что суть сия тебе?

¹⁹и речеши к ним: сия глаголет адонаи Господь: се, аз поиму племя иосифово, еже есть в руце ефремове, и племена израилева прилежащая к нему, и дам я в племя иудино, и будут в жезл един в руце иудине.

²⁰И будут жезли, на нихже писати будеши, в руце твоей пред очима их,

²¹и речеши к ним: сия глаголет адонаи Господь: се, аз поемлю весь дом израилев от среды языков, аможе внидоша, и соберу я от всех сущих окрест их и введу их в землю израилеву,

²²и дам я во язык на земли моей и в горах израилевых: и князь един будет во всех сих царем, и не будут ктому в два языка, ни разделятся ктому на два царства,

²³да не оскверняются ктому в кумирех своих и в мерзостех своих и во всех нечестиих своих: и избавлю я от всех беззаконий их, имиже согрешиша, и очищу я, и будут ми в люди, и аз буду им в Бога.

²⁴И раб мой давид князь среде их и пастырь един будет всех, яко в заповедех моих ходити будут и суды моя сохранят и сотворят я,

²⁵и вселятся на земли своей, юже дах рабу моему иакову, на нейже жиша тамо отцы их, и вселятся на ней тии и сынове их и сынове сынов их даже до века: и давид раб мой князь их будет во век.

²⁶И утвержу им завет мирен, и завет вечен будет с ними, и укореню я и умножу,

²⁷и дам освящение мое посреде их во век, и будет вселение мое в них, и буду им Бог, а они будут ми людие:

²⁸и уведят языцы, яко аз есмь Господь освящаяй я, внегда будут святая моя среде их во век.