Read Елизаветинская Библия, 1751 Даниил 8 Bible Online

Даниил 8 - Елизаветинская Библия, 1751 bible

Даниил 8

¹В лето третие царства валтасара царя видение явися мне, аз даниил, по явльшемся мне прежде.

²И бех в сусех граде, иже есть во стране еламстей, и видех в видении, и бех на увале,

³и воздвигох очи мои и видех: и се, овен един стоя пред увалом емуже рози, рози же высоцы, един же вышше другаго, и вышший восхождаше последи.

⁴И видех овна бодуща на запад и на север, и на юг и на восток: и вси зверие не станут пред ним, и не бе избавляюща из руки его, и сотвори по воли своей, и возвеличися.

⁵Аз же бех размышляя, и се козел от коз идяше от лива на лице всея земли и не бе прикасаяся земли, и козлу тому рог видимь между очима его:

⁶и прииде до овна имущаго рога егоже видех стояща пред увалом, и тече к нему в силе крепости своея.

⁷И видех его доходяща до овна, и разсвирепе на него, и порази овна, и сокруши оба рога его: и не бе силы овну, еже стати противу ему: и поверже его на землю и попра его, и не бе избавляяй овна от руки его.

⁸И козел козий возвеличися до зела: и внегда укрепися, сокрушися рог его великий, и взыдоша друзии четыри рози под ним, по четырем ветром небесным:

⁹и от единаго их взыде рог един крепок, и возвеличися вельми к югу и к востоку и к силе,

¹⁰и возвеличися даже до силы небесныя: и сотвори пасти на землю от силы небесныя и от звезд, и попра я:

¹¹и дондеже архистратиг избавит пленники, и его ради жертва смятеся, и благопоспешися ему, и святое опустеет:

¹²и дадеся на жертву грех, и повержеся правда на землю: и сотвори, и благопоспешися.

¹³И слышах единаго святаго глаголюща. И рече един святый другому некоему глаголющему: доколе видение станет, жертва отятая, и грех опустения данный, и святое и сила поперется?

¹⁴И рече ему: даже до вечера и утра дний две тысящы и триста, и очистится святое.

¹⁵И бысть, егда видех аз даниил видение и взысках ведения, и се, ста предо мною аки образ мужеск,

¹⁶и слышах глас мужеск среде увала, и призва и рече: гаврииле, скажи видение оному.

¹⁷И прииде и ста близ стояния моего: и егда прииде ужасохся и падох на лице мое. И рече ко мне: разумей, сыне человечь, еще бо до скончания времене видение.

¹⁸И егда глаголаше со мною, падох ниц на земли, и прикоснуся мне, и постави мя на ноги моя, и рече:

¹⁹се, аз возвещаю тебе будущая на последок гнева (сыном людий твоих): еще бо до конца времене видение.

²⁰Овен, егоже видел еси имуща рога, царь мидский и персский:

²¹а козел козий царь еллинский есть: рог же великий, иже между очима его, той есть царь первый:

²²сему же сокрушившуся восташа четыри рози под ним: четыри царие востанут от языка его, но не в крепости его,

²³и на последок царства их, исполняющымся грехом их, востанет царь безсрамен лицем и разумея гадания,

²⁴и державна крепость его, не в крепости же своей, и чудесно растлит и управит и сотворит, и разсыплет крепкия и люди святы,

²⁵и ярем вериг своих исправит: лесть в руце его, и в сердцы своем возвеличится, и лестию разсыплет многих, и на пагубу многим возстанет, и яко яица рукою сокрушит.

²⁶И видение вечера и утра реченнаго истинно есть: ты же назнаменай видение, яко на дни многи.

²⁷Аз же даниил успох и изнемогах на дни (многи), и востах и творях дела царева, и почудихся видению, и не бяше разумевающаго.