Read Елизаветинская Библия, 1751 Иезекииль 48 Bible Online

Иезекииль 48 - Елизаветинская Библия, 1751 bible

Иезекииль 48

¹Сия же имена племен от начала еже к северу, по стране схождения разделяющаго ко входу имафову двора енаня, предел дамасков к северу по стране имафова двора: и будут им яже на востоки, даже до моря, даново едино.

²И от предел дановых к востоком даже до моря, асирово едино.

³И от предел асировых, от сущих к востоком, даже до моря, неффалимле едино.

⁴От предел же неффалимлих от страны восточныя даже до страны моря, манассиино едино.

⁵От предел же манассииных, сущих на востоки, даже до сущих к морю, ефремле едино.

⁶От предел же ефремлих, иже на восток, даже до моря, рувимле едино.

⁷От предел же рувимлих, иже на востоки, даже до моря, иудино едино.

⁸А от предел иудиных, иже к востоком, даже до моря, будет начаток уделения двадесяти и пяти тысящ широта, и долгота якоже едина от частей сущих к востоком, и даже до тех яже к морю: и будет святое посреде их.

⁹Начаток, егоже отделят Господеви, в долготу двадесять и пять тысящ и в широту двадесять и пять тысящ.

¹⁰От сих будет начаток святых жерцем, к северу (в долготу) двадесять и пять тысящ, и к морю в широту десять тысящ, и к востоку десять тысящ, и на юг в долготу двадесять и пять тысящ: и гора святых будет посреде его

¹¹жерцем, освященным сыном садуковым, стрегущым стражбы храма, иже не прельстишася во прельщение сынов израилевых, якоже прельстишася левити.

¹²И будет им начаток даемый от начатков земли, святое святых от предел левитских.

¹³Левитом же ближняя пределов жреческих, двадесяти и пяти тысящ в долготу, а в широту десяти тысящ: вся долгота двадесяти и пяти тысящ, а широта десяти тысящ.

¹⁴Да не продастся от него, ни заменится, ниже отимутся первая жита земли, яко свято есть Господеви.

¹⁵Пять же тысящ избыточных в широте двадесяти и пяти тысящей, предградие да будет граду на вселение и в разстояние его: и да будет град среде его.

¹⁶И сия меры его: от севера четыре тысящы и пять сот, и от юга четыре тысящы и пять сот, и от восток четыре тысящы и пять сот, и от моря четыре тысящы и пять сот.

¹⁷И да будет разстояние граду к северу двусту и пятидесяти, и к югу двусту и пятидесяти, и на восток двусту и пятидесяти, и к морю двусту и пятидесяти.

¹⁸Избыток же долготы держащься начатков святых десять тысящ к востоком и десять тысящ к морю: и будут начатки святаго, и будут жита ея во хлебы делающым град.

¹⁹Делающии же град да делают его от всех племен израилевых.

²⁰Весь начаток двадесяти и пяти тысящ на двадесять и пять тысящ: четвероуголно отделите от него начаток святаго, от одержания градскаго,

²¹а избыток старейшине от сего: и от онаго, от начатков святаго и во участие града, спреди на двадесять и пять тысящ долгота, до предел, иже к морю и к востоком, спреди на двадесять и пять тысящ, до предел, иже к морю, близ частей старейшины: и да будет начаток святых и освящение храма среде его.

²²От участия же левитска и от участия града, среде старейшин, будет среде предел иудиных и среде предел вениаминих, и старейшин да будет.

²³А избыточное племен от сущих к востоком даже до сущих к морю, вениаминово едино.

²⁴От предел же вениаминих к востоком даже до страны яже к морю, симеоне едино.

²⁵От предел же симеоних, от страны яже на восток даже до страны яже к морю, иссахарово едино.

²⁶А от предел иссахаровых, от востоков даже до моря, завулоне едино.

²⁷От предел же завулоних, от востока даже до страны моря, гадово едино.

²⁸От предел же гадовых, от востока даже до ливы: и будут пределы его от юга, и воды варимоф-кадиса, наследия даже до моря великаго.

²⁹Сия земля, юже расположите жребием племеном израилевым: и сии разделы их, глаголет Господь Бог.

³⁰И сии исходы града, иже к северу, четыре тысящы и пять сот мерою:

³¹врата же града по именом племен израилевых: врата троя на север: врата рувимля едина, врата же иудина едина и врата левиина едина:

³²и на восток четыре тысящы и пять сот, и врата троя: врата едина иосифова, врата же едина вениаминя и врата данова едина:

³³и яже к югу четыре тысящы и пять сот мерою, и врата троя: врата едина симеону, врата же едина иссахару и врата едина завулону:

³⁴и яже к морю четыре тысящы и пять сот мерою: врата троя: врата едина гадова, и врата асирова едина и врата неффалимова едина.

³⁵Округлость же осминадесяти тысящ: имя же граду, от негоже дне будет, Господь тамо будет имя ему.