Read Елизаветинская Библия, 1751 Иезекииль 6 Bible Online

Иезекииль 6 - Елизаветинская Библия, 1751 bible

Иезекииль 6

¹И бысть слово Господне ко мне глаголя:

²сыне человечь, утверди лице твое к горам израилевым и прорцы к ним,

³и речеши: горы израилевы, слышите слово Господне, сия глаголет адонаи Господь горам и холмом, и каменем и дебрем: се, аз наведу на вы мечь, и потребятся высоты вашя:

⁴и сокрушатся требища ваша и кумирницы вашя, и повергу язвеных ваших пред кумиры вашими:

⁵и дам трупы сынов израилевых пред кумиры их и расточу кости вашя окрест требищ ваших.

⁶И во всем селении вашем опустеют грады, и высокая ваша погибнут, яко да потребятся требницы ваши и сокрушатся, и престанут кумиры ваши, и отвергутся кумирницы вашя, и потребятся дела ваша:

⁷и падут язвении посреде вас, и познаете, яко аз Господь.

⁸И оставлю еже быти от вас избегшым от меча во языцех, и в разсыпании вашем во странах,

⁹и помянут мя уцелевшии от вас во языцех, аможе быша пленени: кляхся бо сердцу их блудившему и отставшему от мене и очесем их блудившым вслед начинаний их: и бити имут лица своя о злобах, яже твориша во всех мерзостех своих,

¹⁰и познают, яко аз Господь не туне глаголах сотворити им вся злая сия.

¹¹Тако глаголет адонаи Господь: восплещи рукою и вострепли ногою и рцы: благоже, благоже о всех мерзостех злобы дому израилева: яко мечем и гладом и смертию падут.

¹²Дальнии смертию скончаются, а ближнии мечем падут: оставшии же и обдержимии гладом скончаются: и скончаю гнев мой на них,

¹³и увесте, яко аз Господь, егда будут язвении ваши среде кумир ваших окрест требищ ваших, на всяцем холме высоцем и на всех версех горних, и под дубом сенным и под всяким древом чащным, идеже даяху воню благоухания всем кумиром своим.

¹⁴И простру руку мою на ня, и положу землю в пагубу и в потребление от пустыни девлафа, от всего селения их: и познаете, яко аз Господь.