Read Елизаветинская Библия, 1751 Даниил 4 Bible Online

Даниил 4 - Елизаветинская Библия, 1751 bible

Даниил 4

¹Аз навуходоносор обилуяй бех в дому моем и благоцветый на престоле моем:

²сон видех, и устраши мя, и смятохся на ложи моем, и видения главы моея смятоша мя:

³и мною положися повеление, привести пред мя вся мужы мудрыя вавилонския, да сказание сна возвестят мне.

⁴И вхождаху обаятелие, волсви, газарини, халдее, и сон аз рех пред ними, и сказания его не возвестиша ми,

⁵дондеже вниде (пред мя) даниил, емуже имя валтасар, по имения бога моего, иже духа Божия свята имать в себе, и сон пред ним рех:

⁶валтасаре, княже обаятелей, егоже аз разумех, яко дух Божий святый имаши, и всякая тайна не изнемогает пред тобою, слыши видение сна моего, еже видех, и сказание его повеждь мне.

⁷И видение главы моея на ложи моем зрех, и се, древо среде земли, и высота его велика:

⁸и возвеличися древо то и укрепися, и высота его досязаше до небесе, и величина его до конец земли всея,

⁹листвие его прекрасное, и плод его мног, и пища всех в нем, и под ним вселяхуся вси зверие дивии, и в ветвех его живяху (вся) птицы небесныя, и от него питашеся всяка плоть.

¹⁰Видех во сне нощию на ложи моем, и се, бодрый и святый от небесе сниде

¹¹и возгласи крепце и тако рече: посецыте древо и обийте ветви его, и оттрясите листвие его и разсыплите плод его, да позыблются зверие под ним и птицы с ветвий его:

¹²точию отрасль корения его в земли оставите, и во узе железне и медне, и во злаце внешнем и в росе небесней вселится, и со зверьми (дивиими) часть его во траве земней:

¹³сердце его от человек изменится, и сердце зверино дастся ему, и седмь времен изменятся над ним:

¹⁴изречением бодраго слово, и глагол святых прошение: да уведят живущии, яко владеет вышний царством человеческим, и емуже восхощет, даст е, и уничтоженное человеков возставит над ним.

¹⁵Сей сон, егоже видех аз навуходоносор царь: ты же, валтасаре, сказание его повеждь, яко вси мудрии царства моего не могут сказания его поведати мне, ты же, данииле, можеши, яко дух Божий свят в тебе.

¹⁶Тогда даниил, емуже имя валтасар, ужасеся аки на един час, и размышления его смущаху его. И отвеща царь и рече: валтасаре, сон мой и сказание его да не смущает тебе. И отвеща валтасар и рече: господине, да будет сон сей ненавидящым тя, и сказание его врагом твоим.

¹⁷Древо, еже видел еси возвеличившееся и укрепившееся, егоже высота досязаше до небесе и величина его на всю землю,

¹⁸и листвие его благоцветное и плод его мног, и пища всем в нем, под ним живяху зверие дивии, и в ветвех его угнездяхуся птицы небесныя:

¹⁹ты еси, царю, яко возвеличился еси и укрепел, и величество твое возвеличися и досяже небесе, и власть твоя до конец земли.

²⁰И яко виде царь бодраго и святаго сходяща с небесе, и рече: посецыте древо и разсыплите е, точию проничение корения его в земли оставите, и во узе железне и медяне и во злаце внешнем и в росе небесней водворится, и со зверьми дивиими часть его, дондеже седмь времен пременятся над ним:

²¹сие сказание его, царю, и изречение вышняго есть, еже приспе на господина моего царя:

²²изженут тя от человек, и с дивиими зверьми будет житие твое, и травою аки вола напитают тя, и от росы небесныя тело твое оросится, и седмь времен изменятся над тобою, дондеже увеси, яко владеет вышний царством человеческим, и емуже восхощет, даст е.

²³А еже рече: оставите проничение корения древа (в земли): царство твое тебе будет, отнележе увеси власть небесную.

²⁴Сего ради, царю, совет мой да будет тебе угоден, и грехи твоя милостынями искупи и неправды твоя щедротами убогих: негли будет долготерпелив грехом твоим Бог.

²⁵Сия вся постигоша навуходоносора царя.

²⁶По двоюнадесяти месяцех в дому царства своего, в вавилоне бе ходя,

²⁷отвеща царь и рече: несть ли сей вавилон великий, егоже аз соградих в дом царства, в державе крепости моея, в честь славы моея?

²⁸Еще слову сущу во устех царя, глас с небесе бысть: тебе глаголется, навуходоносоре царю: цартво твое прейде от тебе,

²⁹и от человек отженут тя, и со зверьми дивиими житие твое, и травою аки вола напитают тя и седмь времен изменятся на тебе, дондеже увеси, яко владеет вышний царством человеческим, и емуже восхощет, даст е.

³⁰В той час слово скончася на цари навуходоносоре, и от человек отгнася, и траву аки вол ядяше, и от росы небесныя тело его оросися, дондеже власи ему яко льву возрастоша и ногти ему аки птицам.

³¹И по скончании тех дний, аз навуходоносор очи свои на небо воздвиг, и ум мой ко мне возвратися, и вышняго благослових, и живущаго во веки похвалих и прославих, яко власть его власть вечна, и Царство его в роды и роды,

³²и вси живущии на земли ни во чтоже вменишася, и по воли своей творит в силе небесней и в селении земнем: и несть, иже воспротивится руце его и речет ему: что сотворил еси?

³³В то время ум мой возвратися ко мне, и в честь царства моего приидох, и зрак мой возвратися ко мне, и началницы мои и вельможи мои искаху мене: и в царстве моем утвердихся, и величество изюбилнее приложися мне.

³⁴Ныне убо аз навуходоносор хвалю и превозношу и славлю Царя небеснаго, яко вся дела его истинна, и путие его судбы, и вся ходящыя в гордости может смирити.