Read Елизаветинская Библия, 1751 Иезекииль 40 Bible Online

Иезекииль 40 - Елизаветинская Библия, 1751 bible

Иезекииль 40

¹И бысть во двадесять пятое лето пленения нашего, перваго месяца, в десятый день месяца, в четвертоенадесять лето но пленении града, в той день бысть на мне рука Господня: и веде мя тамо,

²в видении Божии веде мя на землю израилеву и постави мя на горе высоце зело, на нейже яко сограждение града прямо (полудне),

³и введе мя тамо: и се, муж, и зрак его бяше, яко видение меди блещащияся, и в руце его бяше вервь зиждущих и трость мерителная. Той же стояше у врат

⁴и рече ко мне: видел ли еси, сыне человечь? виждь очима твоима и ушима твоима слыши, и учини в сердцы твоем вся, елика аз показую тебе, зане того ради вшел еси семо, да покажу тебе, и покажеши ты вся, елика видиши, дому израилеву.

⁵И се, ограда внеуду окрест храма, и в руце мужа мера тростяна шести лакот в лакоть шестодланный, и измери предстение ширину равно трости, и высоту его равно трости.

⁶И вниде во врата зрящая на восток седмию степеньми, и измери фее, шесть о сию страну, шесть же об ону, и елам дверный равно трости.

⁷И фее равно трости в долготу и равно трости в широту, и аилам среде феилаф шести лакот. И фее второе равно трости в широту и равно трости в долготу, елам же пяти лакот.

⁸И фее третие равно трости в долготу и равно трости в широту,

⁹елам же вратный, иже близ елама двернаго осми лакот, аилев же двою лактей: и елам дверный внутрьуду.

¹⁰И фее дверныя прямо фее, три о сию страну и три об ону, мера же едина трием: и мера едина аилам сюду и сюду.

¹¹И размери широту входа вратнаго десяти лактей, широту же вратную тринадесяти лактей,

¹²и лакоть един сводимь прямо фееим лактя единаго и лактя единаго, предел сюду и сюду, и фее шести лактей о сию страну и шести лактей об ону страну.

¹³И размери врата от стены фее до стены фее, широта двадесяти и пяти лактей: сия врата ко вратом,

¹⁴и непокровенное елама врат шестидесяти лактей, (двадесяти пяти) и фее двора окрест,

¹⁵и непокровенное врат отвне в непокровенное (врат) елама врат внутрьуду пятьдесят лактей.

¹⁶И оконца сокровена фееим и в аилам внутрь врат двора окрест: такожде и елам оконца внутрьуду окрест, и на аилам финики сюду и сюду (изваяны).

¹⁷И введе мя во двор внутренний, и се, преграждения и междустолпия окрест двора, преграждений же тридесять в междустолпиих,

¹⁸и притворы противу задней стране врат, по долготе врат междустолпие нижнее.

¹⁹И размери широту двора от непокровенаго врат внешних внутрь ко непокровеному врат зрящих вне, лактей сто зрящих на восток: и введе мя на север,

²⁰и се, врата зрящая на север двору внешнему, и размери я, долготу их и широту.

²¹И фее три о сию страну, три же об ону, и аилев, и еламы, и финики их: и бысть по мере врат зрящих на восток, пятидесяти лактей долгота их, а широта их двудесяти и пяти лактей:

²²и оконца их, и еламы, и финики их, якоже врата зрящая на восток: и седмию восходами восхождаху на ня, и еламы внутрьуду.

²³И врата двору внутреннему зрящая ко вратом северным, якоже врата зрящая на восток: и размери двор от врат до врат лактей сто.

²⁴И веде мя к югу, и се, врата зрящая на юг, и размери я, и фее, и аилева, и еламы, по темжде мерам.

²⁵И оконца их и еламы окрест якоже и оконца елаг, пятидесяти лактей долгота их, а широта двудесяти и пяти лактей,

²⁶и седмь восходов им, и еламы внутрьуду, и финики их, един о сию страну, а другий об ону над аилев.

²⁷И врата прямо вратом двора внутренняго на юг: и размери двор от врат до врат на юг, сто лактей в широту.

²⁸И введе мя во двор внутренний врат, яже на юг, и размери врата, яже на юг, по темжде мерам:

²⁹и фее, и аилев, и еламы по темжде мерам.

³⁰И оконца их и еламы окрест, пятидесяти лактей долгота их, а широта двудесяти и пяти лактей.

³¹Еламы же во двор внешний, и финики аилев, и осмь восходов.

³²И введе мя во врата зрящая на восток, и размери я по темжде мерам, и фее и аилев и еламы по темжде мерам.

³³И оконца им, и еламы и окрест, пятидесяти лактей долгота их, а широта их двудесяти и пяти лактей.

³⁴И еламы во двор внутренний, и финики на аилев сюду и сюду, и осмь восходов им.

³⁵И введе мя во врата яже на север, и размери по темжде мерам,

³⁶и фее и аилев и еламы, и оконца им окрест, пятидесяти лактей долгота их, а широта двудесяти и пяти лактей,

³⁷и еламы во внешний двор, и финики аилеву сюду и сюду, и осмь восходов им.

³⁸И преграды их, и двери их, и еламы их пред враты их вторыми сток, тамо измывают всесожжения.

³⁹Во еламе же врат, две трапезы о сию страну, две же об ону, еже закалати на них всесожжения, яже за грехи и яже за неведение.

⁴⁰И созади стока всесожжений дверий зрящих на север две трапезы на восток противу задней стране (дверий) вторых, и противу елама врат две трапезы на восток.

⁴¹Четыри о сию страну, четыри же об ону противу задней стране врат, на тех закалают заколения: прямо осми трапез заколений:

⁴²четыри же трапезы всесожжений каменны истесаны, в широту лактя единаго и пол, в долготу двух лактей и пол, а в высоту лакоть един: на тыя возлагают орудия, имиже закалают тамо всесожжения и заколения.

⁴³И имеют ограждение мало истесано на длань внутрьуду окрест, верху же трапезы покров, еже покрыватися им от дождя и зноя.

⁴⁴И введе мя во двор внутреннейший, и се, две преграды во внутреннейшем дворе, едина противу задней стране врат зрящих на север, вводящая на юг, а другая противу задней стране врат сущих на юг, зрящих же к северу.

⁴⁵И рече ко мне: преграда сия, яже зрит на юг, жерцем есть, иже стрегут стражбу храма:

⁴⁶а преграда, яже зрит к северу, жерцем есть стрегущым стражу требника: тии суть сынове садуковы, приступающии от левиа ко Господеви, еже служити ему.

⁴⁷И размери двор ста лактей в долготу и в широту ста лактей, на четыри страны его, и требник прямо храму.

⁴⁸И введе мя во елам храма: и размери аил елама пяти лактей широту о сию страну, пяти же лактей об ону, широта же дверная четырехнадесяти лактей, и бока дверная елама три лакти о сию страну, три же об ону.

⁴⁹Долгота же елама двадесять лактей, а широта дванадесять лактей: и десятию степеньми восхождаху к нему, и столпи бяху у аилама, един о сию страну, а другий об ону.