Read Елизаветинская Библия, 1751 Осия 2 Bible Online

Осия 2 - Елизаветинская Библия, 1751 bible

Осия 2

¹Рцыте брату своему: людие мои: и сестре своей: помилованная.

²Судитеся с материю своею, судитеся, яко та не жена моя, и аз не муж ея: и отвергу блужения ея от лица моего и любодейство ея от среды сосцу ея:

³яко да совлеку ю нагу и поставлю ю якоже в день рождения ея, и положу ю яко пустыню, и учиню ю яко землю безводну, и убию оную жаждею:

⁴и чад ея не помилую, яко чада блужения суть,

⁵яко соблуди мати их, посрамися родившая их, рече бо: пойду вслед похотников моих, дающих мне хлебы моя и воду мою, и ризы моя и плащаницы моя, и масло мое и вся, елика мне достоят.

⁶Сего ради, се, аз загражду путь ея тернием и возгражду распутия ея, и стези своея не обрящет:

⁷и поженет похотники своя и не постигнет их, и взыщет их и не обрящет, и речет: пойду и возвращуся к мужу моему первому, яко добрее ми бе тогда, нежели ныне.

⁸Но та не уразуме, яко аз дах ей пшеницу и вино и масло, и сребро умножих ей: сия же сребряны и златы сотвори ваалу.

⁹Сего ради обращуся и возму пшеницу мою во время ея и вино мое во время его, и отиму ризы моя и плащаницы моя, да не покрывает студа своего:

¹⁰и ныне открыю нечистоту ея пред похотниками ея, и никтоже отимет ея от руки моея:

¹¹и отвращу вся веселия ея и праздники ея, и новомесячия ея и субботы ея и вся празднества ея,

¹²и погублю виноград ея и смоквы ея, о нихже рече: мзды ми суть сия, яже даша мне похотницы мои: и положу я в свидение, и поядят я зверие селнии и птицы небесныя и гади земнии:

¹³и отмщу на ней дни ваалимовы, в няже требы кладяше им, и вдеваше усерязи своя и мониста своя, и хождаше вслед похотников своих, а мене забы, глаголет Господь.

¹⁴Сего ради, се, аз соблажню ю, и учиню ю яко пустыню, и возглаголю в сердце ея,

¹⁵и дам ей притяжание ея оттуду и поляну ахорову, отверсти смысл ея: и смирится тамо по днем детства своего и по днем изведения своего от земли египетски.

¹⁶И будет в той день, наречет мя муж мой, глаголет Господь, а не прозовет мене ктому ваалим.

¹⁷И отвергу имена ваалимля от уст ея, и не воспомянутся ксему имена их.

¹⁸И завещаю им завет в той день со зверьми селными и со птицами небесными и с гады земными, и лук и мечь и брань сокрушу от земли, и вселю я со упованием:

¹⁹и обручу тя себе во век и обручу тя себе в правде и в суде и в милости и в щедротах:

²⁰и обручу тя себе в вере, и увеси Господа.

²¹И будет в той день, глаголет Господь, послушаю небесе, а оное послушает земли,

²²и земля послушает пшеницы и вина и масла, и сии послушают иезраеля:

²³и всею оную себе на земли и помилую непомилованную: и реку не людем моим: людие мои есте вы: и тии рекут: Господь Бог наш ты еси.